2 Pedru 3 - Uhokri Gahegbetawni Nukune akak Sawmus

Uhokri ayivwihwa adahan pisenwevye akak inin hawkri

¹ Nukebyuvwi kibeynevwi, inin aveynivye kagta nah awahkis yimin. In adahan kiyekisne Uhokri gihiyekemni yit kahadbe yis tiviknene akak yihiyekemni barewbetye.

² Nah muwaka yis kiye Kiyavwiye Uhokri gawnavevu pitatyevwi giwnkis. Hawata nah muwaka yis kiye giwnkis neras Uhokri giwatnivwi yimin ku pariye kuwis ekke yit Ukivarawiy Wamnihtenwiy gikumadukan.

³ Pitatye amawka yis hiyak ku amaksemni hawkri hiyeg mahivwihkevutnevwi kahayaknek. Igkis keh ku pariye gihiyekemnikis tuguh. Avim ini igkis mahivwihpeynek.

⁴ Igkis awnanek: “Jesus ikaksa ku ig diyuh atan akiw. Kineykig nikwe? Wiguh kuwis miyarap heneme ig kote danuhte. Madikte adukwenewa ku samah akavuska hawkri.”

⁵ Inakni giwnkis ka inyewatma. Pitatye akavuska hawkri Kiyavwiye Uhokri kehe en akak waxri in humaw avit giwnnenwa.

⁶ Waxri yekwi ahakwatak un. Un misekwe aranwa. Heneme ariwnteke ini ig digisasemni madikte akiw adahan pisenwevye gihawkankis neras hiyeg minikweknenevwi avatra gitaraksankis. Igkis madikte biyuke. Neras mahivwihkevutnevwi ka kiyekere inere.

⁷ Inakniwata Kiyavwiye Uhokri giwn ku kakak en akak waxri kehpika akakwata inakni giwn akiw ig Kiyavwiye Uhokri ikakse adahan in wohe aysawnemenek. In darihka kuri adahan ku aysaw Kiyavwiye Uhokri gihawkanavrik danuh adahan ig keh hiyeg katiwnivwe avatra gitaraksankis, adahan ig ivukave hanpa arimkanit biyukwiki neras ku pariye kane wewkere gikak Kiyavwiye Uhokri.

⁸ Heneme nukebyuvwi kibeynevwi, ka ba yi miyeh ku hawkri ka ayivwi git Kiyavwiye Uhokri ku samah in ayivwad wotwiy. Pahay hawkri hehpekuye ke wotbe madikawkuvut madikawku madikwa (1.000) kamukribe git. Inme madikawkuvut madikawku madikwa kamukri git ke wotbe in pahaywowatbe hawkri.

⁹ Ig Kiyavwiye Uhokri ka mabivwihwa adahan ig keh ku samah ig awna. Gitkis gaytakis hiyeg ig mabivwihwa. Bawa kawa. Ig ayivwihwa awaku ig kamaxnete udahanwiy. Ig ka muwaka pahavwinema biyuk. Ig muwaka madikte hiyeg wages gihiyekemnikis gimkat ariw givathawnikis.

Aysawnemenek madikte hawkri wohenek

¹⁰ Heneme aysawnemenek gihawkanavrik danuh adahan ig pisenwevye akak inin hawkri. Pahaye adahan in danuh ke pahavwi amepyebe ig danuh, hiyeg ka wahapnigma. Avim ini hawkri, en mehwe akak kimanka ka ahawnasima. Madikte ku pariye amadgaya en in wohap akak tiket. Inin waxri akak madikte ku pariye amadgaya inin in mehwenek.

Misakwanabay ahegbet avit Jesus gidawnhan

¹¹ Ku wixwiy hiyakni ku madikte ini danuh hene, uyay ikaw kibeyne hiyeg nikwe. Uyay mpiksaw wew Uhokriyanbetnewa.

¹² Uyay mpiksaw aharit Kiyavwiye Uhokri gidawnhan. Uyay keh ku pariye wixwiy hiya akehka adahan kehne ig danuh kibehtenwa. Avim ini hawkri ku aysaw ig danuh, en mehwe awaku tiket, waxri pisuke awaku gawahni.

¹³ Ka sam. Wixwiy wahepne nukune en akiw nukune waxri akiw ku kiney he kabaykanen ayge, mmanawa hene Kiyavwiye Uhokri ikakse udahanwiy.

¹⁴ Nikwe nukebyuvwi kibeynevwi, ku wixwiy wahepne akebi ini hawkri, uyay misakwa ahegbet avit gidawnhan kahadbe ig patiptakawiy akak uhiyekemniwiy barewbetye yuma uvathawniwiy aynesnima.

¹⁵ Ka yi muwaka ehwa ku samah ig tinwonate. Hiyawa yis awna: “Kibeyne. Ukivarawiy kamaxnete udahanwiy.” Henewa in ku samah ukebyi kiyavwiye Pol kuwis akki yit amadgatak gikagtan ku pariye ig awahkise yimin. Ig kibeyne ukebyi. Ig ikaka ka aynsima hiyakemniki givitit.

Gaytakis hiyeg wages Pol giwn

¹⁶ Ig gibetki awna inakni hene ku aysaw ig kinetihwene amin Cristo gidawnhan. Araytak giwn mahiko adahan wis pukuhpin. Hiyeg ku pariye kane hiyak hawkri hiyeg ku pariye aynesnene gihiyekemnikis ignes wages giwn ku samah gimawkankis adahan nawenyewa hiyakemniki akiw. Igkis keh hene akak nawenyevwi Uhokri gawnevevu giwnkis hawata. Hene igkiswa ivegva gibiykemnikis.

Aymuhwanabay akak Jesus gihiyekemni ay yivit

¹⁷ Yisme nukebyuvwi kibeynevwi, yis kuwis hiyak ku samah ini gihiyekemnikis. Nikwe avuriwnabay kuri kahadbe hiyeg mbayavye ka kinisyi akak gitaraksankis. Kahadbe yis ka isahkiswa ariw ini ku samah yis tiviknene gikak Kiyavwiye Uhokri.

¹⁸ Heneme aymuhwanabay akak Ukivarawiy Wamnihtenwiy Jesus Cristo gihiyekemni ay yivit. Aymuhwanabay akak gabay ay yivit. Mpiksawnabay adahan yis wewte akak ini gihiyekemni akak ini gabay. Kibeyne gidahan Kiyavwiye Jesus ku akak inin adahan avanenekwa! Ameh!