2 Koríntyus 4 - Uhokri Gahegbetawni Nukune akak Sawmus

Usuh akka Uhokri giwn yuma kinisaka nibet

¹ Usuh hiyapni hene, usuh ka miniw ariw ini annivwit ku pariye ig Uhokri ike wotuh he wamnihkanen adahan usuhme ekkene inakni ginetni gitkis hiyeg.

² Bawa usuh ka akkin adahan gikinsetnikisma ku samah yaytak ayge awna uminuh. Usuh kuwis tukuhwe ariw madikte ini mbayka ku pariye hiyeg he ayamkanen nikak. Usuh ka keh ariknawnema ku pariye adahan maraki. Usuh ka kehbeta amin Uhokri giwn adahanma usuh aharitnema udahanwatma arikna nikak. Kawa. Usuh ekkene Uhokri giwn inyewatnene yuma kinisaka nibet. Usuh akkin giwtriknewa Uhokri. Akaknewa ini usuh hiyakkiswa gitkis madikte hiyeg ku usuh ka kinisekevutnevwima.

³ Ku inakni unetni ka pukuhpaka, in ka pukuhpaka gavitkis neras ku pariye avigkunene ahin adahan biyukwiki.

⁴ Ig Satanas, ig inin hawkri akivara, ig hiya asabkak gihiyekemnikis awaku igkis ka ihpekere inakni wownuh. Inneki keh inakni unetni ka paduk abetit gihiyekemnikis. Ayge nikwe igkis ka hiyap gikiytani Cristo ku pariye kahayaksa wotwiy igyewa Uhokri ay amadga inin.

⁵ Mmanawa usuh ka kinetihwa uminuhma, usuh kinetihwene gimin Jesus Cristo ku samah ignewa Ukivarawiy. Usuhme he yibuknenwa ku samah ig Ukivarawiy Jesus awahkise usuh yimin adahan kehne kabayka yidahan.

⁶ Minikwak inin hawkri he amisnavyenen. Heneme ig uguhpin akak giwnenwa. Ig awna: “Kabutniki humaw abet inin amisnavye.” Igwata Uhokri ku akak inin uguhne uhiyekemniwiy. Ig keh wixwiy hiyap gikiytani ku pariye kabutenene ay gihepkamadga Cristo.

Usuh ka ariknawnema heneme Uhokri iki wawaygi abetnewa mbeyne

⁷ Usuh ka ariknawnema. Inme gikiytani in ka awaygisima. In kewa igiskabe. Usuhme humaw ke ini igiska avinbe. Heneme usuh eme ke ibugbe batakka in ka dep bak. Ayge nikwe in huwewe ku ini wannu kane nidatnisima in ka wownteknema, heneme in giwntekne Uhokri.

⁸ Usuh abet mbeyne ka aynsima, heneme in ka mataka uhiyekemni. Ka aynsima mbayka aharit umetkepten, heneme usuh ka tuguhkis wawaygi.

⁹ Ka aynsima hiyeg hiyapkisne mbeyne wotuh, bawa usuh ka ikiska giwakukisma. Nawene usuh kaba hahwa, heneme usuh kannikaw akiw usuh tiviknene. Wake ka ignema Uhokri, usuh hahwakam.

Usuh abet miyaka kahadbe Jesus gidehetni kahayak yit

¹⁰ Usuh ka kavigsa uvituh, usuh ahegbet adahan umahkiswa hawata ke Kiyavwiye Jesusbe kahadbe gidehetni kahayak ay uvituh.

¹¹ Ig kuwis ike gidehetni uvitit, heneme ku samah wowskawni ay amadga inin usuh avanenekwa abet miyaka awaku ku samah usuh kinetihwene gimin Kiyavwiye Jesus. Ka sam. Amun ini ig Kiyavwiye Jesus gidehetni kahayak ay uvituh.

¹² Inin ku samah usuh abet miyaka in keh yisme uti yidehetni gimun Uhokri.

¹³ Ka sam usuh abet miyaka. Usuh udukwenewa ukamaxwan givitit Uhokri hawata ke ner awaygbe ku pariye tamak Uhokri giwn amadga kagta minikwak. Ku kiney ig awna: — Nah iha Uhokri giwn ku in inyewa. Inneki keh nah akkin. Usuh hawata akka Uhokri giwn awaku ku samah usuh ihpin ku in inyewa.

¹⁴ Usuh ihpin, mmanawa kuwis ig kannikase Kiyavwiye Jesus ariw gimiremni. Usuh hiyakni ku aysawnemenek ig kannikasanek usuh ariw umiremni hawata, awaku ku samah usuh pahavwiwa gikak Kiyavwiye Jesus. Ayge nikwe ig kehnek usuh hiyap gikiytani payak yikak.

¹⁵ Usuh hiyepne ini mbeyne madikte yidahan. Umawkan yis madikte amava gamnihra. Mmanawa ku kibite hiyeg amevene Uhokri gamnihra, amun ini nikwe kibite hiyeg kibeyhene Uhokri giw, ayge nikwe ig kiyathakante akiw.

Mbayka ka dahwa inme kabayka dahwa

¹⁶ Inneki keh usuh ka miniw ariw inin ku samah usuh kinetihwene gimin Kiyavwiye Jesus. Hiyawa uvituh hawka tiviknene mugumgunene, heneme utivuh hawka nukunehwenene akiw.

¹⁷ Mmanawa ini ku pariye mbeyne wixwiy hiyap ay amadga inin, kuwewanek ka ayivwadima in mpiyenek. In ka ariknawnema. Heneme in utipkis wotwiy ka aynsima kabayka ku pariye dahwanek adahan avanenekwa ku pariye kibeynewatnene kabayka. Ini kabayka ka aynsima kiyeste ariw ini mbayka.

¹⁸ Nikwe usuh ka aritnema ariw ini mbayka ku pariye wis hiyap akak wowtyak. Heneme usuh iveg avitit ini kabayka ku pariye wis kane hiyap akak wowtyak. Mmanawa ku pariye wis hiyap akak wowtyak in ka dehwevyema in he mpiyevyenen. Heneme ku pariye wis kane hiyap akak wowtyak ini dehwevye adahan avanenekwa.