Apokalípsi 14 - Uhokri Gahegbetawni Nukune akak Sawmus

144.000 hiyeg hawata kabayha Uhokri aynte inurik

¹ Ayteke nah sarayh nuvegi akiw, nah hiyap ner Muwtohyan ig tabir aynte avit ini waxri imuwadnene kewye Siyawh aynte avit Jerusalém, payak gikakkis neras madikawku madikwa mil hiyeg akak paxnika madikwa gawnakis akak paxnika gawnakis akiw (144.000). Igkis hiyeg tamakave gidevakis akak Uhokri gitamka adahan gibekteykis kahadbe igkis hiyakan ku igkisnewa gidahan Uhokri. Igkis tamakave akak gibekteykis giwavrik ner Muwtohyan hawata giwavrik Wigwiy.

² Ayteke nah timap hiyeg gikuvimnakis awna inuriktak akak gihawnakis ke avetetnibe, ke digidgiyebe. Nah timap gikuvimnakis ke agigmanbe akiw, ke hiyegbe agighenebe hebbek.

³ Igkis ayge givetun Uhokri ku pariye betnene amadga gevwi kiyatyo. Igkis ayge givetunkis neras paxniknene hiyeg dehetniyevwi, ayge givetunkis neras kiyavwiyegben. Igkis peknes nukune avat ku pariye yumanene hiyeg kannuhye pak. Igkisnewa neras madikawku madikwa mil hiyeg akak paxnika madikwa gawnakis akak paxnika gawnakis akiw (144.000) ku pariye isimkavu gavit Uhokri, igkisnewa kannuhye pak inakni avat.

⁴ Mmanawa igkisnewa agenpiye givitkis, mmanawa igkis ka mahayakemnihwa gukakkis tinogben. Igkis barewvityevwi. Igkis ikatuswe gitnen Uhokri. Igkis wew gikaknen ner Muwtohyan ku kitwiye ig. Igkis ka amava gihiyekemnikis hiyeg amadgayavu inin. Igkis isahptew niw. Igkiskit umahkiswe givatra Uhokri. In ke wotbe igkis kakanhew givitkis pahavwite git Uhokri hawata git ner Muwtohyan.

⁵ Igkis ka iha giwasemni ner kene axtigibe. Wasaymaka ka utipka ay gibetkis. Igkis yumahwa givathawnikis aynesnima giwtrik Uhokri.

Mpana gikebikis ahj ekkene ku Uhokri gibiykaseptenkis hiyeg ku pariye kane Uhokriyanvuma

⁶ Ayteke nah hiyap pahavwi ahj akiw ig amerempi aynte inurik. Ig ekkene Uhokri ginetni dehetniki. Yuma pahatnema inakni ginetni mpiyene aynesnima. Ig nekketni gitkis madikte hiyeg amedgenevwi inin. Ig akkin gitkis madikte hiyegviyenevwi, gitkis pahabunenevwi, gitkis arakembetnene giwnavrikkis hawata gitkis arakembetnene gihivakkis.

⁷ Ig ahj awna gitkis akak madikte gawaygi. Giwn: — Kiyathanabay Uhokri akak madikte yavisni. Kiyathanigbay mmanawa metakwa ahawkanavrik danuh adahan ig katiwnisevye gitaraksankis gitkis hiyeg avatra gikehnikis kane kabay. Kawohkigahawnabay git Uhokri, git ner ku pariye kehe en, kehe waxri, kehe parahwokwa hawata kehe un ariwtyak.

⁸ Ayteke nah hiyap pahavwiwa ahj akiw ig danuh gihavu butte ner pitatye ahj. Ig awna: — Hiyeg kane Uhokriyanvuma giwetrikis ku pariye ke ini paytwempu nopsadnenebe kewye Babiloniya in kuwis biyuk. In biyuk awaku in ke pahavu tinobe ku pariye kinista madikte hiyeg adahan ignes higap win gukak. In guwinna innebaki kane Uhokriyanvuma gimahyakemnikis mbeyevye.

⁹ Ayteke nah hiyap pahavwiwa ahj akiw, gimamnaviye ahj, ig danuh butte gihavukis neras pitatyevwi ahj. Ig awna akak madikte giwakemni. Giwn: — Ku pahavwi kawohkigahawnek git ner kene axtigibe akak gahehpak batakkarad, igi biyuknek. Ku pahavwi tamakisnek gidep ba giwak aduhyamadga akak ner kene axtigibe gitamka, igi hawata biyuknek giw Uhokri.

¹⁰ Aysawnemenek pugamawka ig pahavwi higapnek ariwntak igwa Uhokri giwinna. In Uhokri giwinna innebaki mbeyne ku pariye Uhokri hiyapkisnek gitkis patahwaviye. In ke wotbe ig dimukwinbenek inyekata arikut gihigvetni, ig higapkiswin gitkis. Egme gihigvetni egnebaki gihiyekemni ku samah ig ka batek akak patahwaki aynesnima. Igme ner patehwevye ig hiyapnek ka aynsima mbeyne ay abet nor tiket wageska payegbitaknene akak ini pisukempiye ku pariye bixiwahnene arihri. Ayge ig hiyapnek ka aynsima mbeyne ay givetunkis neras ahjviyenevwi barewvityevwi hawata ay givetun ner Muwtohyan.

¹¹ Egu tiket ku kiney hiyeg patakwaviye hiyap mbeyne eg wohne adahan avanenekwa. Gusayan pes takunipti avanenekwa. Ayge yuma mayakka gidahankis neras ku pariye kawohkigahewnevwi git ner kene axtigibe akak gahehpak batakka. Yumahwata mayakka gidahankis neras ku pariye amevenevwi hiyeg gikankis gitamka.” Henewatbaki ig ahj awna.

Amawka Uhokri gihiyegavu kamaxwene givitit abetnewa mbeyne

¹² Ku pariye hiyeg kane amava axtigi gitamka igkis hiyapnek mbeyne ay amadga inin. Ka sam. Amawka Uhokri gihiyegavu kamaxwenene givitit abetnewa ini mbeyne. Ku pariye ihpenevwi Uhokri gikumadukan, ku pariye kamaxwenevwi givitit Kiyavwiye Jesus amawka ku igkis kamaxwa givitit kabayntiwa abetnewa ini mbeyne. Amawka igkis ka isahkis gihiyekemni.

¹³ Ayteke nah timap pahat ikuvimnat awna inuriktak. In awna nutuh: — Tamaknaba inin iwit ku pariye nah ekkene pit kuri: Ku pariye hiyeg umahkiswa avatra ku samah ignes kehne Ukivarawiy gibetki, igkis utinek ka aynsima kabayka. Igme Uhokri Gitip awna: — Ihi, inakni inyewa. Igkis utinek kibeyne mayeket ariw gimaviswankis gidahan Uhokri. Ku pariye kabayka igkis keh, igkis utinek akebiwata ini kabayka.

Uhokri iwapkisnek gihiyegavu

¹⁴ Ayteke nah sarayh nuvegi, nah hiyap paha ukuhne seyne. Nah hiyap pahavwi ke awaygbe bat ayge abet ini ukuhne. Ig kadahan paha iyuwti ay gitewha adahan areketni ku ig matekevye madikte givetunyavu. In kehka karukri wahano. Ay giwaku pahamku kasivag kane ayawisima kayewbetnano kewyo “fois”.

¹⁵ Ayteke pahavwiwa ahj pes akiw arikutak Uhokri givin. Ig kabiman akak madikte gawaygi git ner ahj ku pariye betnene abet ukuhne. Ig awna git: — Asa kawih pikaswaga adahan pis kavusaw hiwh amutri ariw. Mmanawa amutri ariw amadga wayk kuwis ivat. Ahawkanavrik kuwis danuh adahan pis ahiwhpitni.

¹⁶ Ayteke nikwe ner ahj ku pariye betnene abet ukuhne ig mpiyase gikaswaga waykborit adahan ig wiwhpiye gamutravwi avititak waxri.

Uhokri hiyapkis gitkis taraksavye ke wotbe ig kumukwigkisbe amadga kumuktet

¹⁷ Ayteke pahavwiwa ahj pes akiw arikutak Uhokri givin aynte inurik. Ig hawata hiyuh akak pahamku kasivag kane ayawisima kayewbetnano kewyo fois.

¹⁸ Ayteke pahavwiwa ahj pes akiw ariwntak kakanhewket. Igi tiket akivara. Ig kabiman akak madikte gawaygi git ner giveynivye ahj ku pariye hiyuhnene kasivag kane ayawisima kayewbetnano. Ig awna git: — Asa kawih pikaswaga adahan pis hiwh uva ariw ariwntak gukat avititak waxri. Mmanawa ayipa guw kuwis ivat.

¹⁹ Igme ahj mpiyase gikaswaga waykborit adahan ig hiwhpiye uva ariw ariwntak gukat. Pisenwa ig padekwig arikut pahamku kumuktet nopsadnano. Ini kumuktet innebaki arakak adahan Uhokri gihiyekemni ku samah ig ka batek akak patahwaki aynesnima.

²⁰ Nor uva ariw eg kumukwika amadga egu kumuktet avawyewa ariw paytwempu Jerusalém. Bawa ka uva arakuma ku pariye pes amadgatak ini kumuktet, heneme in migat ku pariye kane Uhokriyanvuma gimigkis. In migat ka aynsima. In buwavewe muwapuw optiran adahan mpana madikawku madikwa kilomet (300) ayabwikawni. In kaba pitana ahehtet nimihni, pakeku akak kaway gibiy.