2 Koríntyus 3 - Uhokri Gahegbetawni Nukune akak Sawmus

Yisnewa humaw areketni ku usuh inyewa Uhokri giwatnivwi

¹ Yis kuwis hiyakni ku inakni nuwnuh inyewa. Usuh ka muwaka adahan usuh akkaw yit akiw. Ine akak wownuh ine akak kagta. Gaytakkis hiyeg muwaka kagta adahan hiyeg hiyak ku pariyene igkis marihwa ignes ka pukuhpaw gavitkis. Heneme usuh ka muwaka akebi ini adahan hiyeg hiyak usuh ku usuh ka kinisekevutnevwima, ku usuh inyewa Uhokri giwatnivwi. Usuh ka muwaka adahan usuh akka kagta yit. Ine usuh kawnata muwaka adahan yis keh kagta udahan adahan ekkenema usuh gitkis nawenyevwi hiyeg.

² Kibeyne, yiswa humaw kewa ukagtanbe adahan madikte hiyeg givegbohankis adahan igkis hiyakni ku usuh igyewa Uhokri giwatnivwi. Mmanawa ini ku samah yis nukunevwe yihiyekemni ini areketni ku inyewa Uhokri gidatni ay ukakuh. Usuh ka muwaka adahan in tamak amadga kagta. Heneme adahan in tamak ay avit uyakni. In ka manwati nivititak.

³ Yis humaw ke wotbe yis pahak kagtabe ku pariye tamakkiska wotuh gavit Cristo. In ka tamakka akakma ennetet arakuma ku pariye kane dep manwa. In tamakka akak Uhokri dehetniye Gitip. Mmanawa ig Uhokri ka tamak gihiyekemni he amadga tipnenwatma ku samah ig tamak gidahan amekene Moís. Heneme ig ke wotbe ig tamakkisni ay abet uhiyekemniwiy hawata.

Ignewa Uhokri iki wannuwiy, wawaygiwiy, udehetniwiy

⁴ Usuh awna inakni hene awaku usuh iveg givitit Uhokri adahan ig keh hene awaku ku samah usuh kamaxwa givitit Cristo.

⁵ Usuh giwatnivwi usuh yuma wannu wownteknewatma adahan usuh kehne ini annivwit. Ka hiya usuhma keh uwanti nikak ke wotbe in kehka akak wannube. Ignewa Uhokri iki wannu.

⁶ Ig iki wannu adahan usuh ekkene ini nukune gahegbetawni ku samah ig keh wixwiy humaw kibeynevwi giwtrik. Usuh ka akka yit he iwitnen adahan ku samah amawka wixwiy wew wadit. Heneme usuh akka yit Uhokri Gitip ku pariye iki wawaygiwiy adahan wixwiy wew wadit. Kumadukaki ku pariye he tamakkanen amadga kagta in ka iki dehetniki uvititwiy, in umahkiswiy avatra utaraksanwiy nikak. Heneme ku ig Uhokri Gitip kumadukawiy, ignewa iki dehetniki uvititwiy.

Uhokri ginetni wotwiy ka aynsima kakiytanite ariw ginetni git Moís

⁷ Minikwak ku samah ig Uhokri ike inakni gikumadukan git amekene Moís tamakka amadga tip, avim ini ig Uhokri gikiytani kahayak git. In keh amekene Moís gihepka amuwe mpiynevevye. Ka ikwa adahan neras amekenegben izhaewyenevwi iveg gimkat. Heneme pahaye in menwe. Ku wis hiyap Uhokri gikiytani kahayak mpiynevevye ku samah ig ike inakni gikumadukan ku pariye inwa umahkiswiy akiw,

⁸ inkata akiw ku aysaw ig iki Gitip ku pariye iki udehetniwiy? Amun ini gikiytani ka aynsima kahayaktenek akiw.

⁹ Inakni inetit ku pariye gisayreptenkis hiyeg avatra gitaraksankis in ka nikiytanisima. Inaknikata inetit akiw ku pariye ukehpitniwiy wadit ariw utaraksanwiy in ka aynsima kakiytanite akiw.

¹⁰ In ke wotbe inakni ginetni pitatyenene in yumahbe nikiytanibe akiw, mmanawa inakni ginetni butitnene ku avim inin in ka aynsima kakiytanite mpiyni mpiynevevye akiw.

¹¹ Mmanawa ku wis hiyap Uhokri ginetni ku pariye kawih adahan aynesawa hawkri ku wis hiyap in ka nikiytanisima, inkata akiw ginetni ku pariye kawih adahan avanenekwa? Innewa ka aynsima kakiytanite akiw.

Judeyenevwi ka pukuha Uhokri gihiyekemni

¹² Usuh hiyapni inakni inetit nikiytani hene, usuh akkin gitkis hiyeg akak madikte uboka.

¹³ Usuh ka mara aynesnima kema amekene Moísma. Ig awasave gihepka akak kamis kahadbe gihiyegavu izhaewyenevwi ka hiyap gamuwyi ku aysaw in manwa.

¹⁴ Henewa gihiyekemnikis sab ayge. Kuviknene gihiyekemnikis adukwenewa sab ku aysaw igkis ivegboha Uhokri gannasan. Igkis ka inyewatma pukuha inakni giwn. In ke wotbe gihiyekemnikis awaspitnebe akak kamisbe. Ini giwasaptiwkakkis ininewa mawasaptihkanek ku aysaw igkis pahavwihwa gikak Cristonek.

¹⁵ Heneme in kote mawasaptihkahte giwkis kuviknene akak inin. Ku aysaw igkis ivegboha amekene Moís gikumadukan, in ke wotbe pahak awasapti adukwenewa ay abet gihiyekemnikis.

Wixwiy iwene Uhokri gihiyekemni gikiytani kiyeste akiw

¹⁶ Heneme kibeyne. Ku aysaw wixwiy wagesnek uhiyekemniwiy gidahan Kiyavwiye, ayge nikwe in ke wotbe metakwa uhiyekemniwiy mawasaptihkabe.

¹⁷ Ku aysaw nah awna inakni iwit “Kiyavwiye”, nah kinetihwene gimin Uhokri Gitip. Mmanawa ku ig Uhokri Gitip ay uvitwiy in ke wotbe ig mawasaptihpiyebe uhiyekemniwiy ig keh wixwiy isahptaw ariw.

¹⁸ Ayge nikwe wixwiy madikte hiyap gikiytani huwewe. Wixwiy hiyapni ke wotbe akakbe uhepkawiy ka awasapnema adahan wixwiyme ekkene ini gikiytani hawata ku samah pahak waruw akka uhehpakwiy. Ku samah wixwiy ivegnenete gimkanit Uhokri wixwiy wageswenene hawata ke igbe. Wixwiy iwenene gikiytani gihiyekemni ka aynsima kiyeste akiw. Innewa Kiyavwiye Uhokri Gitip gannivwi ay uvitwiy.