Apokalípsi 1 - Uhokri Gahegbetawni Nukune akak Sawmus

Inin kagta akka ku pariye nehmnikuhpiye

¹ Amadga inin kagta tamak Jesus Cristo ginetni amin arikna ku pariye nehmnikuhpiye. Kibeyne, ig Uhokri isakse Cristo adahan igme akka inakni gitkis gihiyegavu ku amawka in danuh ka ayivwinema. Nikwe ig awahkise giwatni ahj gimin Uhokri gibuk kiyavwiye Joawh adahan igme ekkevye inakni git.

² Amadgatak inin kagta ig kiyavwiye Joawh akka yit madikte ku pariye hiyapkiska git. Ig akka yit inakni Uhokri ginetni ku pariye Kiyavwiye Jesus Cristo ekke git.

³ Ku pariye hiyeg ivegbohevye inin kagta gitkis hiyeg igi uti ka aynsima kabaykanek. Hawata akiw neras ku pariye timepnevwi inakni inetit amin ku pariye nehmnikuhpiye igkis hawata uti ka aynsima kabaykanek. Ku igkis iha inakni iwit ku pariye tameknene ay amadga inin kagta, igkis hawata uti ka aynsima kabaykanek. Mmanawa kuwis kennesa adawnhan ini hawkri nehmnikuhpiye ku kavim madikte ini arikna kahayaknek.

⁴ Nah Joawh awahkis kabayka yimin yis Jesus gihiyegavu ku pariye lammesyavu ayge avit ini ntewnehkernene paytwempu ayge Asiyamnaw. Uhokri gabay yikaknek. Ig kariswehse yiyakninek. Ignewa ay kuri akak inin, igwata minikwak, igwata nehmnikuhpiye. Hawata Uhokri Gitip gabay yikaknek. Ignewa ke ntewnehkerbe akebi abukribe ku pariye ay avetun Uhokri gevwi kiyatyo.

⁵ Hawata Kiyavwiye Jesus Cristo gabay yikaknek. Ignewa inetitkekne ku pariye kis adahan wis iveg givitit. Ignewa atiwkekne kannikawka ariw miyaka. Ignewa gikivarakis madikte ikivaratviyenevwi amadgayavu inin. Kibeyne, ig amnihpewiy. Ig kehe wixwiy isahptaw ariw uvathawniwiy. Ig ke wotbe ig sukuhptevwiybe akak gimig, mmanawa ig sukase gimig udukwenavrikwiy.

⁶ Ayge nikwe ig keh wixwiy kawih gikumadukan. Ig wageswewiy adahan wixwiy humaw Wigwiy Uhokri gimuwvegavu adahan wixwiy danukwene git takunipti adahan kehne gibetki. Kibeyne gidahan Jesus Cristo. Ignewa ka gikiytanisima ignewa ka gidatnisima adahan takunipti avanenekwa. Ameh.

⁷ Ivegnay! Ig nehmnik abetimpi ukuhne! Madikte hiyeg hiyavginek, he neras ku pariye gidaddasepten igkis hawata hiyavginek. Avim ini madikte hiyegviyenevwi amedgene inin ignes hiyapni hene, igkis kayah gitaraksankisnek igkis tih. Henewatbaki in. Ameh.

⁸ Ig Ukivarawiy Uhokri detye, ig ay kuri akak inin, igwata minikwak, igwata nehmnikuhpiye. Ig awna: “Nahnewa akavuska. Nahnewa amaksemni. Yuma pahavwinema navitkignema. Yumahwata ewka nuwenuh akiw.”

⁹ Nah Joawh, nah yikebyi Jesus gihiyega. Ku samah wixwiy pahavwiwa gikak Jesus Cristo, wixwiy hiyepne mbeyne hawata ke igbe, heneme kibeyne wixwiy hawata kawihne gikumadukan. Hawata akiw kibeyne ig iki wawaygiwiy adahan wixwiy dehewnene abetnewa ini mbeyne hawata ke igbe. Nah sarayhpika atan avit inin kewgihri kewye Patmus awaku ku samah nah ekkene Uhokri giwn, awaku ku samah nah ekkene Jesus Cristo ginetni.

Jesus hiyapkiswa nutuh

¹⁰ Amakohnokwa abetnewa ini hawkri adahan kiyathene Kiyavwiye Uhokri, nah piriyepkewempiye gitiphawnawa Uhokri. Ayge nah timap nuharaptak pahat ikuvimnat awna ka ahawnasima ke agigbe tohompetbe.

¹¹ In awna nutuh: — Uya tamak amadga kagta madikte ku pariye hiyapkiska pit kuri avim inin. Ayteke pis awahkis ini kagta giminkis Jesus gihiyegavu ku pariye lammesyavu aynte avit ini ntewnehkernene paytwempu aynte Asiyamnaw. Igkis ayntenene avit Éfesu, avit Esmirna, avit Pérgamu, avit Tiyatira, avit Sardis, avit Filadéwfiya hawata avit Lawdiseya.

¹² Nah timap inakni hene, nah wagestaw adahan nah hiyepne ku pariye awna nukakuh. Ayge nah hiyap ntewnehker abukri akekri kehka karukri wahano.

¹³ Ayge ayegbivi ini abukri akekri nah hiyap pahavwi tabir ke awaygbe gihivak. Ig kasimsavu akak gisimsa kiyabwad, in kaba dax gikugku aduhymadgat. Ig kakabutikvu akak gikabutik kehka karukri wahano in pugubuhwa hanpa gidukmadgat.

¹⁴ Gisemni seye ke mawrube asisin, ke huwegbe asisin. Giwtyak kewa tiket akadweybe.

¹⁵ Gikugku huwiye ke kuwiwrabe ku pariye kuwisnene pisukaki ariwtrik tiket ayteke in dewhaki. Gikuvimname amanpuy ka ahawnasima ke pahayku avetetnibe.

¹⁶ Ig hiyuh ntewnehker akebi warukma ay giwaku kihehavriktak. Gibiyaptak pes pahamku iwan pebkaknano guyaw. Gihepka tigigihwavwi ke kamuwbe abutni puwipka abet.

¹⁷ Nah hiyavgi hene, nah tuguhkiswe mabuw gikimpurit ke miyaviyebe. Igme hiyapni hene ig sarayhe giwak kihehaptak nuvitit. Ig awna nutuh: — Ka muwaka avis. Nahnewa akavuska. Nahwata amaksemni. Yuma pahavwinema navitkignema. Yumahwata ewka nuwenuh akiw.

¹⁸ Nahnewa ku pariye dehetniye. Minikwak nah miyap, heneme kuri nah aymuhwa adahan avanenekwa. Nahnewa kumaduka miyaka. Nahnewa kumaduka miyaravye giwetrikis.

¹⁹ Nikwe uya tamak amadga kagta inin arikna ku pariye hiyapkiska pit kuri avim inin. Kinetihwanaba amin ini ku pariye kuwis danuhnene kuri akak inin, hawata amin ini ku pariye kotenene danuhte.

²⁰ Kuri nah akkamnihte pit Uhokri gihiyekemni patuwesbuhka amin inin ntewnehkernene akebi warukma ku pariye pis hiyap ay nuwaku kihehavriktak. Hawata nah akkamnihte pit amin ini ntewnehkernene akebi abukri akekri kehka karukri wahano. Inin ntewnehkernene akebi warukma, innebaki arakak gidahankis neras inetitkeknevwi adahan leglis aynte avit ntewnehkernene paytwempu. Inme ntewnehkernene abukri akekri, innebaki arakak adahan ntewnehkernene leglis ayge avit inivyene paytwempu. Henewatbaki ig Kiyavwiye Jesus awna nutuh.