2 Timótyu 4 - Uhokri Gahegbetawni Nukune akak Sawmus

Akkanaba Uhokri giwn takunipti muwapuw

¹ Aysawnemenek Cristo hiyapkiswa gitkis madikte hiyeg adahan neras ku pariye kibeynevwi kawih gikumadukan. Avim ini ig hiyapnek madikte hiyeg baki igkis kibeynewatma, neras ku pariye miyaravyenpu gikakkis neras ku pariye kotenene miyate. Inneki keh nah ikene pihiyekemni ku avim inin akak madikte nawaygi giwavrik Kiyavwiye Uhokri.

² Akkanaba Kiyavwiye Uhokri giwn gitkis madikte hiyeg. Misakwanaba ahegbet adahan ekkene giwn takunipti muwapuw. Akkiniba ku aysaw in ka mahikonema pit adahan pis akkin. Akkiniba hawata ku aysaw in mahiko pit adahan pis akkin. Kehnaba hiyeg kayah gitaraksankis. Akki gitaraksankis gitkis. Iki gihiyekemnikis gitkis. Avanenekwa kiyaknihwa gikakkis. Avanenekwa kannuhnigkis amin Uhokri gihiyekemni.

³ Misakwanaba ahegbet adahan ekkene inakni gihiyekemni avanenekwa kuri, mmanawa aysawnemenek hiyeg ka timepkerepni. Avim ini ignes ataybiswa arit iwit ku pariye kane ariknawnema ku pariye ba gibetkikis igkis timap. Igkis kannuhkiswa gitkis hiyeg ku pariye awna inetit ku pariye igkis muwaka timap.

⁴ Avim ini igkis mataybiswanek ariw iwit ku pariye inyewatnene. Igkis ikene gitewkis arit iwit ku pariye he inetitapnen.

⁵ Pisme, Timotyu, amawka pis avuriw pihiyekemni kabayntiwa abetnewa madikte ku pariye danuh pit. Amavanaba ku pariye mbeyne danuh pit. Mpiksawnaba adahan wagesne hiyeg gidahan Kiyavwiye Uhokri. Kehnaba madikte ku pariye ig Kiyavwiye Uhokri aya pit.

Kuri nukamaxwetnivwi nuwmepten

⁶ Nahme nah ka aymuhwa akiw adahan nah ayavap akiw. Nuhawkanavrik kuwis danuh adahan nah umahkiswe gidahan Kiyavwiye Uhokri, adahan nah tivikwiye amadgatak inin.

⁷ Nah kewa pahavwi suwtatbe ku pariye kerye kibeyne kerka gidahan gikivara kuwis. Nah kuwis keh madikte ku pariye ig Kiyavwiye Uhokri aya nutuh. Nah ka diyuhkiswa. Nah nudukwenewa kamaxwene givitit Kiyavwiye Uhokri.

⁸ Kibeyne, kuwis nutiwni ahegbet nudahan aynte inurik. Nutiwni kewa paha iyuwtibe ku pariye kis adahan kibeyne ibukti kawihni. Ig Ukivarawiy ig ka gihiyekemnisima adahan ig hiyap ba gibukvig kibeynewatma ig katiwnihgikis ku samah kis gidahankis. Ayge nikwe amaksemni hawkri ig katiwnihpenek ku samah kis nudahan. Kawki nahnenwatma ig katiwnih, heneme ig katiwnih madikte gibukvig ku pariye wahapnig akak madikte gibetkikis.

Nah pahapo, ba ayta iwasavun

⁹ Iwawhawnaba ayta iwasavun kibehtenwa.

¹⁰ Mmanawa kabahte yumahwa hiyeg ay nukakuh. Ig Demas ig kuwis miniw nuwhu. Ig pi batekte akak kabayka amadgaya inin mpiya giw Kiyavwiye Uhokri. Ig kuwis tivik avitit paytwempu Tesalônika. Igme kiyavwiye Kiresenti tivik avitit Galasiyamnaw. Igme kiyavwiye Titu aynte paytwempu Dalmaziya.

¹¹ Ignenwa kiyavwiye Luwkas ay nukakuh. Uya iwava kiyavwiye Markus ayta pihapti, mmanawa ig ik adahan ayavan akak Kiyavwiye Uhokri gannivwi ay.

¹² Ig kiyavwiye Tikiku hawata ig yuma ay. Nah kuwis awahkiswig atere pit avitit paytwempu Efesu.

¹³ Ku aysaw pis ayta, uya iwi nudahan nusimsa ku pariye nah ikise aynte avit paytwempu Trôadi giwaku kiyavwiye Karpus. Ewknaba nukagtan hawata nutuh. Nah pi muwakate ini kagta kehka puwikne amar.

Pukuhpawnaba gavit uvetunya

¹⁴ Timotyu, pukuhpawnaba gavit ner sivarivutne Alexandre. Ig ka aynsima amiyasevun gitkis hiyeg. Ka sam. Igwa Ukivarawiy hiyak gikaknek.

¹⁵ Pukuhpawnaba gavit, mmanawa ig ka aynsima suguh unetni.

Nukagmadavu ikiswen igme Uhokri ka ikisun

¹⁶ Amakohnokwa ku aysaw pitatye nah tabira givetun hiyaptigi adahan nah ekkene git ku nah ka keh mbayka, ayge yuma pahavwinema nawnamnihten. Igkis madikte ikiswen pahapo. Kiyavwiye Uhokri bayahminigkis ariw inerenek.

¹⁷ Ka sam. Igme Kiyavwiye Uhokri ka ikisun. Avim ini ig ike nawaygi adahan nah ekkene madikte ginetni ayge giwtrikkis madikte neras kane Uhokriyanvuma. Kibeyne, avim ini hawkri ig mpithevun ariw miyaka.

¹⁸ Ka sam. Kuwewanek ig Kiyavwiye Uhokri iwevun. Ayge ig mpithanek ariw madikte mbeyne amadgatak inin. Ig iwevun adahan nah kawihne gikumadukan aynte inurik. Kibeyne gidahan Kiyavwiye Uhokri. Ig ka gikiytanisima adahan avanenekwa, avanenekwa. Ameh.

Nah awahkis kabayka yimin

¹⁹ Wani kiyavuno Pirisila gikak kiyavwiye Akwila kabay nudahan. Wani kiyavwiye Onesíforu gimunyavu kabay nudahan hawata.

²⁰ Kiyavwiye Erastu misekwe aynte avit paytwempu Korintu. Nah ikise kiyavwiye Trófimu aynte avit paytwempu Miletu mmanawa ig kakahrip.

²¹ Iwawhawnaba ayta danuhpa nutuh kibehtenwa avit mwokweki. Pikagmadavu Êwbulu gikakkis Pirudenti, Linu igkis awahkis kabayka pimin. Kiyavuno Kilawdya hawata awahkis kabayka pimin payak gikakkis madikte ukebyuvwiy.

²² Timotyu, Ukivarawiy iki pawayginek. Kiyavwiye Uhokri gabay yikaknek.