2 Koríntyus 9 - Uhokri Gahegbetawni Nukune akak Sawmus

Titukis yayavetni adahan ahiwne ini yikan

¹ Nah hiyakni ku yis ka muwaka adahan nah mpiksaptihyi kakanhaw gitkis neras ukebyuvwiy madiptavye.

² Mmanawa yis kuwis ahegbete yihiyekemni yiwnteknewa adahan kakanhewne gitkis. Inneki keh nah kuwis ekke gitkis ukebyuvwiy aynte Masedôniyamnaw ku yis ka yabayisima. Nah awna gitkis: “Ukebyuvwiy aynte Gresiyamnaw kuwis ahegbete ginetnikis ku samah kamukri mpiyatinene adahan igkis amnihne ukebyuvwiy madiptavye.” Igkis timapni hene, igkis hawata amnihkerevgikis hawata ke yisbe.

³ Kuri nah awahkisne Titukis yimin adahan yayavetni atere kahadbe yis inyewa ahegbetaw ku samah nah kuwis kinetihwe yimin. Nah ka muwaka nuwnuh humaw he kinisakanen.

⁴ Mmanawa wake gaytakkis ukebyuvwiy Masedôniyenevwi atakbe atere nuhapti kuri, igkis danuhbe atere igkis utevyibe yis kote ahegbete, in humawkam marakinenwa udahan ka aynsima, ku samah uvewkan usuh iki ku yis ahegbetnekam. Ka usuhnenwatma marekevye uvituhkam, heneme yis hawata.

⁵ Inneki keh nah aya git kiyavwiye Titu gikakkis ukebyuvwiy adahan igkiskit atak atere yit pitati navituh. Igkis yayavetni ayge adahan ahiwne ini yikan ku pariye yis kuwis ikakse adahan yis iki. Ayge nikwe madikte misakwanek ahegbet avit nudawnhan atere. Ku yis ahegbet kuwis, nikwe in humaw areketni ku yis ka mpiksaptihkama, yis kakanhewne yiwnteknewa avititakwa yiyakni.

Kakanhawnay ka aynsima akak madikte yibetki

⁶ Hawata akiw numawkan yis kakanhaw ka aynsima kabayka marihwa aysawnemenek yis darih ka aynsima kabayka. Ku pahavwi wasevutne mutuh he aynesanen gamutra, aysawnemenek ig kadahan aynesawa. Heneme ku ig mutuh ka aynsima gamutra, kuwewanek han pitatit ig kadahan ka aynsimanek. Nikwe uyay keh ka aynsima kabayka gidahankis hiyeg.

⁷ Kakanhawnay avititakwa yiyakni. Ka yi muwaka kakanhaw akakma yimaviswan. Ka yi muwaka awna: “Nah ka kakanhawkere, heneme nahnewa kakanhaw.” Ig Uhokri ka batek akak inakni hiyakemniki. Heneme ku pahavwi iki akak madikte gibetki, innebaki keh ig Uhokri batek gikak.

⁸ Mmanawa ig Uhokri igisye adahan ig iki wotwiy mpiy ku samah umawkanitnenewiy marihwa wixwiy kadahan madikte ku pariye umawkanitnenewiy, wixwiy kadahan hawata adahan kehne kabayka nikak.

⁹ Mmanawa in Uhokri gannasan awna: — Ig kakanhaw gitkis madiptavye akak madikte gamnihra. Ini gabay kiyekanek adahan avanenekwa.

¹⁰ Ku pariye amutri pahavwi wasevutne mutuh in humaw adahan gaxni in humaw adahan gamuthan akiw. Ignewa Uhokri keh in humaw git. Hawata ig keh yidahanek. Ku yis keh kabayka akak madikte yamnihra, ig keh yis kadahanek madikte ku pariye yimawkanitnene. Hawata akiw ig keh yis kadahanek adahan yis kakanhewne ka aynsima kiyeste akiw gitkis hiyeg adahan yis kehne kabayka kiyeste akiw.

¹¹ Avim ini ig keh yis kadahanek ka aynsima kahadbe ik adahan yis kakanhewne ka aynsima gitkis hiyeg. Ayteke nikwe ku aysaw usuh ewkne ini yikan gitkis hiyeg, igkisme hiyapni hene, igkis kabayha Uhokri ka aynsimanek.

¹² Nikwe ini yikan pes adahan pivutnam kabayka. Pahat kabayka pes gidahankis neras ukebyuvwiy madiptavye awaku ku samah yis amnihpigkis. Pahatme kabayka pes gidahan Uhokri ku samah igkis kabayha giw adahan ini yamnihra.

¹³ Ini yamnihra humaw areketni gitkisnek ku yis inyewa wewne akak Cristo gihiyekemni. Ayge nikwe igkis kabayha Uhokri yidahanek awaku ku samah yis wewne ku samah giwn awna. Hawata akiw igkis kabayhig awaku yamnihra gitkis, gitkis nawenyevwi hiyeg akiw.

¹⁴ Ayteke nikwe igkis piriyepkaw yidahanek akak madikte gibetkikis awaku ku samah yis kahayakse Uhokri gamnihra gitkis hene.

¹⁵ Kibeyne gidahan Uhokri. Ini gamnihra keh ig kakanhaw nernewa gikamkayh wotwiy. Yuma hiyeg kakankewne hene akiw. Ka ik adahan wis kinetihwa nimin akak iwit.