Apokalípsi 17 - Uhokri Gahegbetawni Nukune akak Sawmus

Tino powkemnivyo aduhyamadga axtig

¹ Ayteke pahavwi ahj gaytakkis neras ntewnehkernene gikebikis ahj ku pariye hiyuhnene ntewnehkernene tas, ig danukwe kennesa nutuh. Ig awna nutuh: — Ba ayta. Nah akkite pit pahavu tino powkemnivyo datyo ku samah eg katiwnihwevyo avatra gumahyakemni. Nor tino egnebaki arakak adahan gihiyekemnikis ka aynsima hiyeg ku pariye misekwenevwi avit nopsadnene paytwempu ku pariye kennesa akigbimna ka aynsima warik.

² Madikte hiyeg gikivarakis amedgenevwi inin igkis ke wotbe igkis mahayakemnihwenekuyes gukakbe. Madikte hiyeg amedgenevwi inin igkis ke wotbe igkis uwkihwenekuyes akak guwinabe. Inme guwina innebaki gumahyakemni.

³ Ayteke nikwe ig ner ahj waxwe nutivuh ta amadgat amatap. Ayge nah hiyap pahavu tino bat giduhyamadga pahavwi axtigi duwweh. Ig ner axtigi tamakvit muwapuw givitiw akak mbaytunka. Ig kadahan ntewnehker akebi gitew akak madikawku akebi gituw.

⁴ Nor tino kasimsavu akak gukawihni bereswetet kane atiwnisima wagageboye, duwboye. Eg bereswavu akak karukri wahano, akak tip bukabkahwavunano hawata akak akabdat seynovyo kane atiwnisima. Eg hiyuh akak pohow higeptet ay guwaku kehka karukri wahano. Egu higeptet kivun akak arikna mbeyevye patehwevye. Ini arikna mbeyevye innebaki arakak adahan gumahyakemni.

⁵ Nah hiyap ay gudeva tamak pahat guw patuwesbuhka. Inakni “Babiloniya Datyo, Tinogben Powkemnavyo Gunagkis, Mahayakemniki Ganag”.

⁶ Nah hiyap nor tino eg uwkayeh akak Uhokri gihiyegavu gimigkis akak gimigkis neras ku pariye umahavepka avatra ku samah igkis kinetihwenes gimin Kiyavwiye Jesus. Nah hiyapni hene, nah wakaymni ka aynsima.

Axtig ignebaki arakak gidahan ikivarat amadgaya inin

⁷ Igme ner ahj awna nutuh: — Mmahki pis wakaymni? Nah akkamnihte pit hiyakemniki ayemewnene gumin nor tino. Hawata nah akkamnihte pit hiyakemniki gimin ner axtigi ntewnehkernene gitew akak madikawkunene gituw ku pariye hiyuwempiye nor tino giduhyamadga.

⁸ Ig ner axtigi ku pariye pis hiyap ignebaki arakak gidahan pahavwi awayg ku pariye iveg kaksa, heneme kuri ig ka ivegnema akiw. Aysawnemenek ig wagahnek ahakwatak giwetri mihadnene, heneme ayteke ig sarayhpikanek arimkanit biyukwiki. Madikte hiyeg amedgenevwi inin igkis wakaymnibdinek gimin. Ku samah akavuska hawkri igkis hiyeg ku pariye yumanene giwkis tamak amadga ini kagta adahan dehetniki, igkis wakaymnibdinek gimin ner awayg, mmanawa ig iveg kaksa, kurime ig ka ivegnema akiw, heneme metakwa ig kahayak akiw.

⁹ Nah akkamnihte pit pahat hiyakemniki akiw adahan pis pukuhpin. Ner axtigi gitew ntewnehkernene akebi innebaki arakak adahan ntewnehker akebi waxri ku kiney nor tino misakwa avit. Hawata akiw ini gitew innebaki arakak gidahankis ntewnehker gikebikis ikivaratviyene.

¹⁰ Pohowku gikebikis gaytakkis neras ikivaratviyene igkis kuwis kumaduka, kuwis igkis mpiye. Pahavwime kuri kumadukene ku akak inin. Pahavwime akiw ig kote danuhte. Ku aysaw ig danuhnek amawka ig kumadukanek aynesawa hawkri.

¹¹ Ayteke pahavwiwa ikivarat akiw kahayaknek. Igi ner kene axtigibe ku pariye kaksa ig iveg, heneme kuri ig ka ivegnema akiw, igi ner igwata ikivaratnek akiw. Ig pes ayta gibetitakkis neras ntewnehkernene ikivarat pitatyevwi, heneme ayteke ig sarayhpikanek arimkanit biyukwiki.

¹² Igme ner axtigi gituw madikawkunene akebi ku pariye pis hiyap innebaki arakak gidahankis madikawku ikivaratviyene ku pariye gikumadukankis kote kavusawte. Heneme aysawnemenek igkis ikakanek gitkis gidatnikis adahan igkis kumadukene payak gikak ner kene axtigibe. Igkis kumadukanek hiyeg ayge adahan ka ayivwadima hawkri.

¹³ Igkis madikawkunene ikivaratviyene igkis tuguhkisnek pahatwowa gihiyekemnikis. Igkis sarayhnek gidatnikis gikiytanikis givitit ner pahavwi kene axtigibe.

¹⁴ Ayteke igkis kernek gitivut ner Muwtohyan. Heneme ner Muwtohyan matekevgikisnek, mmanawa ignewa gikivarakis madikte ikivaratviyene, ignewa kumaduka madikte ku pariye kumadukenevwi. Gihiyegavu hawata matekevgikisnek, igkis ku pariye ig humak gimkanit, ku pariye ig kaniy adahan igkis misakwa ay gimun, ku pariye kamaxwenevwi givitit. Henewatbaki ig ahj awna.

Ikivaratviyene pisenwenek gukak tino powkemnivyo

¹⁵ Ayteke ig ahj awna nutuh akiw. Giwn: — Egnes warik ku pariye pis hiyap ku kiney nor tino powkemnivyo batnano egnesbaki arakak adahan ka aynsima hiyegviyenevwi ariwntak madikte waxri, giwntakkis madikte hiyegiviyenevwi, pahabunenevwi, arakembetnene gihivakkis hawata arakembetnene giwnavrikkis.

¹⁶ Igkisme neras ikivaratviyene ku pariye ner axtigi gituwviyene madikawkunene akebi ku pariye pis hiyap, igkis hiyapni hene ku samah madikte hiyeg madikte ikivaratviynevwi isaksew arit mahayakemniki, igkis ka batek. Ayge nikwe igkis amiyhe nor tino powkemnivyo. Ig ner pahavwi kene axtigibe hawata amiyhevgu. Ayteke nikwe igkis pisenwe akak guhawkan. In ke wotbe igkis xuwehpiyebe guw madikte gubereswan akak gudatni. In ke wotbe igkis ikiswigbe makawihanbe. In ke wotbe igkis axwiyebe gih. In ke wotbe igkis hawata bukehpiyebe eg ariwtrik tiket, pisenwe gukak yuma akiw.

¹⁷ Ignes madikawkunene ikivaratviyene inyewa kehnek inere, mmanawa igwa Uhokri ike avitit giyaknikis adahan igkis keh ini ku pariye gimawkan. Hawata ig kehnek igkis ahegbeta ginetnikis adahan igkis sarayhpiyes gidatnikis givitit ner pahavwi kene axtigibe adahan igme kumadukene, kahadbe hene metakwa Uhokri giwn kahayaknek madikte.

¹⁸ Egme nor tino ku pariye pis hiyap, egnebaki arakak adahan ini nopsadnene paytwempu ku pariye kumaduka madikte ikivaratviyenevwi amedgenevwi inin.