1 Timótyu 4 - Uhokri Gahegbetawni Nukune akak Sawmus

Kinisekevutnevwi awna ku im ka kabay adahan wis ax

¹ Ig Kiyavwiye Uhokri Gitip akki wot huwewehe ku aysawnemenek gaytakis hiyeg isahkisenek gikamaxwankis givititak Cristo. Igkis miniwvi giw mmanawa igkis kinikiswe arit gihiyekemnikis wavityempu ku pariye kiniseknevwi.

² Neras wavityempu gihiyekemnikis in ekkepka gitkis neras hiyeg gavitkis hiyeg ku pariye ikawnamahkis ke wotbe igkis kibeynevwibe hiyeg bawa igkis awna he wasaymkanen. Igkis ka hiyak ku pariye maraki.

³ Avim ini igkis awna: “Kiyavwiye Uhokri ka muwaka wis maripkaw. Ig kawnata muwaka wis ax im.” Heneme im ka sam wis axni. Ig Kiyavwiye Uhokri kehe im adahanikwa wixwiy axni akak batekka. Ig muwaka wixwiy kabayhig adahan ini im. Wixwiy ku pariye kamaxwenevwi givitit Cristo, wixwiy ku pariye hiyeknevwi Uhokri gihiyekemni inyewatnene, ig muwaka wixwiy ax, wixwiy kabayhig adahan ini im.

⁴ Madikte axka ku pariye ig Kiyavwiye Uhokri keh in kibeyne. Wis ka muwaka tukuhni. Heneme amawka wis amavin akak piriyepkawka, wis kabayha Kiyavwiye Uhokri nidahan.

⁵ Im kibeyne awaku Kiyavwiye Uhokri Gannasan awna ku in kibeyne. Hawata in kibeyne awaku avim ini ku aysaw wixwiy axni, wixwiy kabayha Kiyavwiye Uhokri adahan ini im.

Mpiksaw iwi Uhokri gihiyekemni

⁶ Ku pis akki inakni hiyakemniki gitkis ukebyuvwiy, nikwe pis humaw kibeyne ibukti gidahan Cristo Jesus. Amun ini pis aymuhwene ka ininewatma akak im. Pis aymuhwene akakwata Kiyavwiye Uhokri giwn amin ukamaxwanwiy, akak gihiyekemni kibeynewa. Kibeyne, pis inyewa wewne nikak kabayntiwa.

⁷ Heneme ka muwaka ataybiswa arit amekenegben giwnkis ku pariye he inetitapnen he mahayakemnikinen, in ka kinetihwa amin Uhokri gihiyekemni. Pisme iwinenekwa innenwa Uhokri gihiyekemni. Ku samah pahavwi suwtat mpiksaw ikene givit adatni pisme mpiksaw iki pihiyekemni adatni akak Uhokri gihiyekemni.

⁸ In kabay aynesa adahan wis ikene uvit adatni, heneme in ka aynsima kabayte akiw adahan wis ikene uhiyekemni adatni akak Uhokri gihiyekemni. In kabay ka aynsima. Mmanawa gihiyekemni keh wis aymuhwa kabayntiwa ay amadga inin hawata aynte inurik.

⁹ Inakni hiyakemniki in ka waditnevyenenma. Kiskama madikte hiyeg kamaxwa nivitit.

¹⁰ Wis kuri mpiksaw akak madikte udatni adahanikwa hiyeg aymuhwa akak ini gihiyekemni. Mmanawa wis iveg ta gimkatnen Kiyavwiye Uhokri dehetniye adahan ig keh igkis aymuhwa akak gihiyekemni. Ig amnih madikte hiyeg, heneme ig pi amnihte neras ku pariye kamaxwenevwi givitit.

Kannuhnaba hiyeg amin Uhokri gihiyekemni

¹¹ Kannuhnaba hiyeg amin inakni hiyakemniki. Ikinaba gihiyekemnikis adahan igkis wew nikak.

¹² Wewnaba hiyakemun adahan hiyeg ka miyathap awaku ku samah pis kote kiyavwite. Ikawnaba Uhokriyanbetnewa adahan igkis ikaw hawata ke pisbe. Wewnaba kabayntiwa gibetkis adahan pis humaw gikannuhtenkis adahan igkis wew hawata ke pisbe. Akkanaba gitkis adahan igkis kinetihwa gikak Uhokri gihiyekemni, hawata adahan igkis wew akak Uhokri gihiyekemni, adahan igkis amnih hiyeg akak Kiyavwiye Uhokri gamnihra ay givitkis, adahan igkis kamaxwa givitit Kiyavwiye Jesus kabayntiwa, adahan igkis wew akak gihiyekemnikis barewbetye.

¹³ Ku aysaw nah yuma ayge, mpiksawnaba ivegboha Uhokri gannasan gitkis neras Jesus gihiyegavu. Wagahkisnaba gihiyekemnikis akak ini gannasan. Kannuhaknaba nimin akak madikte piboka.

Kehnaba ku pariye Uhokri gikehkisni pit

¹⁴ Ka ba miniwbetaw ariw ini Kiyavwiye Uhokri gannu ku pariye ig ike pivitit minikwak avim ini ku aysaw Uhokri gawnevevu kinetihwene pit akak iwit ku pariye pes giwntak Kiyavwiye Uhokri, avim ini ku aysaw piwewkistenvu sarayh giwakkis pivitit igkis piriyepkaw pidahan adahan ikene pit pannivwi gidahan Kiyavwiye Uhokri. Ayge avim ini ig Kiyavwiye Uhokri ike gannu pivitit.

¹⁵ Timotyu, kehnaba madikte ku pariye Kiyavwiye Uhokri gikehkisni pit. Ikatuswanaba nit. Kahadbe madikte hiyeg hiyap ku samah pis tiviknene nikak.

¹⁶ Avuriwnaba pihiyekemni adahan pis wew kabayntiwa. Avuriwnaba hawata adahan pis kannuhak kabayntiwa. Avanenekwa pis wew wadit. Avanenekwa pis kannuhak wadit. Ku pis mpiksaw keh hene, pis isahptawnek ariw madikte pitaraksan adahan pis danuhne git Kiyavwiye Uhokri. Hawata neras timepnevwi piwn ignes isahptawata.