2 Pedru 1 - Uhokri Gahegbetawni Nukune akak Sawmus

Nah Pedru awahkis kabayka yimin

¹ Nah Simawh Pedru, ku pariye gibuk Jesus Cristo, nah ku pariye giwatni, nah awahkis kabayka yimin, yis ku pariye kamaxwenevwi givitit Kiyavwiye Uhokri hawata ke usuhbe. Kibeyne, wixwiy kamaxwene givitit Uwohkigawiy Wamnihtenwiy Jesus Cristo adahan ig keh wixwiy humaw kewa kibeynevwibe giwtrik Kiyavwiye Uhokri. Ini ukamaxwanwiy in ka aynsima kabayka udahanwiy.

² Kiyavwiye Uhokri gabay yikaknek. Ig kariswehse yiyakninek. Yis darihwak gikaknek kabayntiwa. Mmanawa ku samah wixwiy darihwekte gikak Kiyavwiye Uhokri gikak Ukivarawiy Jesus, amun ini wixwiy hiyapte ini gabay akak ini karisahwaki.

Uhokri iki wotwiy kibeynewa kabayka

³ Ig Kiyavwiye Uhokri ka gidatnisima adahan ig iki uvititwiy madikte ku pariye muwekne wotwiy adahan wixwiy wew Uhokriyanbetnewa. Ig ikepni uvititwiy abetimpi ku samah wixwiy darihwekne gikak. Mmanawa ig kuwis humekwewiy gimkat adahan wixwiy uti gikiytani akak gabay.

⁴ Awaku ini gabay ig ikaksa ka aynsima kabayka udahanwiy. In kibeynewa kabayka. Mmanawa awaku ini gabay ig kawihkis gidahanwa gihiyekemni uvititwiy. Hawata ig keh wixwiy isahptaw ariw madikte ini patahwaki ku pariye hiyeg gimirihwankis ay amadga inin.

Amawka wixwiy tiviknene kannuhewnene

⁵ Ku wixwiy muwaka ini kabayka, amawka ku wixwiy mpiksaw niharit. Amawka wixwiy tiviknene kannuhewnene. Ku samah wixwiy kuwis kamaxwa givitit Kiyavwiye Uhokri, kurime amawka ku wixwiy kannuhwa keh kabayka. Ayteke nikwe amawka ku wixwiy kannuhwa pukuhpa Uhokri gihiyekemni.

⁶ Ayteke nikwe amawka ku wixwiy kannuhwa avuriw uhiyekemniwiy kabayntiwa. Ayteke nikwe amawka ku wixwiy kannuhwa kiyaknihwa abetnewa mbeyne. Ayteke nikwe amawka ku wixwiy kannuhwa darihwak gikak Kiyavwiye Uhokri.

⁷ Ayteke nikwe amawka ku wixwiy kannuhwa batek gikakkis uyakiwiy hiyeg ke wotbe wixwiyweke pakebyeknebe guwntak pahavuwa inagtibe. Ayteke nikwe amawka ku wixwiy kannuhwa amnihgikis.

⁸ Ku wixwiy kannuh kawih madikte inakni hiyakemniki kabayntiwa, nikwe ka waditnevyenenma wixwiy darihwak gikak Ukivarawiy Jesus Cristo. Nikwe hiyawa wixwiy tiviknene han pitatit adahan wixwiy ka aynsima kehte gibetki akiw.

⁹ Heneme ku pahavwi ka kawihminaw akak inakni hiyakemniki, ig kewa pahavwi motviyebe, mmanawa gihiyekemni manan. Ig kuwis miyehe ku samah Kiyavwiye Uhokri barewbethe gihiyekemni ariw givathawni adahan ig iwene nukunewa gihiyekemni akiw.

Mpiksawnay ikaw Uhokriyanbetnewa

¹⁰ Nukebyuvwi, ig Kiyavwiye Uhokri humekwewiy gimkat. Wixwiy gikanyanvu. Nikwe uyay mpiksaw ikaw Uhokriyanbetnewa. Ku wixwiy keh hene, nikwe wixwiy ka miniwti giw Kiyavwiye Uhokri.

¹¹ Ayteke nikwe aysawnemenek wixwiy patiptakaka akak batekka aynte inurik adahan wixwiy parak arikut gikumadukan Ukivarawiy Wamnihtenwiy Jesus Cristo adahan wixwiy misakwa gimun adahan avanenekwa.

¹² Nah hiyakni ku yis kuwis hiyak Uhokri gihiyekemni, yis kuwis wewne nikak. Heneme nah ahegbet adahan kiyekisni yit avanenekwa.

¹³ Nutuh in wadit adahan nah keh hene ku samah nayivwi ay amadga inin adahan yis avanenekwa kiyenenekwa gihiyekemni.

¹⁴ Nah hiyakni ku kennesa adahan numiremni mmanawa Ukivarawiy Jesus Cristo kuwis akkin nutuh.

¹⁵ Inneki keh nah mpiksewne adahan yis avanenekwa kiye ini gihiyekemni ewka nuwenuh.

Nah kuwis hiyap Jesus kahayaksa gikiytani kabutenne ay givit

¹⁶ Inakni unetni yit in ka gikehbetankisma hiyeg amadgayavu inin. In inyewa ku pariye usuh kinetihwa yit gimin Ukivarawiy Jesus Cristo ku ig ka gidatnisima ig nehmnikuhpiye. Mmanawa kuwis usuh hiyap gikiytani akakwa wowtyak.

¹⁷ Usuh ayge avim ini ku aysaw Wigwiy Kiyavwiye Uhokri kahayakse gikiytani kabutenne ay givit Kiyavwiye Jesus. Usuh timap Kiyavwiye Uhokri gikuvimna ku aysaw ig awna abetitak ini amuwkarad kane amuwyisima. Ig awna: — Ner nukamkayh nubetki. Ig keh nah batek ka aynsima.

¹⁸ Usuhwa timap inakni gawnan inuriktak minikwak ku aysaw usuh ayge gikak Kiyavwiye Jesus avit ini waxri imuwadnene ku kiney Kiyavwiye Uhokri hiyapkise gikiytani wotuh.

Uhokri gawnevevu giwnkis inyewa

¹⁹ Innebaki areketni wotuh huwewehe ku Uhokri gawnevevu pitatyevwi ginetnikis in inyewa. Ku yis ikatuswa arit inakni ginetnikis, yis uti kabaykanek. Giwnkis kewa pohow abukribe ku pariye kabutennene abet amisnavye he in hewke akiw ku aysaw duwviki kahayak. Mmanawa giwnkis uguh uhiyekemniwiy he ku aysaw Jesus Cristo kahayak.

²⁰ Inakni giwnkis ay amadga Uhokri gannasan heneme amawka wixwiy hiyakni ku ka hiya wisma pukuhpa inakni giwnkis wownteknewa. Amawka igwa Kiyavwiye Uhokri Gitip akkamnihni wot.

²¹ Mmanawa igkis Uhokri gawnevevu ka awna pahatnema iwit giwntekneswatma. Heneme igwa Kiyavwiye Uhokri Gitip keh igkis awna iwit ku pariye pes giwntak Kiyavwiye Uhokri.