2 Koríntyus 2 - Uhokri Gahegbetawni Nukune akak Sawmus

¹ Inneki keh nah kote atekkerete ku akak inin. Nah ka danuhkere atere yit yis ka bateknema.

² Mmanawa yisnewa ku pariye keh nah batek. Ku nah danuh atere yit yis ka bateknema, ayge nikwe wixwiyweke kadnisekbet pawtak.

³ Inneki keh nah awahkise pahak kagta atere yimin adahan yiswa waditebdih yihawkan avit nudawnhan atere. Mmanawa kiskama yis keh nah bateke numinuh ku aysaw nah danuhpenekam yit. Ka kis adahan yis keh nah ka batek. Nah iveg yivitit, nukebyuvwi, ku yis pukuha ku samah nah ayivwihwe aynesa avit nudawnhan atere. Mmanawa ku aysaw yis ka batek, nah kawnata batek.

⁴ Nah tameke inere pitatye kagta yimin akak madikte nukayhawni. In keh nah wakaymni mpiynevevye. He nah suke nukantak nah tih. Nah ka awahkisni yimin adahanma nah kehnema yis ka batek. Heneme nah awahkisni yimin adahan areketni yit ku nah bateke yikak ka aynsima.

Bayahminabay ner ku pariye kataraksanye

⁵ Ner ku pariye kataraksanye ayge yibet ig ka marakwa nahnenwatma, ig marekwene yis madikte ayge. Heneme nah ka hiyapkiskere gitaraksan git mpiynevevyema akak nuwnuh ahawna.

⁶ Kuwis yis bukihe gitaraksan giw akak ku samah yis pekkiswig yibetitak. Ikeyvi.

⁷ Amawka kuri yis bayahminig ariw ini gitaraksan. Amawka hawata kuri yis aydaptihgi kahadbe ig ka wakaymnima mpinevevyema he ig isahkiswe giw Uhokri.

⁸ Nah aya yit, nukebyuvwi, adahan yis akka git ku yis inyewa batek gikak ka aynsima.

⁹ Inneki keh nah awahkise inere pitatye kagta yimin adahan nah hiyepne ba yis inyewatma ihpekere nuwnuh. Kuri nah hiyakni ku yis ihpin. Kibeyne.

¹⁰ Ku aysaw yis bayahmina pahavwi ariw gitaraksan, nah hawata nah bayahminig. Ka nukakuhma ig taraksa adahan nah bayahminig niw, heneme nah bayahminig giwavrik Cristo ke wotbe ignebe gibayhamnihnetnibe. Nah bayahminig hene awaku nah muwaka yis bayahminig. In kabay yidahan adahan yis bayahminig.

¹¹ Ku yis bayahminig, nikwe Satanás ka hiya igma kawihyi. Amawka ku wixwiy avuriw, mmanawa ig avanenekwa ahegbet adahan idiswene abet uhiyekemni. Wixwiy kuwis hiyakni kabayntiwa gihawkan.

Nah kiyimwihwe gikak Titu

¹² Nukebyuvwi, ku samah nah tiviknene ekkene ini kibeyne inetit gidahan Cristo metakwa nah danuh avitit paytwempu Trôadi. Ayge ig Uhokri ike kibeyne iwetrit nutuh adahan nah ekkene ginetni.

¹³ Heneme nah ka karisawnema nuhiyekemni ayge. Awaku nuvewkankam ku nah patiptak gikak ukebyi kiyavwiye Titu ku pariye nah awahkise yimin nudukwenavrik. Mmanawa nah ka aynsima timepkere yak gibiyaptak. Heneme, ku samah nah ka hiyavgi ayge adahan nah patiptak gikak. Nah hiyapni hene, nah ekkewvi gitkis neras hiyeg ayge, nah tivik adahan givegvepten avitit Masedôniyamnaw.

Wixwiy keh Uhokri bateke ginaktin ke wotbe ig ayhpiyebe imihgibe

¹⁴ Heneme kibeyne gidahan Uhokri. Ig avanenekwa parak abet uhawkanwiy. Givitimpi Cristo ig avanenekwa matekbeta gihawkankis madikte hiyeg ku pariye mpitebdihkere wannivwiy. Ayge nikwe ig kawihwiy adahan wixwiy ekkene gihiyekemni muwapuw ke wotbe wixwiy bohkisne imihgi amihyibe.

¹⁵ Wixwiy keh ig Uhokri bateke ginaktin ke wotbe ig ayhpiyebe imihgibe, mmanawa ig hiyap Cristo ay uvitwiy. Wixwiy ke wotbe bohkisnebe Cristo gihiyekemni amihyi givuwiwkis neras ku pariye amnihswenevwi git Uhokri gikakkis neras ku pariye kane amnihswakere git Uhokri.

¹⁶ Gitkis neras ku pariye kane amnihswekere git Uhokri, unetni ke mikahrikibe ku pariye giwmeptenkis. Gitkisme neras ku pariye amnihswenevwi git Uhokri, unetni ke imihgibe ku pariye ikene dehetniki givititkis. Nukebyuvwi, yuma pahavwinema hiyeg kadahan gawaygi giwnteknewa adahan ig ekkene ini hiyakemniki.

¹⁷ Ay ka aynsima hiyeg ku pariye ekkene Uhokri giwn adahan ivegvene gikakurakis nikak. Yaytak hiyeg ayge awna ku usuh hawata ke ignesbe. Bawa ka inyewatma, nukebyuvwi. Usuh ka aharitnema ariknawnema. Usuh ekkene Uhokri giwn yit awaku usuh gawahkisni adahanikwa ini. Usuh ekkene inakni giwn yit giwtriknewa Uhokri awaku ku samah usuh pahavwiwa gikak Cristo.