2 Koríntyus 6 - Uhokri Gahegbetawni Nukune akak Sawmus

¹ Hawata akiw usuh ku pariye kannivwiye hene gidahan Uhokri, usuh aya gitkis hiyeg adahan igkis ka iki inakni unetni ku in he waditnevyenen. Adahan igkis amava kabayntiwa ini kabayka ku pariye Uhokri kehe gidahankis he gamnihkakkisnenwa.

² Mmanawa igwa Uhokri awna inakni inetit amadgatak gannasan. Giwn: — Ku avim inin nah muwaka adahan yamnihten. Nah ahegbet adahan timepne yiwn ku samah yis amnihswene nutuh. Nikwe usuh awna gitkis hiyeg: — Kibeyne. Ig Uhokri ahegbet adahan wamnihtenwiy. Uyay ka muwaka waha. Uyay amnihswa git kurinewa avim inin. Hene wownuh gitkis.

Usuh ikewkere Uhokriyanbetnewa abetnewa mbeyne

³ Ku samah usuh ekkene inakni Uhokri giwn gitkis hiyeg hene, usuh mpiksaw adahan usuh ka taraksa aynesnima, mmanawa usuh ka kehkere hiyeg awna ku Uhokri giwn ku in ka kabay.

⁴ Usuh he kehkere ku pariye akka ku usuh igyewa Uhokri giwatnivwi. Nikwe usuh kiyaknihwenene avanenekwa abetnewa mbeyne, abetnewa kiyimwiki, abetnewa madiptiki, abetnewa kadniki.

⁵ Hiyawa usuh biptepka, hiyawa usuh sarayhpika arikut parakseket, hiyawa hiyeg kivuhwe madikte uvitit, usuh kannivanene, usuh ka mayak, usuh ka ax, heneme adukwenewa usuh ikewkere Uhokriyanbetnewa giwatnivwi.

⁶ Usuh ka daxtasewkere arit patahwaki. Usuh hiyekere Uhokrinenwa gihiyekemni. Usuh kiyaknihwekere gikakkis madikte hiyeg. Usuh amnihkerevgikis. Usuh gitiphewkere Uhokri barewvitye. Usuh batekere gikakkis hiyeg avititakwa uyakni.

⁷ Usuh ekkekere gitkis ininewa iwit ku pariye inyewatnene. Usuh ekkekere gitkis Uhokri gidatni. Usuh wewkere akak kibeyne hiyakemniki. Ini humaw ke uyakwokbe adahan umaptenten giwkis uvetunyavu hawata adahan wanekbetene uvetunyavu gihawkankis.

Ka sam wotuh ku pariye iwit hiyeg awna uminuh

⁸ Ka sam wotuh ku usuh kiyathaka. Ine kawnata sam wotuh ku usuh miyathaka. Ka sam wotuh ku hiyeg pataha wowhu. Ine kawnata sam wotuh ku hiyeg kabayha wowhu. Hiyeg iki ku usuh kinisekevutnevwi, bawa usuh awna iwit ku pariye inyewatnene.

⁹ Hiyeg iki ku usuh ka ariknawnema ay, bawa usuh hiyakan muwapuw. Igkis iki ku usuh abet miyaka, bawa usuh udukwenewa tabirnene. Hiyeg hiyapkisne ka aynsima mbeyne wotuh, heneme ka hiya igkisma pisenwa ukakuh.

¹⁰ Inpawa usuh abet kadniki, heneme usuh avanenekwa bateknenekwa unaktin. Usuh madiptavye, heneme usuh igisenene hiyeg ka aynsima akak Uhokri Gitip gihiyekemni. Usuh yuma ariknawnema ay umunuh, heneme usuh kadahan madikte kabayka inyewatnene ay umunuh.

Uyay ka isaksa ariknawnema adahan in mpithawiy pawtak

¹¹ Nukebyuvwi korintuyenevwi, usuh ekkene yit madikte ku pariye ay avit uyakni. Usuh ka ayam aynesnima yiw.

¹² Ku pariye arikna mpithawiy pawtak in ka nuwnteknema. In ayteke yiwntak. Yis pukuhpaw nubohri yuma kavatrenesima.

¹³ Nukebyuvwi, nah awna yikak ke wotbe yis nukamkayuvwibe. Nah aya yit ka yi muwaka isaksa ariknawnema mpithawiy pawtak. Uyay ihpa nuwnuh akiw. Bateknay ukakuh hawata ku samah usuh batek yikak.

Waditka ka kis akak taraksaki

¹⁴ Nukebyuvwi, ka yi muwaka darihwak gikakkis hiyeg ku pariye kane ihpenevwima Uhokri giwn. Mmanawa waditka ka kis akak taraksaki. Kabutniki ka amava misanpiki nibetit.

¹⁵ Ig Cristo ka pasamrak gikak wavitye gikivarakis. Ihpenevwi ka kis gikakkis kane ihpenevwima.

¹⁶ In ka tuguhti abet uhiyekemni adahan wis paraksa ahehpakti batakkarad arikut Uhokri Givin, mmanawa in ka atak nikak. Uwohkigawiy dehetniye. Wixwiynewa ku pariye humaw givin. Henewa in ku samah Uhokri gannasan awna. In awna: — Aysawnemenek nah kavinwene ay givitkisnek hiyeg. Nah misakwanek ay gimunkisnek. Avim ini nah humawnek giwohkigakis. Igkisme humawnek nuhiyegavu.

¹⁷ Inneki keh ig Uhokri awna: — Higihwanay giwkis. Ka yi muwaka darihwak gikakkis aynesnima. Ka yi muwaka daxtasaw akak givathawnikis. Ku yis ka keh hene, nikwe nah amavaynek kabayntiwa.

¹⁸ Nah humawnek yig, yisme humawnek nukamkayuvwi. Henewatbaki ig Ukivarawiy detye awna.