Apokalípsi 16 - Uhokri Gahegbetawni Nukune akak Sawmus

¹ Ayteke nah timap pahat ikuvimnat awna ka ahawnasima arikutak Uhokri givin. In awna gitkis neras ntewnehkernene ahj. In awna: — Ataknabay, dimukwinabay ini ntewnehkernene tas kivunnene akak ini mbayka ku pariye Uhokri hiyapkisne gitkis hiyeg avatra givathawnikis. Dimukwinabay avitit waxri.

Pitatye mbayka: busukvitka

² Ner pitatye ahj timapni hene, ig tivik, ig dimuke ini ku pariye ay amadga gitasga avitit waxri. Aynewa busukvitka mbeyevye kane akatwasima in humaw ay givitkis neras hiyeg ku pariye amevevye ner kene axtigibe gitamka, neras ku pariye kawohkigahewviye arit ner kene axtigibe gahehpak batakkarad.

Aveyni mbayka: parahwokwa wageswa migat

³ Ayteke givevwivye ahj dimuke ini ku pariye ay amadga gitasga ahakwat parahwokwa. Aynewa un wageswe migat kewa miyaraviyebe gimigkisbe. Ayge madikte im, madikte puwikne, madikte hiyeg ahakwaye parahwokwa igkis miyarap.

Amamnam mbayka: warik wageswa migat

⁴ Ayteke gimamnampiye ahj dimuke ini ku pariye ay amadga gitasga ahakwat warik, ahakwat un ariwtyak. Aynewa in wageswe migat.

⁵ Ayge nah timap pahavwi ahj ig un akivara, ig awna git Uhokri: — Kiyavwiye, pis ku pariye ay kuri, ku pariye ay minikwak, pis ku pariye waditnenekwa adahan avanenekwa, kibeyne kuri pis hiyapkisne gitkis hiyeg avatra gitaraksankis. In kabay pis keh hene, mmanawa

⁶ igkis sukase pihiyegavu gimigkis, igkis sukase pawnevevu gimigkis. Kuri metakwa pis diyuhkis gimigkis givititkis, pis ike gitkis migat adahan gihigvankis. Amebyemni gihiyekemnikis keh igkis amava inin gitiwnikis.

⁷ Ayteke nah timap pahat ikuvimnat nawenyewa akiw in awna ariwntak ini piriyepkewket. In awna: — Henewa, Kiyavwiye Uhokri detye. Pis ka pihiyekemnisima adahan pis hiyak gikakkis hiyeg pakekunawa akak ku samah gikehnikis. Pis iki ku pariye kabay gidahankis. Pis ka taraksa.

Avaxnikan mbayka: kamuw awahni bukah hiyeg

⁸ Ayteke givaxnikevye ahj dimuke ini ku pariye ay amadga gitasga giwtrikut kamuw. Aynewa kihawnehe kamuw awahni adahan in bukehpiye hiyeg ke tiketbe.

⁹ Ayge hiyeg bukehpika avit ini kamuw awahni ka ahawnasima. Kameki igkis miniwme ariw gitaraksankis. Hiyaksa igkis ka kiyatha Uhokri aynesnima. Ig ik adahan mpitha ini mbayka giwkis, heneme igkis he makuksenen giw.

Avahwokni mbayka: misanpiki, akatwa

¹⁰ Ayteke givahwoknivye ahj dimuke ini ku pariye ay amadga gitasga amadgat ner kene axtigibe gevwi ku kiney ig kumadukene hiyeg. Aynewa gikumadukan misanpip. Ayge hiyeg kagehe ginenkis awaku akatwa.

¹¹ Igkis hiyapni hene, igkis makukse Uhokri inurikyene awaku ini akatwa ku pariye igkis kayah, awaku gibuskanakis. Kameki igkis miniwme ariw ku pariye gikehnikis mbeyevye.

Avuguhkun mbayka: nopsad kerka

¹² Ayteke givuguhkunevye ahj dimuke ini ku pariye ay amadga gitasga ahakwat egu warik nopsadnano kewyo Ewfrates. Aynewa eg warik makere adahan wokene ahin gidahankis neras ikivaratviyene gikakkis madikte gisuwtatavu ku pariye aytniye wahamaravriktak ku kitak kamuw pes.

¹³ Ayteke nah hiyap mpana anmaptiviyene mbayavyempu ke tivuwbe gihivakkis. Pahavwi pes gibiyriktak ner kene waramwibe, pahavwime pes gibiyriktak ner pitatye kene axtigibe. Pahavwime pes gibiyriktak ner aveynivye kene axtigibe ku pariye ikewne ke wotbe ig Uhokri gawnevebe.

¹⁴ Igkis anmaptiviyene igkis wavityempu. Igkis keh ka aynsima annut. Igkis atak gitkis hiyeg gikivarakis muwapuw amadga inin adahan ahegbetenes ginetnikis adahan igkis givahduketnikis adahan kehne nopsad kerka. Abet ini hawkri igwa Uhokri detye patiptakigkis atere.

Amawka Uhokriyanvu misakwa ahegbet gavit Cristo gidawnhan

¹⁵ Nukebyuvwi, ihpanabay Cristo giwn. Ig awna: — Nah ayta pahaye adahan ke amepyebe ig danuh ku kabet hiyeg ka wahapnigma. Ku pahavwi misakwa ahegbet nudahan, ig utinek ka aynsima kabayka. Ku ig ka daxtasaw arit patahwaki, in ke wotbe ig avuriwnenekwa gisimsa barewbet, nikwe aysawnemenek ig ka muwaka wew makawihannema adahan ig kawih maraki avim ini ku aysaw hiyeg gimebyemnikis hiyapkiskanek.

¹⁶ Ayteke neras wavityempu pahadguhkise neras ikivaratviyenevwi amun pahayku iwetrit kewye “Armajedoh” giwnavrikkis judeyenevwi.

Ntewnehkervye mbayka: sagkaki ka ahawnasima

¹⁷ Ayteke metakwa ig ntewnehkervye ahj dimuke ini ku pariye ay amadga gitasga abetit mayg. Ayge pahat ikuvimnat awna ka ahawnasima ariwntak Uhokri gevwi kiyatyo ku pariye aynene ariku givin. In awna: — Kuwis madikte pisenwa.

¹⁸ Ayge kimanka, ugugune, digidgiye. Ayge wayk segke ka ahawnasima. Yuma nawenyewa sagkaki kema inima ku samah akavuska hiyeg gihumewvenkis ay amadga inin. Ini sagkaki mbayte ariw madikte.

¹⁹ In ibekhe ini paytwempu nopsadnene Jerusalém adahan in humaw mpana akebi paytwempu. Hawata akiw in mehe madikte paytwempuyene avitnenevwi madikte waxribdi. Mmanawa metakwa ig Uhokri kiye neras ku pariye kane ihpenevwima giwn adahan ig hiyapkisne gitkis. Git Uhokri ini giwetrikis kewa paytwempube nopsadnene minikwak kewye Babiloniya, mmanawa hiyeg avitnenevwi ini paytwempu gihiyekemnikis mbeyevye. Kuri metakwa ig keh madikte paytwempuyenevwi ayge igkis higap ini win arikutak gidahanwa gihigvetni. Ini win innebaki mbayka ku pariye Uhokri hiyapkis gitkis hiyeg avatra givathawnikis, mmanawa ig ka batek akak patahwaki aynesnima.

²⁰ Avim ini madikte kewgihribdi mehwe. Hawata madikte waxribdi imuwadnene mehwe.

²¹ Muwok wayk tiphawnawa inutak kewa tipbe nopsadmin. Mpuse tip aheh paxnika madikwa (40) ahehtet. In wayk inuriktak in huwit givititkis hiyeg. Igkis hiyapni hene, igkis makukse Uhokri giw avatra ini mbeyevyenen muwok tiphawnene, mmanawa in ka nimebyemnisima.