2 Pedru 2 - Uhokri Gahegbetawni Nukune akak Sawmus

Kinisekevutnevwi awna ku ka sam wixwiy mahayakemnihwa

¹ Minikwak kinisekevutnevwi kahayak gibetkis amekenegben. Igkis ikawnamahkis Uhokri gawnevevu bawa igkis ka giwnteknema Kiyavwiye Uhokri. Hawata aysawnemenek kinisekevutnevwi parak yinavit. Igkis wagese yihiyekemninek mownye adahan mbeyevye hiyakemniki ku pariye hiyapkis ka aynsima mbeyne yitnek. Igkis isahkiswe he giw Ukivarawiynek ku pariye katiwnihe kibeyne katiwnihka adahan igkis humaw gidahan. Heneme ka adahan ayivwiyema igkis ivukepkanek hanpa arimkanit biyukwiki avatra ini gihiyekemnikis kane kabay.

² Ka aynsima hiyeg ihevye giwnkisnek ku mahayakemniki ka sam. Akak ini gimahyakemnikis igkis mbayhasanek Uhokri gihiyekemni ku pariye inyewatnene.

³ Igkis neras kinisekevutnevwi humaw batekkatruvye aharit yikakuranek. Igkis awna barewye iwit he gikehbetankisnen adahan yikinsetni kahadbe igkis dax yikakura. Ayipa minikwaknawa akebi neras ikaksepka adahan igkis biyuk giw Kiyavwiye Uhokri. Ig Kiyavwiye Uhokri ka himaknema. Ig kuwis ahegbet adahan givukeptenkis hanpa arimkanit biyukwiki adahan avanenekwa.

Hiyawa hiyeg awna ku igkis Uhokriyanvu heneme ku igkis mahayakemnihwenene igkis biyukenek

⁴ Ku yis hiyap Kiyavwiye Uhokri ka bayahmina neras ahj ku pariye tarakse giwn minikwak, igkiskata akiw neras kinisekevutnevwi? Ig sarayhe neras ahj aynte warikwi. Igkis paraksepka arikut miyokwiye ku pariye kane amisnavyesima. Ayge ig Kiyavwiye Uhokri ikiswigkis he ku aysaw gihawkanavrikkis danuh adahan igkis katiwnivwe avatra gitaraksankis. Igkiskata akiw neras kinisekevutnevwi? Igkis hawata katiwnivwenek.

⁵ Hawata akiw ku yis hiyap Kiyavwiye Uhokri kawnata bayahmina madikte hiyeg amadga hawkri minikwak, igkiskata akiw neras kinisekevutnevwi? Avim ini minikwak ig digisase madikte hiyeg amadga inin avatra ku samah igkis ka wewkere gikak. Ignewa amekene Noé ig bayahminepka gikakkis ntewnehker gikebikis hiyeg akiw. Mmanawa ig amekene Noé ekkene gitkis kibeyne hiyakemniki.

⁶ Hawata akiw ig hiyapkise mbeyne gitkis neras hiyeg mahayakemnavye ku pariye misekwenevwi avit ini paytwempu Sodoma akak Gomoha. Ig bukahavevgikis madikte he igkis misekwe hewnen. Ini kibeyne abektey adahan ku pariye danuh gitkisnek neras ku pariye kane wewkere gikak Kiyavwiye Uhokri.

⁷ Ignewa amekene Ló, ig Kiyavwiye Uhokri wiwhkiswig ayteke. Mmanawa ig amekene Ló ig kibeyne hiyeg. Ig kiyimwihwa takunipti gikakkis neras taraksavye gihiyekemnikis ku pariye mahayakemnikinen.

⁸ Ig ner awayg kibeyne ig misekwe ayge gibetkis. Takunipti ig hiyap gikehnikis ig timap ginetnikis. Ayge ig kiyimwihwa ka aynsima akak ini gikehnikis taraksaki. Ig kayah avititakwa giyakni.

⁹ Kibeynekata, ig Kiyavwiye Uhokri kannuh keh hiyeg kibeynevwi isahptaw ariw kiyimwiki. Nerasme ku pariye kane kibeynevwima, ig kannuh misakgikis abet mbeyne he ku aysaw gihawkanavrikkis danuh adahan igkis katiwivwe avatra gitaraksankis.

Kinisekevutnevwi ka kiyatha ariknawnema

¹⁰ Neras ku pariye wewnevwi akak hiyakemniki amadgaya inin, neras ku pariye miyarhewnevwi aharit batekka patehwevye, neras ku pariye kane ihpekere giwnkis giwewkistenkis, ignes utipte mbeynenek. Ay amadga inin igkis ka aynsima gibokakkis. Igkis ka timepkere hiyeg iki gihiyekemnikis. He wavityempu gikivarakis igkis ka avis mahivwih.

¹¹ Ignesme ahj ku pariye ka aynsima datte, awaygte giwkis neras kinisekevutnevwi, igkis ka mahivwih wavityempu gikivarakis ay givetun Kiyavwiye Uhokri. Igkis tuwatasaw adahan igkis ka miyatigkis.

¹² Nerasme kinisekevutnevwi ka hiyak hawkri. Igkis mahivwih ku pariye igkis kane hiyak. Igkis kewa puwiknebe ku pariye wayvuka adahanikwa igkis kamaxka, adahanikwa igkis umahka. Igkis wew akak puwikne gihiyekemnikis he igkis umahka hawata ke puwiknebe.

Kinisekevutnevwi he mbeyhenen yihiyekemni

¹³ Ku samah igkis keh mbayka, inwata mbayka hiyapkiska gitkisnek. Igkis puwvuhwene mataytak. Igkis he patehpenen yihiyekemni. Igkis he mbeyhenen yihiyekemni. Igkis ax payak yikak ku kiney yivahdukawni ke wotbe igkis Jesus gihiyegavube. Bawa amun ini igkis batekyes akak hiyakemniki ku pariye mbeyevyenen.

¹⁴ Giwtyakkis he ivegnema aharit tino. Igkis ka ehwa akak gimahyakemnikis. Igkis kinista hiyeg ku pariye aynesa gihiyekemnikis he ignesme iha giwnkis. Igkis ka gannukisima kinista hiyeg aharit gewkanbetkis. Ka sam. Aysawnemenek igkis hiyap mbeyne avatra ini gimahyakemnikis.

¹⁵ Igkis kuwis miniw ariw ini ahin ku pariye inyewatnene. Kuri igkis he wewnamah. Igkis wewnes avigku gihina amekene Balawh ku pariye amekene Beor gikamkayh. Ig ner batekte dax karukri ariw ig batek keh Kiyavwiye Uhokri gibetki.

¹⁶ Heneme ig himehpika avatra ini gitaraksan gavit pahavwi puwikne. Ku aysaw givig kaway awna git giwnavrikkis hiyeg, ig bukihe gikivara Balawh givuwvumni ayge.

¹⁷ Neras kinisekevutnevwi gihiyekemnikis he waditnevyenen yuma kabayka nibet. Ini gihiyekemnikis ke parewnibe ku pariye yumanene un avigku. Gihiyekemnikis atekekbetwiye ke ukuhnebe urebdi abet mayg. Kiyavwiye Uhokri kuwis ahegbete iwetrit gidahankis abet amisnavye mitibnene.

¹⁸ Igkis kinetihwa ke wotbe giwnkis kibeynewa iwitbe heneme in waditnevyenen. Ku igkis hiyap pahavwi ku pariye me pesemet abetitak gitaraksan, igkis hiyapni hene, igkis kinistig adahan ig diyuh arimkat mahayakemniki akiw.

¹⁹ Igkis awna git: — Hiyawa pis keh ku samah pimawkan. Yuma hiyeg kumaduka pihiyekemni. Bawa igkisnewa gihiyekemnikis kumadukaka avit ini mahaykemniki. Mmanawa ku pariye wis isaksaw arit innewa kumadukaw.

Pewru diyuh amin gihikakni

²⁰ Ku hiyeg kuwis hiyak Ukivarawiy Wamnihtenwiy Jesus Cristo kabayntiwa, ku igkis kuwis isahptaw ariw givathawnikis amadgaya inin, heneme ku igkiswa wanakminaw nikak akiw, ku igkis isaksew nit akiw, nikwe giwskawnikis pi mbayte ariw pitatye akiw.

²¹ Kiskama igkis ka hiyakkam Uhokri gihiyekemni ku pariye kibeynewatnen mpinekata igkis hiyakni heneme igkis miniw niw. Ku igkis miniw ariw Uhokri gihiyekemni ku pariye kuwis ekkepka gitkis adahan igkis diyuhe amin gihiyekemnikis minikweknene,

²² ay pahat iwit patuwesbunka ku pariye kawih gidahankis. In awna: “Pewru hikak. Ayteke ig diyuh amin gihikakni, ig axwin akiw. Pakir sukuhptepka. Ayteke ig diyuh abetit ibug akiw adahan ig guguhptaw abet akiw.” Nikwe hawata neras ku pariye diyuhpiye butte giw Kiyavwiye Uhokri.