Apokalípsi 15 - Uhokri Gahegbetawni Nukune akak Sawmus

Matekevyevwi wavitye hawata kabayha Uhokri aynte inurik

¹ Ayteke nah hiyap nawenyewa annut akiw aynte inurik. In annut ka nidatnisima in keh hiyeg wakaymni. Ayge ntewnehker gikebikis ahj. Igkis me amevevyemet ntewnehker mbayka giwakuritkis. Ini mbayka in amaksemni mbayka ku pariye Uhokri hiyapkiswiye gitkis hiyeg avatra givathawnikis.

² Ayteke nah hiyap ke pahak parahwokwabe in kehka akak butey wageska payegbitak akak tiket. Hawata nah hiyap neras ku pariye matekevyevwi wavitye. Igkis neras ku pariye kane kumadukasaw git ner kene axtigibe akak gahehpak batakkarad. Ine igkis kawnata amava gitamka lemehu ku pariye areketni giw. Igkis tabirbet ahakwevi inere parahwokwa. Igkis hiyuh gagignikis hebbek ay giwakukis ku pariye Uhokri gikan gitkis.

³ Ayge igkis peknes avat. Igkis peknes amekene Moís gavan, ku pariye gibuk Uhokri. Hawata igkis peknes gavan ner Muwtohyan. Igkis awna: — Aa Kiyavwiye Uhokri, detyewatnene adahan madikte, aynsikata pannu hene! In kabayntiwa, in ka nidatnisima, ka nawaygisima. Pihiyekemni inyewatnene waditnenekwa. Pis gikivarakis madikte hiyeg.

⁴ Kiyavwiye, hawkavanek yuma pahavwinema hiyeg ka avisma pibohri. Yuma pahavwinema ka kiyathama piw. Mmanawa pisnewa barewvitye. Yuma pahavwinema barewvitye kema pisma. Aysawnemenek hiyeg ariwntak madikte waxri aytanek pimkat adahan igkis kibeyhene piw, mmanawa pannu ku pariye kibeynewatnen ini hiyapkanek gavitkis madikte hiyeg. Henewatbaki igkis hiyeg pak givankis.

Ntewnehker akebi ahj ewk ntewnehker akebi mbayka

⁵ Ariwnteke ini nah sarayh nuvegi akiw, nah hiyap Uhokri givin aynte inurik in woke. Ig Uhokri ig ayge givineku.

⁶ Ayteke neras ntewnehkernene gikebikis ahj ku pariye me amevevye ntewnehker mbaykamet igkis pese arikutak Uhokri givin. Igkis kasimsavuwave akak kamis seyne barewye tigihwavwinene. Igkis kakabutikvu akak gikabutikkis kehka karukri wahano in pugubuhwa hanpa gidukmadgatkis.

⁷ Ayteke pahavwi gaytakkis neras paxniknene gikebikis hiyeg dehetniyevwi ig ike ntewnehker tas gitkis neras ntewnehkernene ahj. In tas kivun akak mbayka ku pariye Uhokri hiyapkiswiye gitkis hiyeg avatra givathawnikis. Mmanawa ig Uhokri ku pariye dehetniye adahan avanenekwa ig ka batek akak patahwaki aynesnima.

⁸ Ayge nikwe in Uhokri givin misekwe kivun akak sariyan. In amuwe akak gikiytani gidatni. Ka ik adahan hiyeg parak atere arikut Uhokri givin he ku aysawnemenek ini ntewnehkernene mbayka mpiyanek ini mbayka ku pariye ewkka gavitkis neras ntewnehkernene ahj. Yuma hiyeg ik adahan mpitha nidawnhan akak giviryepkawnikis akiw.