2 Koríntyus 11 - Uhokri Gahegbetawni Nukune akak Sawmus

Ka ba yi kinikiswa gitkis kinisekevutnevwi

¹ Nukebyuvwi, ku wis awna ku wis kibeyne hiyeg, in he mahayakemnikinen. Heneme nah aya yit adahan yis kiyaknihwa nukakuh ku samah nah awna inakni mahayakemniki. Kibeyne, yis kuwis kiyaknihwa nukakuh ka aynsima kuwis. Nah ka ikewkere ke wotbe nah kabayte yiw, heneme amawka ku nah akki yit nabayuh kahadbe yis ka tukuhwebdihma ariw nuwnuh yis tivik akak nawenyevwi hiyeg gihiyekemnikis.

² Nah muwaka yis misakwa avanenekwa ay giwaku Uhokri. In ke wotbe nah yigbe, yisme ke wotbe yis nisebe. In ke wotbe nah kuwis ahegbete nunetni gikak pahavwi awayg gudahan nise. Nah ka muwaka eg keh gunetni gikak nawenyewatma awayg akiw. Nah muwaka eg agen guvit gidahannen ner ku kakak eg kuwis ahegbetnano gunetni. Yisme nah muwaka yis agen yivit gidahannen Cristo kahadbe aysawnemenek nah yekkepten givetunat yis barewvityekuye, yuma patahwaki ay yivit, yuma taraksaki ay abet yihiyekemni.

Kinisekevutnevwi keh yis miniwvi giw Uhokrinek

³ Nah avis yikak ku nawenetke neras kinisekevutnevwi keh yis miniwvi giw Cristonek, keh yis ka batek gikak avititakma yiyakni ku samah yis batekye gikak kuri. Nah avis yikak ku nawenetke igkis kinisweynek hawata ku samah ner Kaybune kinise amakano Eva, ig kinistevgu akak ke wotbe kibeynewatbe iwit.

⁴ Nah avis yikak mmanawa yis amava giwnkis kabayntiwa. Hiyawa igkis akka nawenyewa ginetnikis gimin Kiyavwiye Jesus ariw ku pariye usuh kuwis ekke yit, heneme yis amavin kabayntiwa. Yis amava nawenyewa itipti yivitit giw Uhokri Gitip. Yis amava nawenyewa hiyakemniki ariw ini hiyakemniki ku pariye usuh kuwis ekke yit.

Kinisekevutnevwi aya gitiwnikis yit

⁵ Igkis ikaw ke wotbe igkis Uhokri giwatnivwi kabaytebe nuwhu. Bawa igkis ka kabaytema nuwhu.

⁶ Hiyawa nah ka kannuh akki Uhokri gihiyekemni akak maguyema iwit, heneme nah inyewa hiyak ini Uhokri gihiyekemni. Nuvewkan in huwewe yit, mmanawa nah akkin yit takunipti akak madikte ku samah nuwewni hawata akak madikte nuwnuh akiw.

⁷ Mmah nah tarakse ku samah nah ka aya nutiwni yit adahan ku samah nah ekkene yit Uhokri ginetni? Mmah inneki keh yis ka kiyathan kuri? Nah kannivwiye adahan nuvituh ke wotbe nah yuma nukiytanibe adahan yis katiwnihunbe. Heneme nah keh hene kahadbe yisme uti yikiytani.

⁸ Hawata akiw nawenyevwi Jesus gihiyegavu ike nutuh karukri avim ini ku aysaw nah ayge ekkene Uhokri giwn yit. Nah ameve gikakurakis waditnevyenen giwkis, ke wotbe nah gamevwitnikisbe, kahadbe nah kannivwiye yidahan.

⁹ Avim ini ku aysaw nah ayge yibet nah ka misakwati yiduhyamadga adahan yis hiyekne nukakuh ku aysaw muweke arikna nutuh. Mmanawa igkis ukebyuvwiy masedôniyenevwi igkis ewka nutuh madikte ku pariye numawkanitnene. Nikwe avim ini nah ka misakwati yiduhyamadga aynesnima. Kuri avanenekwa nah kawnata misakwekere hene. Nah ka misekwekere yiduhyamadga aynesnima.

¹⁰ In kabay nutuh ku nah akki Uhokri giwn yit yuma nutiwni. Nikwe nah ka isaksa pahavwinema hiyeg katiwnihun ayge Gresiyamnaw. Ku samah Cristo ay nuvituh nah awna inakni iwit inyewatbaki.

¹¹ Ka yi muwaka iki ku ini ku samah nah ka isaksa yis hiyak nukakuh yis ikanuh ku in awaku nah ka batek yikak. Kawa. Ka henema. Ig Uhokri hiyakni ku nah batek yikak.

¹² Na ka ayepkere nutiwni yit. Mmanawa nah nuvewkan gimaptentenkis neras ku pariye ayge yibet ku pariye ikawnamahkis ke wotbe igkis ekkenesbe Uhokri giwn yit hawata ke usuhbe. Ka ik adahan igkis ikaw hene, mmanawa igkis ekkenes Uhokri giwn yit adahan katiwnihka, usuhme ka aya utiwni.

Kinisekevutnevwi ikaw ke wotbe igkis kibeynevwibe

¹³ Neras hiyeg ka igkisyewatma Uhokri giwatnivwima. Igkis he kinisekevutnevwinen. Igkis ikawnamahkis ke wotbe igkis Cristo giwatnivwibe bawa igkis ka giwntakma.

¹⁴ Igkis ka wadisasan. In kahayak ku samah nah ivegminin. Mmanawa igwa Satanas ik adahan ig kahayaksaw ke wotbe ig pahavwi ahj kabutenebe.

¹⁵ Nikwe in ka wadisasan ku neras gihiyegavu giwetnibetnewa kewa igbe, igkis ikawnamahkis kibeyne hiyeg ke wotbe igkis kehnebe he kabaykanen. Heneme aysawnemenek ig Uhokri iki gitiwnikisnek pakekunawa akak gikehnikis. Igkis hiyap ini mbeyne ku pariye kis gidahankis.

Kinisekevutnevwi gibetkis akkamnih gabaykis yit

¹⁶ Nukebyuvwi, kuwis yaytak ayge ikanuh ku nah he mahayakemnihwenenen. Kiskama yis ka ikanuh hene, heneme nah aya yit akiw adahan yis isaksan adahan nah awna aynesa mahayakemniki yit. Isaksanay adahan nah akkamnih nabayuh yit ke nerasbe.

¹⁷ Ini ku samah nah awna adahan nah ekkene nabayuh yit in ka giwntakma Uhokri. Heneme nahwa awna ke mahayakemnivyebe.

¹⁸ Ku samah ka aynsima hiyeg ayge yibet kehne giwantikis akak arikna amadgaya inin, nikwe nah hawata.

¹⁹ Mmanawa yit yis hiyakemniyevwi bawa yis ihpene giwnkis hiyeg mahayakemnavyenen akak madikte yibetki.

Kinisekevutnevwi kabukhaw yit

²⁰ Igkis kabukhewnen yit. Igkis yiwaminepten. Igkis yikinsepten. Igkis ikaw ke wotbe igkis yavitminbe. Igkis yibiwhbokepten. Hiyawa igkis kehave madikte ini mbayka yikak, heneme yis yidukwenewa ihpenene giwnkis.

²¹ Yis iki nuwnuh ka ariknawnema yit awaku nah he tuwatasewvi yitivut. Yiwnavriknawa. Henewa nah ka kiboka keh akebi ini ku pariye gikehnikis yikak. Heneme ku samah igkis kiboka akkamnih gabaykis yit nah hawata nah kibokanata. Nah ka kis adahan nah awna inakni mahayakemniki hene, heneme nahnewa awna.

Kinisekevutnevwi ka kabaytema nuwhu

²² Igkis keh giwantikis akak ku samah igkis kannuh awna judeyenevwi giwnavrikkis. Nah hawata, nah kannuhnata awna. Igkis keh giwantikis akak ku samah igkis izhaewyenevwi. Nah hawata, nah igwata izhaewyene. Igkis keh giwantikis akak ku samah igkis amekene Abraawh gihiwhivwi. Nah hawata gihiwhiwata.

Nah hiyap mbeyne ka aynsima gidahan Cristo

²³ Igkis ikaw ku igkis kannivwiyes gidahan Cristo. Nahme nah kannivwite giwkis. In he mahayakemnikinen adahan nah akkamnih nabayuh yit hene. Ka sam. Nahnewa akkamnihnite yit. Nah mpiksawte giwkis kannivwi gidahan Uhokri. Nah paraksakante arikut parakseket giwkis, nah biwhkante giwkis, nah mpiyate ariku miyaka giwkis.

²⁴ Nah akkite yit ku samah. Hiyeg judeyenevwi gibetkikis biwh kakehniyevwi akak tigay kaba danuh paxkavut madikwa (40). Kuwis pohowkuvut igkis keh nukakuh hene.

²⁵ Hawata neras hiyeg romanyenevwi kuwis biptevun mpamavut akak ah. Pahay nah padaktepka akak tip. Mpamavut nawiy buwise nukakuh. Pahay nah misekwe parahwokwa pahay hawkri akak pahay mitipka.

²⁶ Abetnewa nuwewvan ku kitwiye nah, nah ka mayakti. Nah kuwis mpiyasa mbeyne ahakwew un. Nah hiyap mbeyne giwakukis amevwavye. Nah hiyap mbeyne giwakukis nuyaki judeyenevwi, giwakukis hiyeg kane judeyenevwima. Nah hiyap mbeyne avit paytwempu. Nah hiyap mbeyne ahavwik. Nah hiyap mbeyne parahwokwa. Nah hiyap mbeyne giwakukis neras ku pariye ikewnevwi ke wotbe igkis nukebyuvwi Jesus gihiyegavube.

²⁷ Nah kannivanene nah mpiksewnene he nah ka kahawkan adahan nah himak. Nah kamax ka aynsima mativwa, nah kamax ka aynsima arabyuki. Nah mpiyasa ka aynsima hawkri yuma numana. Nah minetvi ka aynsima, heneme nah yuma nudagmanvit.

²⁸ Ka ininewatma nah kiyimwihka akak nuvituhnenwatma, heneme nah hawata nah kiyimwihwa abet nuhiyekemni, mmanawa takunipti nah wakaymnihwene gidahankis madikte Jesus gihiyegavu.

²⁹ Ku aysaw nah hiyap pahavwi ig yuma gawaygi, nah kayah gidahan. Ku aysaw nah hiyap pahavwi tarakse, nah kayah gitaraksan.

Nah batekte kinetihwa amin ku samah nah yuma nannuhsima

³⁰ Nukebyuvwi, ku amawka nah kinetihwa numinuh, nah ka batek kinetihwa amin ku samah nah ka aynsima nannuh. Nah batekte kinetihwa amin ku samah nah yuma nannuhsima.

³¹ Ininewa numawkan. Kibeyne gidahan Uhokri ku pariye Ukivarawiy Jesus gig ku pariye kis adahan wixwiy kabayhig adahan avanenekwa. Ig hiyakni ku nah awna inakni inyewa.

³² Ig Uhokri akka nutuh minikwak ku nah yuma nannuhsima aynesnima. Ku aysaw nah aynte avit paytwempu Damasku, ner hiyaptigi ku pariye kumadukene hiyeg ayge giwavrik kiyavwiye Aretas, ig avuriwkise madikte paytwempu alapota gitkis suwtat adahan igkis nukamaxwitni.

³³ Heneme nah muhuksepka gavitkis nukagmadavu aytontak inutak tahan waykborit, ariku pahayku nopsad kat wanaka akak akati, ariwntak pahayku miyokwiye ayaranwatak paytwempu, hene nah bisike giwkis. Henewa ig akka nutuh ku nah yuma nannuhsima.