2 Koríntyus 12 - Uhokri Gahegbetawni Nukune akak Sawmus

Nuhiyvan nuwtyakveynen

¹ In waditnevyenen nah keh nuwanti yiwtrik, heneme yiswa mpiksaptihpen adahan nah keh hene. Neras kinisekevutnevwi kehne giwantikis ku igkisnen hiyap arikna giwtyakveykisnen. Kuri nikwe nah kinetihwate amin ku pariye nuhiyvan nuwtyakveynen, nah akkite yit ku pariye Uhokri gakkan nutuh.

² Madikawkubu kamukri akak paxkabu arawna (14) mpiyatinene avim ini ku aysaw nah piriyepkewne gitiphawnawa Cristo, pahaye adahan nah tivikepka inurikute ka aynsima inute ariw en akak waravyu. Avim ini nah hiyap nutivuh ke wotbe nah pahavwiwatbe akiw. Nah ka hiyak ba nah tivikepka he nutivuhnenwatma ba kawk, ba nah tivikepka pahavwitewa. Ignewa Uhokri hiyak. Nah danuh atere ku kiney ig Uhokri misakwa.

³ Henewatbaki nah ka hiyak ba nah danuh atere he nutivuhnenwatma ba kawk, ba nah danuh atere pahavwitewa. Ignewa Uhokri hiyak.

⁴ Nah danuh atere, nah timap iwit ku pariye ka ik adahan nah kinetihwa nimin ku pariye hawata nah ka isaksaka adahan nah kinetihwa nimin.

Nah yuma nannuhsima nuwnteknema nikwe Uhokri iki ka aynsima nannuh

⁵ Ik adahan nah keh nuwanti akak inere, heneme nah ka batek kinetihwa amin ku samah nah ka aynsima nannuh. Nah batekte kinetihwa amin ku samah nah yuma nannuhsima.

⁶ Wake nah kinetihwa amin ku samah nah ka aynsima nannuhbe, nikwekam yuma pahavwinema hiyeg ik adahan ig awna numinuh ku nah awna he mahayakemnikinen. Mmanawa nah awnakam iwit ku pariye inyewatnene. Heneme nah ka kinetihwekere numinuh hene. Mmanawa yis kuwis hiyap nannuh yis kuwis timap nuwnuh. Amawka ininewa areketni ba nah kibeynewatma. Nah ka muwaka yis ikanuh ku nah kibeyne hiyeg he awakunen ku samah yis timavun nah akkamnih nabayuh yit.

⁷ Henewa ig Uhokri ekke nutuh ka aynsima barewka nuwtyakveynen. Heneme kibeyne, ig mpitevun adahan nah ikaw kibeyne hiyeg akak ini. Ig mpitevun akak ku samah ig isakse Satanas kiyimwihpen akak pahat mbayka. In keh nah kayah ke wotbe pudukube ay nihbetbe. Nah kiyimwihwene nikak takunipti.

⁸ Mpamavut nah piriyepkaw git Kiyavwiye adahan ig mpiyasa ini mbayka nuwhu.

⁹ Igme kaytwa nuwnuh: — Kawa. Nah ka mpiyasin piw, heneme nah avanenekwa ay pikak adahan nah ikene pawaygi. Ikeyvi. Pis ka muwaka akiw mpiy inin akiw. Ini mbayka akka pit ku pis yuma pannuhsima piwnteknewa. Ku aysaw pis ikaw hene yuma pannuhsima, ayge nikwe nannuh ka aynsima kahayakte akiw. Henewatbaki ig Uhokri awna nutuh. Inneki keh nah batek kinetihwa amin ku samah nah yuma nannuhsima. Mmanawa ku aysaw nah yuma nannuhsima nuwnteknema ayge nikwe ig Cristo kawihkis gannu nuvitit.

¹⁰ Nah batek nunaktin ku samah nah yuma nannuhsima. Hiyawa nah mahivwihpika, hiyawa muweke arikna nutuh, hiyawa nah hiyapkiska mbeyne nutuh, hiyawa nah matekbetepka nuhawkan, hiyawa madikte ini danuh nutuh awaku nah ay giwaku Cristo, heneme in ka sam nutuh. Nah nudukwenewa batek nunaktin. Mmanawa ku aysaw nah yuma nannuhsima nuwnteknema, ayge amun ini nikwe nah ka aynsima nannuh, mmanawa ig Uhokri ay nukakuh.

Mmahki yis pukuhpaw nubohri?

¹¹ Inin ku samah nah akkamnihne nabayuh yit in he mahayakemnikinen, heneme yiswa mpiksaptihpen adahan nah kehni hene. Kiskama yiswatakam kinetihwa amin nabayuh. Inyewa nah ka ariknawnema, heneme nah ka warikapnema giwkis neras kinisekevutnevwi ku pariye ikawnamah ku igkisnewa Uhokri giwatnivwi yimin.

¹² Ku aysaw nah ayge yikak nah keh ka aynsima annut ku pariye areketni yit ku nah igyewa Uhokri giwatni. Nah ka mabivwihwati adahan ini. Avim ini nah keh arakembet annut ku pariye areketni Uhokri gidatni, annut ku pariye keh hiyeg wakaymni, kibeyne annut ku pariye hiyeg amadgaya inin ka hiya nikehka.

¹³ Mmahki yaytak iki ku nah ka keh inwata kabayka yikak ku samah nah keh gikakkis nawenyevwi Jesus gihiyegavu? Pahatwowa arikna nah ka keh yikak ku pariye nah keh gikakkis. Nah akkite yit ku pariye in. Nah ka aya nutiwni yit. Uyay bayahminan ariw ini nutaraksan yikak.

¹⁴ Nah kuwis danuhpa yit pimavut. Kuri amamnavutni nah ahegbet adahan nah danuhpene yit akiw. Heneme ku aysaw nah danuhnek atere nah kawnata ayepkerenek nutiwni yit. Ka yikakurama muwak nutuh. Yisnenwa nah muwaka gidahan Uhokri. Nah ikiyi ke wotbe yis nukamkayuvwibe. Bakimnayh ka katiwnih gigkis gimanakis, heneme igti katiwnih gikamkayhkis gimanakis. Inneki keh nah ka muwaka yis katiwnih numana.

¹⁵ Akak madikte nubetki nah ahegbet adahan sarayh madikte nukakura yidahan he nahwa ik adahan sarayhkiswe yidahan. Nah batek yikak ka aynsima. Mmah inneki keh yis ka batek nukakuh?

¹⁶ Yaytak ayge awna numinuh ku inyewa nah ka aya nutiwni yit, heneme nah ku hiyak ku samah nah uti nukakura yiwntak. Gitkis nah uti nukakura yiwntak he akak kinisakanen.

¹⁷ Mmahki nah hiya yikinsak? Mmah yivewkan ku nah kiniswey givitimpikis neras ku pariye nah awahkise atere yimin?

¹⁸ Ku samah nah awahkise kiyavwiye Titu yimin gikak ner pahavwi ukebyi akiw. Ba yis hiyap ig kiyavwiye Titu kinisyi? Kawa. Ig ka kinisyi. Yis hiyaknig ku ig kibeyne hiyeg. Nah hawata, nuhiyekemni hehpekuye ke gidahanbe. Nuwewni hehpekuye ke gidahanbe.

¹⁹ Ba yis hiyak ku samah usuh akkamnih yit madikte ku pariye ukehni amadgatak ini kagta? In ka awakuma usuh muwaka yis iki ku usuh kibeynevwi hiyeg. Kawa. Gitnenwa Uhokri usuh akkamnih madikte ku pariye ukehni adahan igwa uhiyvetni ba usuh kibeynewatma. Mmanawa ignewa Ukivarawiy wixwiy ku pariye pahavwiwa gikak Cristo. Heneme usuh kinetihwa inakni iwit yit awaku usuh aharitne kabayka yidahan. Usuh ka aharitnema kabayka udahanma. Mmanawa usuh batek yikak, usuh muwaka wagahkis yawaygi. Inneki keh usuh kinetihwa inakni yit hene.

Nah avis ku nawenetke nah uti yaytak ka wewnenema wadit

²⁰ Nah avis ku nawenetke nah danuhnek atere yit nah uti yaytak ayge gihiyekemnikis nawenyewa ariw ku samah numawkan. Nawenetke igkis hawata utinek nuhiyekemni nawenyewa ariw ku samah gimawkankis. Nah avis ku nawenetke nah uti yaytak iniyekne, igkisweke atihpekne pawtak, igkis dagawnhawne pawtak, mpuse gaytakkis ikawnamahkis ku igkisnen wadityevwi. Nah avis ku nah utivgikisnek awnekne paminak, igkis patehene pahavwi giw, igkis ikewne kabayte giw pahavwi, igkis matekbetene hiyeg gihawkankis.

²¹ Nah avis ku nah danuhnek atere akiw ku nawenetke uwohkigawiy keh nah wakaymni nunaktin ayge yibetnek. Nawenetke nah tihnek gidahankis ka aynsima hiyeg ku pariye kuwisnene tarakse, igkis kote wageste gihiyekemnikis ariw madikte givathawnikis, ariw gimahyakemnikis, ariw givuwvumnikis ku pariye igkis gibetkikis keh.