2 Koríntyus 8 - Uhokri Gahegbetawni Nukune akak Sawmus

Amnihnay ukebyuvwiy Jesus gihiyegavu akak madikte yibetki

¹ Kuri nukebyuvwi, usuh ekkene yit giminkis Jesus gihiyegavu aynte Masedôniyamnaw ku samah igkis wewnene akak Uhokri gamnihra.

² Igkis hiyepnes mbeyne ka aynsima, heneme igkis gidukweneswa batek ginaktinkis. Igkis madiptavye. Igkis misakwa henen barewok, yuma ariknawnema gidahankis, heneme akak inere igkis ka aynsima amnihkerete hiyeg akiw. Inneki keh igkis pasuhpa hiyeg akak madikte gibetkikis.

³ Henewa nukebyuvwi. Igkis ka kakanhaw gitkis hiyeg ariwnteknenwatma gikakurakis asemne. Heneme igkis kakanhaw gitkis mpiy gidatnikis.

⁴ Giwntekneswa igkis mpiksaptih usuh isaksigkis adahan igkis hawata ayava neras ukebyuvwiy Jesus gihiyegavu madiptavye.

⁵ Ayteke igkis ike mpiy ku pariye uvewkan. Mmanawa ka ininewatma gikankis igkis iki, heneme igkis ike givitkis hawata git Ukivarawiy. Pitatye igkis ikaw gitkit Uhokri adahan igkis ihpene giwn. Ayteke butte adahan igkis ihpene wownuh hawata ku samah Uhokri gimawkan.

⁶ Usuh hiyapni hene ku samah igkis masedôniyenevwi igkis ba gamnihrakis hene, usuh aye git kiyavwiye Titu adahan ig diyuh atere yit akiw. Minikwak ig atiwkekne ayge yibet adahan ahiwne yikan gitkis ukebyuvwiy madiptavye. Kuri nikwe usuh aya git adahan ig pisenwehe ini yikehni kabayka adahan yis hawata wewne akakwata Uhokri gamnihra.

⁷ Yis kuwis kannuh keh ka aynsima kabayka. Yis kannuh kamaxwa givitit Uhokri. Yis kannuh akka giwn kabayntiwa. Yis pukuha gihiyekemni. Yis mpiksaw adahan yis kehne Uhokri gibetki. Yis ka yabayisima ukakuh. Inneki keh usuh aya yit adahan yis hawata kannuhwa keh ini kabayka adahan yis amnihne ukebyuvwiy madiptavye.

⁸ Nah ka mpiksaptihyi adahan yis keh ini kabayka, heneme ku samah nah hiyap nawenyevwi hiyeg igkis kehne kabayka gikakkis hiyeg hene, numawkan yis hawata. Ku yis keh hene, in humaw areketni ku yis inyewa wewne akak Uhokri gamnihra.

Jesus madiptiswe udahanwiy

⁹ Mmanawa yis kuwis hiyak ku pariye kabayka Ukivarawiy Jesus Cristo keh udahanwiy ku samah ig amnihwiy. Ig igisye gimun gig, heneme ig madiptiswe udahanwiy kahadbe wixwiyme humaw igisavye akak kabayka awaku ku samah ig madiptiswe udahanwiy.

Uyay kakanhaw madikte ku pariye yis hiya asamanak

¹⁰ Kuri nikwe nah ikene yihiyekemni. In kabayte yidahan adahan yis pisenwe yikehni ini kabayka ku pariye yis kavusaw keh kamukri mpiyatinene. Mmanawa yiskit kavusaw ahiw yikan gidahankis madiptavye. Yiskit amnihkerevgikis avit nawenyevwi hiyeg amnihkerevgikis.

¹¹ Nikwe uyay pisenwehpin pisenwate. Ku samah yis amnihkerevgikis avititak yiyakni, uyay pisenwehpin avititak yiyakni hawata. Ikinay madikte ku pariye yis hiya asamanak.

¹² Mmanawa ku wis kakanhaw avititak uyakni, innebaki keh Uhokri batek. Ku in ka kiyasradima, ka sam. Ig he muwaka wis iki madikte ku pariye wis hiya asamanak. Ig ka aya wot mpiynevevyema ku pariye wis ka hiya nisamanak.

¹³ Ig ka muwaka yis misakwa barewok. Ig ka muwaka igkis kadahante yiw. Heneme ig muwaka yis kadahanyekuye hehpekuye.

¹⁴ Ku avim inin yis kadahan ka aynsima ariknebdi. Nikwe uyay kakanhaw niwntak gitkis neras ku pariye yumanene gidahankis. Mmanawa aysawnemenek ku aysaw yis yuma yidahanek igkisme iki yitnek ariwntak gidahankis. Ayge nikwe yis kadahanyekuye hehpekuye.

¹⁵ Henewa in ku samah Uhokri gannasan awna. In awna: — Ku pariye uti ka aynsima, gidahan ka darihwa. Igme ku pariye uti aynesawa, ig ka muwak git.

Nah awahkis Titu yimin

¹⁶ Kibeyne gidahan Uhokri. Ig keh kiyavwiye Titu ayavakerevyi hawata ku samah usuh ayavakerevyi.

¹⁷ Ku aysaw usuh aye git adahan ig diyuh atere adahan yayavetni akiw, ig ihe wownuh akak madikte gibetki. Mmanawa kuwis ig ahegbete ginetni giwnteknewa adahan ig atak atere akiw. Mmanawa ig mpiksaw adahan ig yayavetni.

¹⁸ Kuri ig tivikwiye yimkat akiw. Usuh awahkisne pahavwi ukebyi gihapti ku pariye kiyathaka gavitkis madikte Jesus gihiyegavu awaku ku samah ig akka Uhokri ginetni kabayntiwa.

¹⁹ Igi ukebyi ig kaniykawa gavitkis ukebyuvwiy adahan ig atekne uhapti adahan ewkne kakanhawka gitkis ukebyuvwiy madiptavye. Ig kaniyvika adahan wayavetni abet inin annivwit adahan amnihka, marihwa Uhokri kiyathaka, hawata kahadbe igkis hiyakni ku usuh kehkere kabayka gidahankis.

²⁰ Usuh iwevgi uhapti marihwa yuma pahavwinema hiyeg pukuhpewne ubohri ku samah usuh tivikwiye hiyuhwe akak ini gikankis kibeynewatnen kakanhawka.

²¹ Mmanawa usuh kehkere ku pariye waditnene giwtrikkis madikte hiyeg hawata ku samah usuh kuwis keh giwtrik Uhokri.

²² Hawata usuh awahkisne pahavwi ukebyi yimin akiw gihaptikis kiyavwiye Titu. Usuh hiyakgi kabayntiwa ku ig kibeyne hiyeg. Ig avanenekwa ahegbet kannivwikere gidahan Uhokri. Ku samah ig time yak, ig iveg yivitit. In keh ig ka aynsima kannivwikerete gidahan Uhokri atere yibetit akiw.

²³ Nah awahkis kiyavwiye Titu yimin pitatye adahan nuwenyan, mmanawa ig nudahewekten hawata ig kannivwiye payak nukakuh adahan yayavetni. Igkisme neras ku pariye ateknevwi gihapti, igkis awahkiska giwenyankis Jesus gihiyegavu ku pariye hawata kakanhewnes gitkis ukebyuvwiy madiptavye. Igkis avanenekwa ikaw Uhokriyanbetnewa, hene igkis kiyathasa Cristo ka aynsima.

²⁴ Amavanigkisbay akak madikte kabayka kahadbe neras Jesus gihiyegavu ku pariye gawahkistenkis atere igkis hiyapni hene, igkis hiyakni ku yis ka yabayisima ku samah nah kuwis akki gitkis.