2 Timótyu 3 - Uhokri Gahegbetawni Nukune akak Sawmus

Amaksemni hawkri hiyeg gihiyekemnikis mbeyevyenen

¹ Timotyu, kiyenaba ku samah nah kuwis akki pit ku aysawnemenek amaksemni hawkri ka aynsima mbeyne humawnek amadga inin.

² Avim ini hiyeg humaw mavukavye, kowtyakuvye, kawantivye. Igkis ikaw kabayte giw pahavwi. Igkis mahivwihne, igkis ka iha gigkis giwn, hawata igkis kawnata kabayhigkis. Igkis kawnata kiyatha Kiyavwiye Uhokri.

³ Igkis yuma gamnihrakis. Igkis ka miyeh gidagonikis. Igkis ba gibetkikis awna giminkis hiyeg. Igkis ka avuriw gihiyekemnikis kabayntiwatma. Igkis ka gimabyankisima. Igkis amiyha hiyeg kibeynevwi.

⁴ Igkis kinisakatya. Igkis ka garewhankisima. Igkis ikawnamahkis ke wotbe igkis hiyakemniyevwibe, heneme gihiyekemnikis manan. Igkis batek akak givitkisnen. Gikakme Kiyavwiye Uhokri igkis ka batek.

⁵ Igkis ikaw ke wotbe igkis Kiyavwiye Uhokri gihiyegavube, heneme igkis ka isaksa Kiyavwiye Uhokri Gitip gidatni wages gihiyekemnikis. Timotyu, pukuhpawnaba gavitkis gikebikis neras hiyeg.

⁶ Gaytakis neras hiyeg parak akak kinistaki givinekutkis hiyeg. Ayge igkis wageswiye tinogben ku pariye ka huwit avigkut hiyakemniki adahan egkis ihevyokis giwnkis. Noras tinogben kivunsasaw akak patahwaki. Egkis isakasaw arit ku pariye tuguh abetit guhiyekemnikis.

⁷ Egkis guvewkankis ku egkis aharit kannuhwanos amin hiyakemniki. Heneme egkis ka ik adahan kannuhwa amin Uhokri gihiyekemni ku pariye inyewatnene.

⁸ Neras kinisekevutnevwi suguhnes Uhokri gihiyekemni hawata ku samah minikwak Faraó giyamara Janes gikak Jambres igkis suguhe amekene Moís. Gihiyekemnikis mbeyevye. Igkis yuma gikamaxwankis givitit Kiyavwiye Uhokri. Igkis yumahwa Uhokri gihiyekemni ay abet gihiyekemnikis.

⁹ Heneme igkis ka hiya gisamanak Kiyavwiye Uhokri. Aysawnemenek madikte hiyeg hiyaknek ku samah igkis yuma gannukis gitivut Kiyavwiye Uhokri hawata ku samah minikwak madikte hiyeg hiyak ku samah Janes gikak Jambres yumahwata gannukis gitivut amekene Moís.

Kibeyne pis wewne gikak Uhokri hawata ke nahbe

¹⁰ Pisme ka henema, Timotyu. Kibeyne, pis ihpene nukannuhakni, pis wewne hawata ke nahbe. Ku pariye numawkan inwata pimawkan. Pis kamaxwa givitit Kiyavwiye Uhokri hawata ke nahbe. Pis hawata kiyakniye gikakkis hiyeg. Pis hawata batek gikakkis. Pis hawata kamaxwene givitit Kiyavwiye Uhokri abetnewa mbeyne.

¹¹ Pis hawata hiyapkiska mbeyne pit. Mbayka danuh pit hawata ku samah in danuh nutuh. Pis hiyak ku samah nah hiyap mbeyne ka aynsima giwakukis neras namiyhetnivwi. Pis hiyak madikte ini mbayka ku pariye danuh nutuh aynte avit paytwempu Antiyokiya, aynte avit paytwempu Ikôniyu, aynte avit paytwempu Listra. Nah hiyapkiska mbeyne ka aynsima nutuh ayge. Heneme, kibeyne, ig Kiyavwiye Uhokri wiwhpen ariw madikte.

¹² Timotyu, madikte hiyeg ku pariye wewkere akak Cristo Jesus gihiyekemni, ignes hiyapkiska mbeyne gitkisnek ay amadga inin.

¹³ Igkisme neras kinisekevutnevwi mbeyevye igkis wagehnene arimkat pi ambayte akiw. Igkis kinis ka aynsima hiyeg akiw. Igkisweke kinisekbet.

Uhokri gannasan in ukannuhtenwiy

¹⁴ Pisme amawka ku pis wagahkis pihiyekemni akak ini hiyakemniki ku pariye pis kuwis kannuhwa nimin. Amawka ku pis tiviknene akak ini hiyakemniki ku pariye pis kuwis iveg nivitit, mmanawa pis hiyakni ku egkis pinagkis ku pariye pikannuhten amin inakni hiyakemniki egkis kis adahan pis iveg guvititkis.

¹⁵ Ku samah pis bakimnite pis kannuhka amin Uhokri gannasan. Inakni Uhokri gannasan akki pit hiyakemniki ku pariye keh pis isahptaw ariw pitaraksan adahan pis danuhne git Kiyavwiye Uhokri. Mmanawa in keh pis kamaxwa givitit Cristo Jesus.

¹⁶ Madikte Uhokri gannasan pes giwntakwa Kiyavwiye Uhokri. In kawih adahan ukannuhtenwiy adahan ku pariye inyewa Uhokri gihiyekemni. Hawata in akki wotwiy utaraksanwiy. Hawata in wadithebdih uhiyekemniwiy. Hawata in akki wotwiy adahan ku samah wixwiy wew wadit.

¹⁷ Ig Kiyavwiye Uhokri ike wotwiy inakni gannasan kahadbe gihiyegavu misakwa avigkutavrik ku samah gimawkan, kahadbe igkis ahegbet adahan kehne madikte kabayka.