Apokalípsi 11 - Uhokri Gahegbetawni Nukune akak Sawmus

Nah ahehpta Uhokri givin

¹ Ayteke ikepka nutuh pahat ahehtet ke yakot akatbe. Ayge nah timap pahavwi awna nutuh: — Kannikaw. Ahehptanaba nuvinuh nah Uhokri. Ahehptanaba egu kakanhewket hawata. Pukuhnaba aysaw gikebikis neras ku pariye nukabayhetnivwi ayge ariku nuvinuh neras ku pariye igkisyewa nuhiyegavu.

² Heneme ka muwaka aheh ahigwi aranwa nuvinuh. Ka muwaka ahehni, mmanawa in ikepka gitkis kane Uhokriyanvuma. Igkisme sibuhptanek nuwetri paytwempu Jerusalém adahan paxnika madikwa kayg akak piyana arawna (42).

³ Avim ini nah awahkisnek piyana nawnevevu atere, nah ikinek gawaygikis adahan igkisme ekkenes nuwnuh. Igkis kasimsavuwavenek akak sak kasiwboye adahan areketni giwakemnikis akak hiyeg gitaraksankis. Igkis ayge ekkenes nuwnuhnek abet ini mil hawkri akak pina madikawku madikwa arawna akak puguhkuna madikwa arawna akiw (1.260).

Uhokri gawnevevu piyana gikebikis

⁴ Neras piyananene gikebikis Uhokri gawnevevu igkis kewa abukribe adahan uguhne hiyeg gihiyekemnikis. Igkis kewa pikatna ah akatbe kewyo oliveg ku pariye ariy kane ahamawnisima. Igkis kewa pisoya abukribe akekri ku pariye tabirwak ay givetun Uhokri ku pariye waxri akivara.

⁵ Igkis ka aynsima gannukis. Ku pahavwi hiyeg aharit arewhevye gitkis, ayge nikwe tiket pes gibiyaptakis adahan gibukepten ner givetunyakis. Henewa, ku pariye aharit adahan arewhevye gitkis igwa muwaka adahan ig miya hene.

⁶ Igkis gawnevevu kadahan gannukis adahan sabuk en kahadbe muwok ka wayk ku samah igkis ekkenete Uhokri ginetni. Hawata igkis kadahan gannukis adahan wages un humaw migat. Hawata akiw igkis kadahan gannukis adahan hiyapkis madikte mbeyne gitkis hiyeg amedgenevwi inin ku samah gimawkankis.

⁷ Ku aysaw igkis pisenwanek gakkankis Uhokri ginetni, ayge pahavwi axtigi pesnek arikutak ini miyokwiye ku pariye yumanene amaksemni. Ig atere keryenek gikakkis. Avim ini ig matekevgikisnek. Ig umahavevgikisnek.

⁸ Ayge nikwe givitkis misakwanek haritave avigku ahin aynte avit ini paytwempu nopsadnene Jerusalém. Avitwata paytwempu ku kiney ig gikivarakis deddehpika amin giyakni. Heneme kuri ini paytwempu kanumka Sodoma. In hawata in kanumka Ejitumnaw. In kanumka hene awaku igkis paytwempuyenevwi ayge kadahanata gihiyekemnikis ke neras sodomayenevwibe, ke neras ejituyenevwibe.

⁹ Ayteke hiyeg ariwntak madikte waxri, giwntakkis madikte hiyegiviyenevwi, pahabunenevwi, arakembetnene giwnavrikkis hawata arakembetnene gihivakkis, igkis madikte hiyapnek neras piyananene gawnevevu givitkis haritavenek avigku ahin. Igkis ivegbetnek gimkanitkis adahan mpana hawkri akak abusku, mmanawa igkis ka isaksakanek adahan avuhka.

¹⁰ Ayge nikwe madikte hiyeg amedgenevwi inin igkis hiyapni hene ku samah metakwa ignes miyarap, igkis bateknek ginaktinkis ka aynsima. Igkis fetya. Igkis kakanhewnes pawtak. Mmanawa neras piyananene Uhokri gawnevevu kuwis hiyapkise ka aynsima mbeyne gitkis hiyeg.

¹¹ Heneme ayteke ariwnteke ini mpana hawkri akak abusku, ig Uhokri parakse gitipkis givititkis neras gawnevevu akiw. Ayge nikwe igkisme kannikew tabir akiw. Nerasme hiyeg hiyapni hene, igkis avisasew ka aynsima.

¹² Ayteke igkis piyananene Uhokri gawnevevu timap pahat ikuvimnat awna ka ahawnasima gikakkis inuriktak. In awna: — Wagahnay ayta numkanit. Ayteke igkis wagehe abetimpi ukuhne, igkisme givetunyavukis ivegbet gimkatkis atere.

¹³ Nikwenewa waxri segke kihaw. Aynewa paha payt ariwntak mpuse madikawku payt ay amadga inin in mehpika. Avim ini ntewnehker mil (7.000) gikebikis hiyeg umahavepka abetnewa ini sagkaki. Asemnime hiyeg hiyapni hene, igkis avisasew mpiynevevye, igkis kabeyhenekuye Uhokri inurikyene gidatni.

¹⁴ Aveynivye “akayih” adahan mbeyne mpiye. Kuri amamnampiye “akayih” adahan mbeyne ka ayivwihwa adahan in danuh.

Uhokri gidukwenewa kabayhaka aynte inurik

¹⁵ Ayteke ntewnehkerviye ahj agighe. Ayge inurik ka aynsima hiyeg awna akak madikte giwakemnikis. Igkis awna: — Kuri Ukivarawiy kumadukene amadga wayk gikak gikanyan Cristo. Ig kumadukanek adahan avanenekwa. Kibeyne.

¹⁶ Ayge neras piyananene madikwa kiyavwiyegben akak paxnikanene gawnakis (24) ku pariye batebdebdihpiye amadga gevwikis ayge givetun Uhokri, igkis tuguhkiswebdi mabuw waykborit adahan igkis gikabeyhetni Uhokri.

¹⁷ Igkis awna: — Aa Kiyavwiye Uhokri, pis Ukivara detye. Pisnewa ay kuri. Piswata minikwak. Usuh kabayhap awaku pis kawihe pidatni kuri adahan pis kumadukene hiyeg akak madikte pikiytani.

¹⁸ Neras kane Uhokriyanvuma igkis ka aynsima dagawnebdi, mmanawa metakwa ahawkanavrik danuh adahan pis kahayaksene gitkis ku samah pis ka batek akak givathawnikis. Ahawkanavrik danuh adahan pis givukeptenkis hanpa arimkanit biyukwiki. Hawata ahawkanavrik danuh adahan pis hiyekne gikakkis hiyeg miyaravyempu. Hawata ahawkanavrik danuh adahan pibukpig gikakkis pawnevevu igkis daxwiye gitiwnikis. Hawata ahawkanavrik danuh adahan madikte pihiyegavu ku pariye pikiyetnivwi ignes daxwiyes gitiwnikis. Neras ku pariye kiyatyevwi amadga hawkri payak gikakkis neras ku pariye ikaka yumanene gikiytanikis amadga hawkri ignes madikte daxwiyes gitiwnikis kibeyne itiwnit. Hawata akiw metakwa ahawkanavrik danuh adahan pis pisenwevye gikakkis hiyeg ku pariye pisenwevyevwi akak inin waxri. Henewatbaki igkis kiyavwiyegben awna.

¹⁹ Ayteke Uhokri givin aynte inurik in woke. Pohow kiyes hiyapka ayge. Egu kiyes bayehket adahan Uhokri gikumadukan adahan gahegbetawni gikakkis gihiyegavu. Ayge ugugune akak kimanka, digidgiye. Ayge wayk segke, muwok wayk tiphawnawa.