2 Koríntyus 10 - Uhokri Gahegbetawni Nukune akak Sawmus

Ka yi muwaka mpiksaptihun adahan nah himahyi

¹ Kuri nah Pol, nah awnekere yikak yis ku pariye awnenevwi numinuh. Nah awnekere yikak akak Cristo giyakni ku samah ig ka aynsima kamax udahanwiy. Yis awna numinuh ku nah ka kiboka awna yikak ku aysaw nah ayge yibet. Yis awna ku nah kiboka awna yikak he amadganen kagta ku aysaw nah avawyewa yiw.

² Nah aya yit ka yi muwaka mpiksaptihun adahan nah himahyi avim ini ku aysaw nah danuhnek atere. Mmanawa nah kuwis ahegbete nunetni adahan nah gihimeptenkis neras ku pariye awnenevwi uminuh ku usuh ekkene Uhokri giwn usuh aharitne kabayka udahannenwa nikak ke hiyeg amedgenevwi ininbe.

Usuh wanekbetenek gihawkankis uvetunyavu

³ Henewa usuh hiyeg amedgenevwi inin, heneme usuh ka kawih hiyakemniki amedgenema inin adahan usuh watekbetene uhawkan gikakkis uvetunyavu.

⁴ Ine usuh ka uti wawaygi wownteknema gitivutkis uvetunyavu, heneme usuh utipni giwntak Uhokri ku pariye ka gidatnisima. Innewa gidatni hiya awenkebdihka gihawkankis madikte. In wanekbete ahawkan madikte mbayka ku pariye igkis idis abet uhiyekemni.

⁵ Ini gidatni wanekbete ahawkan madikte hiyakemniki ku pariye ikewne kabayte ariw Uhokri gihiyekemni. In wanekbete ahawkan madikte ku pariye mpithene hiyeg adahan ignes ka hiyak Uhokri. In kumadukasa madikte hiyeg gihiyekemnikis git Cristo adahan ignes ihpene giwnnenwa.

⁶ Ku aysaw yis kumadukasaw git Uhokri nikwe ig ahegbet adahan hiyak akak madikte ku pariye abet yihiyekemni ku pariye kane ihpekere giwn.

Usuh igyewa Uhokri giwatnivwi

⁷ Yis ikanuh ku nah henenwa ku nah ka iwatitma gidahan Uhokri. Heneme yis ikanuh hene awaku ku pariye yihiyvan ay amadga inin. Heneme ku pahavwi hiyeg yaytak hiyakni ku ig Cristo gihiyega, hiyawa ig hiyakni ku nah gihiyegawata hawata ke igbe. Ku pariye keh ig hiyakni ku ig Cristo gihiyega inwata keh ig hiyakni ku nah igwata Cristo gihiyega.

⁸ Yis awna numinuh ku nah ikawvari ke wotbe nah kabaytebe yiw ku samah nah ikewne Uhokri giwatni yimin. Heneme nah ka mara awna inakni yit. Mmanawa nah igyewa Uhokri giwatni yimin. Nah awahkiska adahan nah wagahkisne yawaygi kawki adahanma nah tuguhkisnema yawaygi.

⁹ Nah ka muwaka yis iki ku nah ikaw Uhokri giwatni he adahanen nah yavisasetni waditnevyenen akak ini nukagtan ku pariye nah nubetki awahkis yimin.

¹⁰ Nah hiyakni ku yis awna hene numinuh. Yaytak awna: “Amadgatak gikagtan, Pol ikaw ke wotbe ig kiyatye hiyegbe, ke wotbe ig detye hiyegbe. Heneme ku aysaw ig ay ubetwiy ig tuwatevye. Inakni giwn ka ariknawnema.”

¹¹ Kuri nah ikene yinetni. Ku aysaw nah danuhnek atere yit nah ikawnek hawata ku samah nah ikaw amadgatak inin kagta.

Usuh ka mpiksaw kumaduka hiyeg mpiy ku pariye Uhokri iki wotuh

¹² Nah ka ikewkere kema nerasma ayge yibet ku pariye ikawnamahkis kiyatte ayge. Mmanawa gitkis igkis kiyatyevwi bawa he gikehbetankisnen. Giwntakkiswa igkis ikawnamahkis ku igkis kiyatte yiw. Igkis yuma gihiyekemnikis adahan igkis ikaw hene.

¹³ Usuhme ka ikewkere kiyatyevwi mpiynevevyema. Ini ku samah usuh ikaw Uhokri giwatnivwi in ka ukehbetanma wownteknema. In Uhokri gikehkisni wotuh. Ignewa awahkis usuh danuhte atere yit. Ininewa keh usuh ikaw Uhokri giwatnivwi yimin.

¹⁴ Usuh danuh atere yit usuh ka maviyvinema ariw ku pariye gikehkisni wotuh. Mmanawa ig awahkise usuhkit atere yimin adahan usuh ekkene yit ini kibeyne inetit gidahan Cristo. Ininewa wannivwi ig iki wotuh.

¹⁵ Usuh ka mpiksaw kumaduka hiyeg mpiy ku pariye Uhokri iki wotuh. Ine usuh kawnata kiniswekere akak nawenyevwi hiyeg gannivwikis yivitit ke wotbe in udahanbe wannivwi. Ininewa umawkan ku yikamaxwan wagehnene kahadbe ini wannivwi ku pariye Uhokri gikehkisni wotuh in tiviknene wewnene muwapuw givuwiwkis hiyeg aygnenevwi avit yiwaxig.

¹⁶ Ayge nikwe ik adahan usuh akka Uhokri ginetni gitkis hiyeg aygnenevwi avit waxri kennesa yimkanit ku kiney inakni inetit kote akkakante. Usuh ka ikewkere kema nerasma ku pariye ikawnamah kibeynevwi akak nawenyevwi hiyeg gannivwikis ke wotbe in gannivwikisbe.

¹⁷ Mmanawa in Uhokri gannasan awna: — Ku pariye hiyeg kanumkwere kibeyne hiyeg, wani ig ka kanumwa kibeyne. Uyay kanum Uhokri ignewa ku pariye kibeyne ukakwiy.

¹⁸ Mmanawa ku pahavwi kanumwa kibeyne hiyeg, ka innema keh ig inyewatma kibeyne. Heneme ku ig Uhokri kanumgi kibeyne hiyeg, nikwe igyewa kibeyne.