1 Timótyu 6 - Uhokri Gahegbetawni Nukune akak Sawmus

Amawka hiyeg kiyatha gikivarakis

¹ Awnanaba gitkis hiyeg ku pariye kannivwiye gidahan pahavwi adahan igkis kiyatha gikivarakis kabayntiwa. Kahadbe igkis ka mbayhasa Kiyavwiye Uhokri giw. Kahadbe igkis ka mbayhasa ukannuhakni amin Uhokri gihiyekemni.

² Ku pahavwi gikivara hawata kamaxwa givitit Kiyavwiye Jesus, amawka ku ig gihiyega ka meksig awaku ku samah igi gikivara kuwis humaw gikebyi Uhokriyan. Kawa. Amawka ku ig pi kannivwite gidahan akiw awaku kuri ig gayavetni pahavwi ku pariye ig batek gikak, ig gayavetni pahavwi ku pariye kamaxwenewata givitit Kiyavwiye Jesus hawata ke igbe. Timotyu, akkanaba inakni hiyakemniki ta gitkis madikte Jesus gihiyegavu. Iki gihiyekemnikis akak madikte pawaygi adahan igkis ihpin.

Ihpasa inakni hiyakemniki gitkis madikte Jesus gihiyegavu

³ Inakni hiyakemniki inyewatnene. In Ukivarawiy Jesus Cristo giwn. In kannuh hiyeg ikaw Uhokriyanbetnewa. Ku pahavwi ka amava inakni hiyakemniki, ku ig kannuhekne amin nawenyewa hiyakemniki akiw, igi gihiyekemni waditnevyenen.

⁴ Ig ikawvari hiyakemniye bawa ig ka hiyak ariknawnema. Ig ba gibetki kaytwanaw, iniyak amin iwit waditnevyenen. Akebi ini hiyakemniki keh hiyeg atihpak. In keh igkis ker pawtak. In keh igkis pitimnak. In keh igkis pukuhpaw pabohrak.

⁵ Hiyeg ku pariye avanenekwa pitimnekne hene, gihiyekemnikis mbeyevye. Igkis ka hiyak ku pariye Uhokri gihiyekemni inyewatnene. Igkis kinetihwenes gimin Kiyavwiye Uhokri aharitnen igiska.

Ka ba aharit igiska amadgaya inin

⁶ Henewatbaki, ay ka aynsima igiska gimun Kiyavwiye Uhokri. Ku wis wew akak gihiyekemni, wis bateke umin. Yuma akiw umawkan akiw. Ayge nikwe wis igisye kuwis gimun Kiyavwiye Uhokri.

⁷ Igiska amadgaya inin in ka ariknawnema. Ku aysaw wis amadgat wayk wis ka ewk ariknawnema ayta ukak. Ku aysaw wis miyap, yuma ariknawnema amadgaya inin tivikwiye ukak.

⁸ Nikwe ku wis kamana, ku wis kasimsa, ayge wis bateke umin. Wis ka muwaka ariknawnema akiw.

⁹ Heneme ku pariye hiyeg aharitne igiska amadgaya inin, igkis tayuhpikanek arit mbayka, igkis tuguhnek arikut Satanas giteyni. Igkis kowtyakvuhaw amin arakembet ku pariye kane kabay. Nikwe in humaw ke teybe adahan gikinseptenkis, adahan gitugaseptenkis, adahan gibikeseptenkis hawata adahan giwhmaseptenkis.

¹⁰ Ku wis ba ubetkatrun akak karukri, ini akavuska adahan wis keh arakembet kane kabay. Gaytakis hiyeg ku pariye aharitne karukri igkis kuwis miniwvi ariw Uhokri gihiyekemni igkis kuwis kawihkis ka aynsima kayahwaki givititkis.

Kehnaba madikte ku pariye Uhokri aya pit

¹¹ Pisme, Timotyu, pis awayg gidahan Kiyavwiye Uhokri. Nikwe tukuhwepnaba ariw madikte ini hiyakemniki mbeyevye. Aharitnaba adahan pis keh kabaykanen adahan pis wew akak Uhokri gihiyekemninen. Kamaxwanaba givitit kabayntiwa. Bateknaba gikakkis piyakivwi hiyeg. Bateknaba gikak Kiyavwiye Uhokri. Misakwanaba kamaxwenene givitit abet mbeyne. Ikaw huwipegevye.

¹² Mpiksawnaba keh kibeyne annivwit gidahan Kiyavwiye Uhokri ku kavit wixwiy kamaxwa. Ikawnaba ke pahavwi suwtatbe ig kerye gidahan gikivara akak madikte gawaygi. Mpiksawnaba adahan pis inyewa aymuhwa gimun Kiyavwiye Uhokri adahan avanenekwa. Adahanikwa ini ig Kiyavwiye Uhokri humekwep. Kibeyne, pis kuwis kinetihwa gimin akak madikte piboka gitkis ka aynsima hiyeg.

¹³ Kuri nah ikene pihiyekemni giwtrik Kiyavwiye Uhokri ku pariye keh madikte hiyeg aymuhwa. Ka ba pukuhpaw gibohrikis kuri. Kiyemina gimin Cristo Jesus ku samah ig ka pukuhpaw gibohri Pônsiyu Pilatus. Ig kinetihwa git akak madikte giboka.

¹⁴ Nah aya pit adahan pis keh madikte ku pariye Kiyavwiye Uhokri gikehkisni pit. Avuriwnaba pihiyekemni adahan in barewbet ariw taraksaki he ku aysaw ig danuh.

Uhokri kumaduka madikte ku pariye kumadukenevwi

¹⁵ Ku aysaw gihawkanavrik danuh ig Cristo hiyapkiska wotwiynek gavit Kiyavwiye Uhokri. Kibeyne, ig Kiyavwiye Uhokri ka gabayisima. Ignewa kumaduka madikte. Yuma pahavwinema kema igma. Ig ikivaratviyene gikivarakis. Ig kumaduka madikte ku pariye kumadukenevwi.

¹⁶ Ignewa ku pariye kane miyati. Yuma pahavwinema dehetniye kema igma. Ig misakwa abet kabutniki ku kiney ka ik adahan wis danukwa atere. Yuma pahavwinema hiyeg hiyavgi. Ig kawnata ikwa adahan wis hiyavgi. Ig ka gikiytanisima, ig ka gidatnisima adahan avanenekwa. Ameh.

Amawka igisavye igisye akak gikehnikis kabayka

¹⁷ Ikinaba gihiyekemnikis hiyeg ku pariye igisavye akak gewkanbetkis amedgene inin adahan igkis ka ikaw kabaytema giwkis nawenyevwi hiyeg. Awnanaba gitkis adahan igkis ka iveg avitit gikakurakis, ku pariye kane ik adahan wis iveg nivitit. Awnanaba gitkis adahan igkis iveg givititnen Kiyavwiye Uhokri. Ig Kiyavwiye Uhokri ka mavukwiyema, ig iki wotwiy madikte kabayka akak madikte gibetki kahadbe wixwiy batek.

¹⁸ Ikinaba gihiyekemnikis adahan igkis keh ka aynsima kabayka gikakkis hiyeg, adahan igkis igisye akak gikehnikis kabayka, adahan igkis ka mavukwiyema, adahan igkis ahegbet adahan amnihne hiyeg.

¹⁹ Ku igkis keh hene, igkis darihkisne igiska inurikyene igkis avuriwne givitkis adahan ku pariye nehmnikuhpiye gimkatkis. Ayge nikwe igkis darih ini dehetniki ku pariye kane awaygisima.

Ka muwaka isahkiswa ariw ini ku pariye Uhokri avuriwse pit

²⁰ Timotyu, ka muwaka isahkiswa ariw ini ku pariye Kiyavwiye Uhokri kuwis ekke piwakuwit. Higihwanaba ariw kinetihwaki ku pariye waditnevyenen ku pariye kane ekkenema Uhokri gihiyekemni. Ka ba ataybiswa gitkis neras ba gimeksakis ku pariye ikawnamahkis ke wotbe igkis hiyakemniyevwibe.

²¹ Gaytakis hiyeg ku pariye ikawnamahkis hiyakemniyevwi hene, igkis miyehe gikamaxwankis givititak Kiyavwiye Uhokri. Kiyavwiye Uhokri gabay pikaknek.