3 João 1 - Uhokri Gahegbetawni Nukune akak Sawmus

Nah Joawh awahkis kabayka pimin

¹ Nah Joawh awahkis kabayka pimin nukebyi kibeyne Gayu. Nah inyewa batek pikak avititakwa nuyakni.

² Nukagmada, nah piriyepkaw pidahan adahan madikte wew kabayntiwa pikak. Adahan pivit makniw hawata ku samah pihiyekemni kuwis makniwnene.

³ Amakohnokwa gaytakis ukebyuvwiy danuhpene nutuh. Igkis ekke nutuh ku samah pis pidukwenewa wewnene akak Uhokri gihiyekemni inyewatnene pis tiviknene nikak. Nah timapni hene, nah batek ka aynsima.

⁴ Ku aysaw nah timap gakkis nukamkayuvwi ku ignes wewnes akak Uhokri gihiyekemni inyewatnene, ini keh nah batek ka aynsima. Yuma hene akiw keh nah batek.

Kibeyne pis amnih inetitkeknevwi

⁵ Nukagmada, kibeyne pis kabivwiye avuriw ukebyuvwiy Jesus gihiyegavu. Hiyawa igkis ka pihiyaknima heneme pis hiyak gikakkis kabayntiwa.

⁶ Igkis kuwis kinetihwa pimin ay ariku leglis amin ku samah pis amnihpigkis. Pis keh kabayntiwa ku samah pis ayavigkis adahan igkis diyuhpiye akak kabayka. In avigkutavrik Kiyavwiye Uhokri gibetki.

⁷ Mmanawa igkis kehnes gewewnikis muwapuw gidahan Cristo. Igkis ka ayavaptihwa gitkis hiyeg kane Uhokriyanvuma.

⁸ Nikwe amawka wixwiy Jesus gihiyegavu hiyak gikakkis akebi neras hiyeg. Ayge nikwe in ke wotbe wixwiy payak gikakkisbe ekkene Uhokri gihiyekemni inyewatnene.

Diyótrefis ka timepkere nuwnuh

⁹ Kuhwekwa nah awahkis pahak kagta nopsesa giminkis Jesus gihiyegavu ku pariye lammesyavu ayge. Heneme giwewkistenkis kiyavwiye Diyótrefis ku pariye gibetki ikaw gavitminkis gihiyegavu igi ka timepkere nuwnuh.

¹⁰ Nikwe kuwewanek ku aysaw nah danuh atere gitkis, nah akki gitkis madikte ku samah gikehni. Ig awna mbeye wasaymka numinuh. Ka inwonema mbayka ig keh. Hawata akiw ig ka amava ukebyuvwiy ku aysaw igkis danuh atere. He ig mpitha neras hiyeg ku pariye muwaka amavigkis givinekutkis he ig ivukevgikis arikutak leglis.

Demetriyu kibeyne hiyeg

¹¹ Nukagmada, ka muwaka ikaw kema ner awaygma gihiyekemni mbeyevye hiyakemniki. Ahempanaba hiyeg ku pariye gihiyekemnikis kibeyne. Pahavwi ku pariye gibetki keh kabayka, igi Uhokriyan. Pahavwime ku pariye gibetki keh mbayka, igi ka hiyak Kiyavwiye Uhokri aynesnima.

¹² Ahempanaba kiyavwiye Demetriyu. Madikte hiyeg kabayhig. Inyewa ig kibeyne hiyeg. Usuh hawata kabayhig. Pis kuwis hiyakni ku inakni wownuh inyewa.

Nah awahkis kabayka pimin

¹³ Nah kadahan ka aynsima inetit akiw adahan nah kinetihwene pit. Heneme nah ka muwaka akkin pit amadgatak kagta.

¹⁴ Gikak Kiyavwiye Uhokrinek nah danuh atere pit kiberemin adahan wis kinetihwa pavetunak.

¹⁵ Kiyavwiye Uhokri gabay pikaknek. Madikte pikagmadavu ay awahkis kabayka pimin. Wani ukagmadavu madikte aygnenevwi igkis kabay udahan.