1 Timótyu 5 - Uhokri Gahegbetawni Nukune akak Sawmus

Ikinaba hiyeg gihiyekemnikis akak huwivgaki

¹ Ku pahavwi awayg kiyavwiye taraksa, ka ba himahgi akak pihawnema. Heneme ikinaba gihiyekemni akak huwivraki. Pis kinetihwa gikak ke kinetihwenebe gikak pigbe. Gikakkisme takwaviye pis kinetihwa gikakkis kewa gikakkisbe pisamwivwibe.

² Gukakkisme kiyavunogben pis kinetihwa gukakkis kewa pis kinetihwenebe gukak pinagbe. Gukakkisme himanovwiyo pis kinetihwa kewa gukakkisbe pisamuvwibe. Ka muwaka ayguhwa guminkis.

Amawka leglis avuriw madankunovwi

³ Amawka leglis kiyatha madankunovwi ku pariye yumanano gukavriwtenkis.

⁴ Heneme ku pahavu madankuno eg kakamkayh, ku eg kahiwhi, igkisnewa kis adahan avuriwgu gidahan Kiyavwiye Uhokri. Amawka ku igkis diyuhkis guwak adahan gaymuhaktiwni. Hennebaki Kiyavwiye Uhokri gimawkan.

⁵ Egme pahavu madankuno ku pariye yumanano gukavriwten, amawka ku leglis hiyak gukak. Ku eg kamaxwano givitit Kiyavwiye Uhokri adahan ig amnihgu, ku eg piriyepkawno git takunipti avanenekwa, nikwe amawka ku leglis avuriwgu.

⁶ Egme pahavu madankuno ku pariye he kehno gubetkinenwa ay amadga inin, eg ke wotbe eg kuwis miyovyobe giw Kiyavwiye Uhokri. Nikwe leglis ka muwaka hiyak gukak.

⁷ Ikinaba gihiyekemnikis Jesus gihiyegavu ayge adahan igkis iha inakni iwit kahadbe igkis ikaw Uhokriyanbetnewa kane taraksevyema.

⁸ Ku pahavwi ka avuriw gikebyi, ku ig ka avuriw gikamkayh, ku ig ka avuriw gihayo, ku ig ka avuriw gaymuhten, nikwe ig ka hiya igma ikaw ku ig Kiyavwiye Uhokri gihiyega. Mmanawa avim ini ig ka wewnema kema pahavwi Uhokriyanma. Ig pi mbayte giw pahavwi ku pariye kane Uhokriyanma.

Kaniynaba kabayno tino adahan hiyakno gukakkis tinogben

⁹ Ku pahavu madankuno muwaka ini iwetrit adahan hiyakno gukakkis tinogben, amawka ku eg mpiyasa puguhkunabu madikwa (60) kamukri gaw. Amawka ku eg kigihguhwa pahavwiwa gugihgi. Eg ka maytwig adahan kamax pahavwiwatma.

¹⁰ Amawka ku eg hiyakan ku eg avanenekwa kehno kabayka. Amawka ku eg kuwis aymuh gukamkayuvwi kabayntiwa. Amawka ku eg kuwis amava hiyeg kabayntiwa guvinekut. Amawka ku eg kuwis hiyak gikakkis gukebyuvwi Jesus gihiyegavu akak madikte kiyathaki. Amawka ku eg kuwis amnih ku pariye hiyeg hiyepnevwi mbeyne. Amawka ku eg kuwis ikatuswa adahan eg kehno kabayka gidahankis madikte hiyeg.

Kabayte madankunovwi maripkaw akiw

¹¹ Norasme madankunovwi ku pariye kote kiyavunptawte kabayntiwatma, ka ba iki ini iwetrit gutkis adahan egkis hiyakno gukakkis tinogben. Mmanawa nawenetke egkis maripkewkerehte akiw, ayge nikwe egkis miniw ariw Cristo gannivwi.

¹² Ayge nikwe ku egkis miyehe madikte ku pariye gahegbetankis gunetnikis adahan egkis hiyaknos gukakkis tinogben gidahan Cristo, ayge nikwe egkis ka ikaka kabaynoma.

¹³ Hawata akiw nawenetke egkis humaw he mabivuhwanonenwa awaku ku samah egkis danuhpanosnenwa muwapuw paytwempu. Pi mbayte akiw nawenetke egkis matekbetano nawenyevwi hiyeg gihawkankis. Nawenetke egkis ba gunetnabyukis. Nawenetke egkis kinetihwa amin ku pariye kane kabay adahan egkis kinetihwa nimin.

¹⁴ Nikwe numawkan egkis madankunovwi ku pariye kotenano kiyavunptawte amawka egkis maripkaw akiw. Numawkan egkis kakamkayh. Numawkan egkis avuriw gumunyavukis kabayntiwa. Marihwakam uvetunyavu ka ik adahan awna guminkis ku egkis mahayakemnihwanonenwa.

¹⁵ Mmanawa gaytakis noras kuwis miniwvi ariw Cristo gihiyekemni adahan egkis ihpanokis Satanas gihiyekemni.

¹⁶ Ku pahavu tino ku pariye kamaxwano givitit Kiyavwiye Jesus, ku eg kakebyi madankuno, kiskama eg hiyak gukak kahadbe egme ka misakwa guduhyamadga leglis. Ayge nikwe ik adahan leglis avuriw madankunovwi ku pariye yumanano gukavriwtenkis.

Amawka Jesus gihiyegavu hiyak gikakkis giwewkistenkis

¹⁷ Hiyeg kiyavwiyegben ku pariye wewkisnevwi Jesus gihiyegavu kabayntiwa, igkis muwaka adahan igkis kiyathaka kabayntiwa. Neras ku pariye pi kannivwite adahan ekkenes Kiyavwiye Uhokri giwn, adahan kannuhekne amin Uhokri gihiyekemni, amawka ku leglis pi kiyatigkiste adahan pi hiyakte gikakkis.

¹⁸ Mmanawa Uhokri gannasan awna: — Ku aysaw yivig pak kannivwiye mutukene fahhin ayak, ka yi muwaka wanak gibiy adahan mpitig adahan ig ka ax ariwntak ini fahhin ayak. Hawata akiw Uhokri gannasan awna: — Ku pahavwi kannivwiye yidahan, pugamawka yis katiwnihgi.

Ka ba ataybiswa git pahavwi ku pariye awna gimin Jesus gihiyegavu giwewkistenkis

¹⁹ Timotyu, ku pahavwi danuh pit ig awna gimin pahavwi ku pariye wewkisne Jesus gihiyegavu ig awna ku ig taraksevye, ka muwaka ataybiswa git. Heneme ku kibite hiyeg danuh pit, nawenetke piyana ba mpana gikebikis, ku igkis kinetihwa pit gimin ku ig taraksevye, nikwe ka sam adahan pis tima ginetnikis.

Ku pahavwi giwewkistenkis Jesus gihiyegavu ku ig taraksevye, himahnigba

²⁰ Ku inyewa ig taraksevwa, amawka pis himahgi ay giwtrikkis madikte Jesus gihiyegavu kahadbe igkis timapni hene, igkis avisase ku nawenetke igkis hawata tarakse hawata akiw.

²¹ Timotyu, nah ikene inakni hiyakemniki pit giwtrik Kiyavwiye Uhokri, giwtrik Cristo Jesus, giwtrikkis ahj barewvityevwi. Ihpanaba inakni nuwnuh kabayntiwa. Ka sam ku ig pikagmada. Kawnata sam ku ig ka pikagmadama. Ka ba mpiyasa pahavwinema gitaraksan henenwatma. Amawka pis hiyak gikakkis madikte hiyeg hehpekuye.

Ka ba kaniy pahavwi pahayenema adahan ig wewkisne Jesus gihiyegavu

²² Ku aysaw pis iki annivwit git pahavwi adahan ig wewkisne Jesus gihiyegavu, ka muwaka iki git pahayenema adahan. Ka iwawhaw iki git. Nawenetke ig taraksevye hiyeg. Ku pis ka avuriw kabayntiwatma baki ig ikaw Uhokriyanwatma, ku pis iki ini gannivwi git pahaye adahan, ayge nikwe ku hiyeg hiyakni ku ig taraksevye, ayge nikwe igkis ikiy ku pis batek akak ini gitaraksan. Amawka ku pis ka keh hene. Amawka piw pes barewbetnenekwa.

²³ Kuri pis higepne unnenwa kahadbe piw pes barewbetnenekwa, kahadbe hiyeg ka ikiy ku pis uwkihwatruvye. Heneme ka sam pis higap aynesa win adahan pivey, adahan pitun, mmanawa pis inpawa kakahri.

²⁴ Avit pis iki annivwit git pahavwi adahan ig wewkisne Jesus gihiyegavu, amawka pis avuriwgi baki ig yumahwatma gitaraksan. Gaytakis hiyeg gitaraksankis ka mahikonema. Nikwe wis ka muwaka avuriwgikis baki igkis kataraksanema. Gaytakisme hiyeg ka kiberema wis uti gitaraksankis.

²⁵ Hawata akiw gaytakis hiyeg gihiyekemnikis kibeyne in ka mahikonema. Gaytakisme gihiyekemnikis kibeyne, in mahiko mmanawa yuma hiyeg ahiyekten ku aysaw ig keh kabayka, heneme ku wis avuriw, nikwe wis hiyakni.