2 João 1 - Uhokri Gahegbetawni Nukune akak Sawmus

Nah Joawh awahkis kabayka pimin

¹ Nah Joawh awahkis kabayka pimin, kiyavuno, payak gikakkis pikamkayuvwi. Yis Uhokri gikanyanvu gibetkivu. Nah batek yikak inyewa avititakwa nuyakni. Ka nahwanema batek yikak, heneme madikte hiyeg ku pariye hiyeknevwi inyewa Uhokri gihiyekemni ignes madikte batek yikak kiyesrad.

² Innewa Uhokri gihiyekemni inyewatnene innewa ku pariye keh usuh batek yikak. In ay abet uhiyekemniwiy, in misakwa ukakwiy adahan avanenekwa.

³ Kibeyne, ig Wigwiy Kiyavwiye Uhokri gikak gikamkayh Jesus Cristo gabaykis, gamnihrakis ukakwiynek. Igkis kariswehse uyakniwiynek. Igkis akka wotwiynek hiyakemniki ku pariye inyewatnene. Igkis keh wixwiy batekak pawtaknek.

⁴ Nah ka aynsima batek awaku ku samah nah patipteke gikakkis gaytakis pikamkayuvwi nah hiyap igkis wewnenes akak Uhokri gihiyekemni inyewatnene, igkis wewnes avigkutavrik ku samah Wigwiy aya wotwiy.

Batekaknay pawtak

⁵ Kuri nah aya pit kiyavuno, adahan yis batekak pawtak. Inakni nayapni pit in ka nukunema. Inakniwata Kiyavwiye Uhokri gayapni wotwiy ku pariye wixwiy kuwis timap ku samah akavuska hawkri.

⁶ Ku wixwiy batekak pawtak, amun ini nikwe wixwiy ihpene Uhokri gikumadukan. Innewa gikumadukan adahan wixwiy batekak pawtak. Wixwiy kuwis timap inakni iwit ku samah akavuska hawkri.

Kinisekevutnevwi awna ku Jesus ka Uhokrima ihtikeknema

⁷ Kadahan ka aynsima kinisekevutnevwi muwapuw amadga inin hawkri kuwis. Igkis kinetihwa gitkis hiyeg ku Jesus Cristo ka ayta wotwiy giwntakma Kiyavwiye Uhokri, ig ka wageswa ihtikeknema kema wixwiyma. Ku yis timap pahavwi awna inakni hene, igi kinisekevutne. Ig Cristo givetunya.

⁸ Avuriwnabay kahadbe yis ka kinikiswa git yis ka biyuksa inakni hiyakemniki ku pariye usuh kuwis ekke yit akak madikte wawaygi. Numawkan yis darih madikte ini kabayka ku kaharitne yis.

⁹ Ku pahavwi ka misakwa akak Cristo gihiyekemni, ku ig manuke arit nawenyewa hiyakemniki akiw, igi yumahwa Kiyavwiye Uhokri ay givit. Igme ku pariye misakwa akak Cristo gihiyekemni, igi kadahan Wigwiy Kiyavwiye Uhokri ay givit piyamate gikak gikamkayh.

Ka ba yi amava kinisekevutnevwi yivinekut

¹⁰ Nikwe ku pahavwi danuh atere yit adahan yikannuhten, ku ig kannuhyi amin hiyakemniki ku pariye nawenyewa ariw Cristo gihiyekemni, ka ba yi amavig yivinekut. Ine ka yi muwaka kaytwa giwn akak batekka.

¹¹ Mmanawa ku yis kaytwa giwn akak batekka, nikwe hiyeg ikiy ku yis batek akak ini gihiyekemni mbeyevye.

Nah awahkis kabayka pimin

¹² Nah kadahan ka aynsima inetit akiw adahan nah kinetihwene pit. Heneme nah ka muwaka akkin pit amadgatak kagta. Gikak Kiyavwiye Uhokrinek nah danuh atere pit adahan wis kinetihwa pavetunak kahadbe wis batek payak.

¹³ Pikebyi kabayno gukamkayuvwi awahkis kabayka pimin.