Apokalípsi 13 - Uhokri Gahegbetawni Nukune akak Sawmus

Awayg kewa pahavwi axtigibe kumadukanek madikte hiyeg

¹ Ayteke nah hiyap pahavwi axtigi pes akiw ahakwatak parahwokwa. Ig kadahan madikawku akebi gituw. Gitew ntewnehker akebi. Mpuse akisurik gituw kadahanyekuye iyuwti adahan areketni ku ig kumadukene hiyeg. Mpuse gitew tamakave avit mbaytunka adahan makuksene Uhokri giw.

² Igi axtigi ku pariye nah hiyap gihivak kewa pahavwi kawokwinebe. Gikugku kewa wokibe gikugku. Gibiyme kewa kawokwinebe gibiy. Igme ner kene waramwibe ku pariye wavitye gikivarakis ig ike gidatni git ner axtigi. Ig ike gikumadukan git adahan ig kumadukene hiyeg hawata ig ike git ka aynsima gikiytani.

³ Ayteke nah hiyap paha araytak gitew ner axtigi in ke wotbe in huwivwihpikabe mbeyevye huwivwihwaki, heneme ayteke in miyvi akiw. Madikte hiyeg amedgenevwi inin igkis hiyapni hene, igkis wakaymnibdi mpiynevevye, igkis kumadukasew git ner awayg ku pariye kene axtigibe.

⁴ Amun ini nikwe igkis madikte kawohkigahewnekuyes git ner wavitye gikivarakis ku pariye kene waramwibe, mmanawa ignewa ku pariye ike gidatni git ner awayg ku pariye kene axtigibe. Igkis hawata kawohkigahaw git ner kene axtigibe. Igkis awna: — Yuma pahavwinema detye kema nerma. Yuma pahavwinema hiya gisamanak.

⁵ Igme ner kene axtigibe ig isaksepka adahan ig makuksebdihne Uhokri. Ig isaksepka adahan ig kehne ka aynsima annut adahan paxnika madikwa kayg akak piyana arawna (42) akebi.

⁶ Ayge nikwe ig kavusaw makuksebdih Uhokri. Ig mahivwih Uhokri giw. Ig mahivwih givin. Ig mahivwih hawata madikte inurikyenevwi akiw.

⁷ Hawata ig isaksepka adahan ig kerye gikakkis Uhokri gihiyegavu. He ig isaksepka adahan ig matekevgikis. Ig isaksepka kumaduka madikte hiyegiviyenevwi, pahabunenevwi, arakembetnene giwnavrikkis hawata arakembetnene gihivakkis.

⁸ Madikte hiyeg kane Uhokriyanvuma amedgenevwi inin igkis kawohkigahaw git ner kene axtigibe. Ku samah akavuska hawkri igkis yumante giwkis tamaknema amadga ini kagta adahan dehetniki, ini kagta gidahan ner Muwtohyan, ku pariye umahkiswe gidukwenavrikkis hiyeg.

⁹ Yis ku pariye katayebnenevwi, ataybiswanabay arit ku pariye nah ekkene yit kuri.

¹⁰ Ku Uhokri ikiswanaw adahan pahavwi yaytak kamaxwika, ka sam, hiyawa ig kamaykiswa. Ku amawka pahavwi umehpika akak iwan, kawnata sam, hiyawa ig umahkiswa. Awaku ini pugamawka yis Uhokri gihiyegavu amawka yis kamaxwa givitit Uhokri kabayntiwa. Amawka yis kamaxwenene givitit abetnewa ini mbeyne.

Nawenyewa awayg ke axtigibe kawohkigasa hiyeg git ner pitatye awayg

¹¹ Ayteke nah hiyap pahavwiwa akiw ku pariye kewa pahavwi axtigibe nawenyewa akiw ig pes waykekutak. Ig pitana gituw kewa pahavwi muwtohyanbe. Heneme ig awna akak gimantiw ke pahavwi waramwibe.

¹² Ku aysaw ig ay kennesa gimun ner pitatye awayg kene axtigibe ig kadahanata gannu. Ig mpiksaptih inin waxri payak akak madikte hiyeg amedgenevwi inin adahan igkis kawohkigahaw git ner kene axtigibe pitatyenene, ner ku pariye kabuskanaye mbeyevyenene, heneme ayteke in miyvi akiw.

¹³ Ner givevwivye kene axtigibe ig keh ka aynsima annut ku pariye hiyeg amadgayavu inin ka hiya nikehka. He ig keh tiket muhuk inuriktak amadgat inin giwtrikneswa hiyeg.

¹⁴ Ayge ig kinisne madikte hiyeg amedgenevwi inin akak ini gannu ku pariye ig isaksaka adahan ig keh ku aysaw ig kennesa gimun ner kene axtigibe pitatyenene. Ig batakise ahehpakti gitkis madikte hiyeg amedgenevwi inin adahan igkis kiyathenes ner kene axtigibe ku pariye huwivwihpika mbeyevyenen gihwivwihwan akak iwan, heneme ayteke in miyvi akiw.

¹⁵ Ikepka git givevwivye kene axtigibe adahan ig iki awnparinen arit gahehpak batakkarad ner pitatyenene kene axtigibe, kahadbe ig ahehpakti ik adahan awna iwit, ik adahan ig umah madikte hiyeg ku pariye kane kiyathig.

Kane Uhokriyanvuma amavanek axtig gitamka

¹⁶ Ig ner givevwivye kene axtigibe ig mpiksaptihe madikte hiyeg, hiyeg kiyatyevwi, hiyeg ku pariye ikaka yumanene gikiytanikis, hiyeg igisavye, hiyeg madiptavye, hiyeg ibukti, hiyeg kane ibuktima, adahan igkis amevenekuyes gitamkakkis ay aduhyamadga giwakkis kihehaptak ba ay gidevakis adahan gibekteykis.

¹⁷ Ayge nikwe hiyeg ku pariye kane amava ini gitamka igkis ka ik adahan igkis isimwiyinek, ine igkis kawnata ik adahan igkis piyuknek. Ini gitamka in ner kene axtigibe giw. Ku in ka tamaknek akak let, in tamaknek akak lemehu adahan areketni giw.

¹⁸ Nukebyuvwi, inakni ayap hiyakemniki yit. Ku pahavwi yaytak hiyakemniye hiyeg, ik adahan ig pukuhpa ini lemehu ku pariye areketni ner kene axtigibe giw. Mmanawa in pahavwi hiyeg giw. In lemehu puguhkuna madikawku madikwa akak puguhkuna madikwa arawna akak puguhkuna arawna akiw (666).