Apokalípsi 12 - Uhokri Gahegbetawni Nukune akak Sawmus

Tino pamakutekwiyo, igme Satanas aharit umehpiye gukamkayh

¹ Ayteke pahat annut hiyapkiska nutuh aynte inurik. Ayge nah hiyap pahavu tino, eg kasimsavu akak kamuw. Hawata nah hiyap kayg anavi gukugku. Guyuw ay gutewha in kadahan madikawku warukma akak pisaya arawna (12) akebi.

² Eg tino biwhkisno ayge. Eg kayawvaru awaku eg kayehe gukamkayh.

³ Ayteke nawenyewa annut hiyapkiska nutuh aynte inurik. Nah hiyap pahavwi waramwi ka nopsimahad. Ig duwweh. Ig kadahan ntewnehker akebi gitew akak madikawku akebi gituw. Mpuse gitewha kadahan paha iyuwti adahan areketni ku ig kumadukene hiyeg.

⁴ Akak gib ig ahiwe kaba abuskuhwa warukma inuriktak ig padekwigkis amadgat wayk. Ayteke ig tabirasew ayge guvetun nor tino ku pariye biwhkisno ig wahevye eg pamakutak adahan ig axwiye gukamkayh ku aysaw ig amadgat wayk.

Jesus amadga hawkri

⁵ Ayteke nor tino pamakuteke gukamkayh pahavwi awayg, ku pariye kumadukanek madikte hiyeg amadga inin akak pahat gisuga sivari hawata ku samah pahavwi muwtohvutne kumaduka givigvu akak ah. Ig amadga wayk, ig iwepka ig waxwepka ta inut gimkat Uhokri arimkat gevwi kiyatyo ku kiney ig kumadukene madikte muwapuw.

Uhokri gihiyegavu avuriwkanek

⁶ Egme nor tino bisike eg sigise ta amadgat amatap ku kiney yumanene hiyeg misakwa. Ayge Uhokri ahegbete pahayku iwetrit gudahan ku kiney eg avuriwka adahan madikawkuvut madikawku madikwa hawkri akak pina madikawku madikwa arawna akak puguhkuna madikwa arawna akiw (1.260) akebi.

Ahj wanekbetenek wavitye gihawkan

⁷ Ayteke kerka humew aynte inurik. Ig ner ahj kewye Migew gikakkis gihiyegavu ahj igkis kerbet gikak ner ku pariye kene waramwibe. Igme ner kene waramwibe ig ker gikak payak gikakkis gihiyegavu ahj mbayavye.

⁸ Heneme ig ner kene waramwibe matekepka payak gikakkis gihiyegavu. Ayge nikwe yuma pahaykunema iwetrit kawih gidahankis aynte inurik. Ka hiya igkisma misakwa ayge akiw.

⁹ Ayteke nikwe ig ner kene waramwibe nopsadnene, ig padekwika inuriktak. Igi ner Kaybune ku pariye humaw minikwak. Ig kanumka giw Wavitye Gikivarakis. Ig kanumka giw Satanas, Uhokri Givetunya. Ig ku pariye kinis madikte hiyeg amedgenevwi inin. Ig ner padekwika inuriktak amadgat wayk payak gikakkis gihiyegavu ahj mbayavye.

¹⁰ Ayteke nah timap pahat ikuvimnat ka ahawnasima aynte inurik. In awna: — Kibeyne, metakwa ahawkanavrik danuh adahan Uhokri keh hiyeg isahptaw. Metakwa gidatni ahawkanavrik danuh. Metakwa gikumadukan ahawkanavrik danuh. Kibeyne, metakwa ahawkanavrik danuh adahan Cristo gikiytani. Mmanawa kuri ner kamiyekevutne ku pariye tabirnenekwa ay givetun Uhokri adahan kamiyevye ukebyuvwiy takunipti, metakwa ig padekwika inuriktak.

¹¹ Kibeyne, igkis ukebyuvwiy matekevgi avitimpi ku samah ig Muwtohyan sukase gimig gidahankis, igkis matekevgi hawata avitimpi ku samah igkis ekkenes gikiytani. Kibeyne, igkis kibokaye kinetihwa gimin he igkis ka kavigsa givitkis, igkis ahegbet umahkiswa gidahan Uhokri.

¹² Yis inurikyenevwi, hiyawa yis batek yinaktin kuri. Heneme ka aynsima mbayka danuh kuri arit waxri hawata arit parahwokwa. Mmanawa ig wavitye gikivarakis kuwis danuh atere yit. Ig ka aynsima dagawne, mmanawa ig hiyakni ku kaba danuh gihawkanavrik adahan gihawkan pisenwe. Henewatbaki ig pahavwi awna.

Wavitye gikivarakis hiyapkisnek mbeyne gitkis hiyeg judeyenevwi

¹³ Igme ner kene waramwibe ig hiyapni hene ku ig kuwis padekwika amadgat wayk, ig kavusaw harakse nor tino ku pariye pamakuteke ner gukamkayh awayg.

¹⁴ Nikwenewa ikepka gut nor tino pikana akebi guhanpi kewa avakni nopsadnene gihanpibe kahadbe ik adahan eg amara eg tivik arimkat guwetri amadgat amatap piyawakad, kahabde ayge Uhokri avuriwgunek adahan mpanabu kamukri akak abusku. Atere ner kene waramwibe ka hiya gusamanak.

¹⁵ Ayge nikwe ig ner kene waramwibe ig hiyapni hene, ig pekkise un gibiyriktak kewa pahatra warikbe. Ini un harakse nor tino adahan gutarsepten.

¹⁶ Heneme wayk ayave nor tino. In wokhew. In higep madikte ini un ku pariye pese gibiyriktak ner kene waramwibe.

¹⁷ Ig ner kene waramwibe ig hiyapni hene, ig ka aynsima dagawne gut nor tino. Ig tivik kerye gikakkis guhiwhivwi ku pariye aytentene amadga inin, madikte neras ku pariye ihpenevwi Uhokri gikumadukan, ku pariye gidukweneswa ekkenenes Kiyavwiye Jesus ginetni inyewatnene.

¹⁸ Ayteke nikwe ig ner kene waramwibe ig misekwe tabir akigbimna parahwokwa.