2 Timótyu 1 - Uhokri Gahegbetawni Nukune akak Sawmus

Nah Pol awahkis kabayka pimin

¹ Nah Pol, ku pariye Cristo Jesus giwatni, nah awahkis kabayka pimin. Kiyavwiye Uhokri kaniyven ig awahkisun adahan nah ekkene gitkis hiyeg ku samah ig ikaksa adahan wixwiy aymuhwa gimun adahan avanenekwa awaku ku samah wixwiy pahavwiwa gikak Cristo Jesus.

² Nah awahkis inin kagta pimin Timotyu. Nah batek pikak ka aynsima. Pis kewa nukamkayhbe nutuh. Wigwiy Kiyavwiye Uhokri gikak Ukivarawiy Cristo Jesus gabaykis, gamnihrakis pikaknek. Igkis kariswehse piyakninek.

³ Nah kabayha Kiyavwiye Uhokri ku pariye niguh giwohkiga, ig hawata nahawkrivwi giwohkigakis, hawata igwata nuwohkiga, ku kadahan nah kannivwiye akak madikte nabivwi. Nah kabayhig pidahan. Nah ka miyehpi aynesnima. Nah piriyepkaw pidahan takunipti.

⁴ Nah kiyepi ku samah pis tihene nuharit minikwak avim ini ku aysaw wis ibekhewbet. Nah ka aynsima hiyepkere pihivak akiw. Wake pis aybe nukakuhbe, nah batekkam nnaktin ka aynsima.

⁵ Nah kiyepi ku samah pis kamaxwa givitit Cristo Jesus avititakwa piyakni hawata ku samah patig kiyavuno Loydi egkit kamaxwa givitit Kiyavwiye Jesus payak gukak pinag kiyavuno Ewnisi. Kibeyne, nah hiyakni kabayntiwa ku pis hawata kamaxwa givitit Cristo Jesus kewa egkisbe.

Ka ba marah kinetihwa gimin Jesus

⁶ Nah hiyapni hene, nah kiyekis pit kuri adahan pis mpiksaw kawih ini Kiyavwiye Uhokri gannu ku pariye ig ike pivitit minikwak avim ini ku aysaw nah sarayhe nuwakuh pivitit nah piriyepkaw pidahan. Numawkan pis mpiksaw adahan pis pi kawihte ini gannu akiw, hawata ku samah pahavwi boboh tiket adahan eg pi kadawate akiw.

⁷ Kibokanaba. Ig Kiyavwiye Uhokri kuwis kawihkis Gitip ta uvititwiy. Ig Gitip ka keh wis avis gibohrikis hiyeg. Heneme ig iki Kiyavwiye Uhokri gidatni ta uvititwiy payak akak gamnihra akak gawaygi adahan wixwiy avuriwne uhiyekemniwiy kabayntiwa.

⁸ Nikwe ka muwaka avis kinetihwa gidahan Ukivarawiy. Kawnata avis nukakuh awaku ku samah nah ay ariku parakseket givatra Cristo. Wis hiyepne mbeyne ay awaku ku samah wis ekkene Kiyavwiye Uhokri ginetni gimin Cristo. Ka sam. Amavanaba ini mbeyne payak nukakuh. Kiyavwiye Uhokri iki pawayginek.

⁹ Ignewa keh wixwiy gihiyegavu isahptaw ariw utaraksanwiy adahan wixwiy danuhne git Kiyavwiye Uhokri. Ignewa humekwewiy gimkanit adahan wixwiy humaw gihiyegavu barewvityevwi. Kawki wabaywiyma keh ig kaniyvewiy. Heneme ig kaniyvewiy awaku ini gibetki hene. He wamnihkawiynen ig kaniyvewiy minikwak avit hawkri humaw adahan wixwiy uti madikte kabayka givitimpi Cristo Jesus.

¹⁰ Kibeyne, metakwa ini kabayka kahayak wotwiy ku avim inin. Mmanawa kuwis wamnihtenwiy Cristo Jesus danuh amadgat inin. Ig pisenwe akak miyaka nidatni. Ayteke ig utipkise wotwiy dehetniki ku pariye kane hiyapti miyaka. Ig ekkesepni gitkis madikte hiyeg abet inakni ginetni kibeyne inetit.

Nah ka mara kinetihwa gimin Jesus

¹¹ Kibeyne, ig Kiyavwiye Uhokri kaniyven adahan nah wageswa giwatni adahan nah ekkene inakni ginetni gitkis hiyeg, adahan nah gikannuhtenkis nimin.

¹² Nah ekkene inakni ginetni, nah hiyepne ini mbeyne nivatra. Ka sam. Nah ka mara nikak. Mmanawa nah iveg givitit ner ku kavitit nah kamaxwa. Nah kuwis ikaw madikte giwakuwit. Nah hiyakni ku ig ka gidatnisima adahan ig hiyekne nukakuh danuhte amaksemni hawkri.

Avuriw ku pariye Uhokri avuriwse pit

¹³ Nikwe Timotyu, ka muwaka isahkiswa ariw pannivwi adahan ekkene inakni kibeyne inetit ku kamin nah kuwis kinetihwa pit. Inakni nuwnuh humaw pikannuhten amin ku samah amawka pis kinetihwa gitkis hiyeg. Kinetihwanaba gitkis akak madikte pikamaxwan givitit Cristo Jesus, hawata akak madikte pamnihra giwntak.

¹⁴ Timotyu, amawka pis hiyak akak ini annivwit kane awaygisima, ku pariye ig Kiyavwiye Uhokri kuwis ekke piwakuwit. Ig Kiyavwiye Uhokri Gitip ku pariye ay uvitwiy, ig iki pawayginek adahan pis tiviknene nikak.

Ka aynsima Jesus gihiyegavu mara darihwak nukakuh

¹⁵ Nuvewkan pis kuwis timap nakuh ku madikte Jesus gihiyegavu ayge Asiyamnaw igkis ka ayta iwasavun akiw. Igkis avise darihwak nukakuh awaku ku samah nah ay ariku parakseket. Hawata he igwa kiyavwiye Fíjelu gikak kiyavwiye Ermójenes igkis kawnata ayta iwasavun.

¹⁶ Heneme, kibeyne, ig kiyavwiye Onesíforu ig avanenekwa ayta iwasavun adahan ikene nawaygi. Kiyavwiye Uhokri amnihginek payak gikakkis gimunyavunek. Mmanawa ig ka mara darihwak nukakuh ku samah nah ay ariku parakseket.

¹⁷ Ku aysaw ig danuhe atan avitit paytwempu Roma ig mpiksew ivegvevun muwapuw he ig utevun.

¹⁸ Amaksemni hawkri ig utinek hawata kabayka giwntak Kiyavwiye Uhokri. Ayge avit paytwempu Efesu ig hawata ayavan kabayntiwa kuwis. Pis kuwis hiyakni madikte kabayka ku pariye ig keh nukakuh. Pis hiyakni kabayte nuwhu.