1 Timótyu 3 - Uhokri Gahegbetawni Nukune akak Sawmus

Kaniynaba kibeynevwi hiyeg adahan ignes humaw Jesus gihiyegavu giwewkistenkis

¹ Kuri Timotyu, nah akkite pit pahat inetit akiw ku pariye kane waditnevyenenma. Ku pahavwi aharitne humaw giwewkistenkis Jesus gihiyegavu, in kibeyne annivwit ig aharitne.

² Ini annivwit in kibeyne, nikwe amawka ig pahavwi ig kibeyne hiyeg hawata. Amawka ku ig ikaw Uhokriyanbetnewa kane taraksevyema. Amawka ku ig pahavuwa gihayo. Amawka ku ig kannuh avuriw gihiyekemni kabayntiwa. Amawka ku ig wew akak kibeyne hiyakemniki. Amawka ku ig ikaw kiyate. Amawka ku ig ka giyaknisima amava hiyeg givinekut. Amawka ku ig kannuh kannuhak amin Uhokri gihiyekemni.

³ Amawka ku ig ka uwkihwatruvyema. Amawka ku ig ka kamabyanpiyema. Amawka ku ig ka gihiyegihwanisima. Amawka ku ig ka iniyak. Amawka ku ig ka batekatruvyema akak karukri.

⁴ Amawka ku ig kumaduka gimunyavu kabayntiwa. Amawka ku gikamkayuvwi kiyatig, ihpatrupne giwn.

⁵ Mmanawa ku pahavwi ka kannuh kumaduka gimunyavu, nikwe ig kawnata kannuh avuriw Kiyavwiye Uhokri gihiyegavu.

⁶ Amawka ku ig kuwis ayiparivye ariwntak ku samah ig wagese gihiyekemni. Ku ig inekutnate wageswa, nawenetke ig hiyapni hene, ig ikawvarihte kabayte giwkis gikebyuvwi awaku ku samah inekutnate ig wageswa adahan giwewkistenkis. Ku ig ikaw hene, nikwe ig biyukse giwetrinek hawata ke Satanasbe awaku ku samah igme ikawvari ke wotbe ig kabayte giw Kiyavwiye Uhokri.

⁷ Hawata akiw, amawka ku pis kaniy pahavwi ku pariye kibeyne hiyeg giwtrikkis hiyeg ku pariye kane Uhokriyanvuma. Ku ig ka kibeynema giwtrikkis, nawenetke ignes awna gimin. Akak ini Satanas mpithebdih gannivwi gidahan Kiyavwiye Uhokri.

Kaniynaba kibeynevwi hiyeg adahan hiyekne gikakkis Jesus gihiyegavu

⁸ Kuri, uya kinetihwa giminkis hiyeg ku pariye muwaka ini iwetrit adahan hiyekne gikakkis Jesus gihiyegavu. Amawka ku ignes hawata ikaw kiyate. Amawka ku igkis ka pitenmebetnema giwnkis. Amawka ku igkis ka uwkihwatruvyema. Amawka ku igkis ka miyarhaw aharit ariknawnema, igkis miyehe gikidsavyakis.

⁹ Amawka ku igkis kamaxwa kabayntiwa givitit Cristo ku pariye hiyeg minikweknene kotenene hiyakte. Amawka ku gihiyekemnikis barewbet ariw taraksaki gikakkis hiyeg.

¹⁰ Avit pis kaniy pahavwi amawka ku pis avuriw gihiyekemni kabayntiwa baki ig ikewnewatma Uhokriyanbetnewa. Ku ig ikaw Uhokriyanbetnewa, nikwe ik adahan ig kawetri adahan hiyekne gikakkis Jesus gihiyegavu.

¹¹ Amawka ku egnes gihayokis hawata wew kiyate. Amawka ku egkis ka awnatruvyoma giminkis nawenyevwi hiyeg. Amawka ku egkis kannuh avuriw guhiyekemnikis kabayntiwa. Amawka ku egkis ik adahan hiyeg kamaxwa guvititkis ku egkis ka kinisti aynesnima.

¹² Amawka ku awaykemni ku pariye hiyeknevwi gikakkis Jesus gihiyegavu amawka ku igkis pahavuwa gihayokis. Amawka ku igkis kumaduka gimunyavukis kabayntiwa payak gikakkis gikamkayuvwikis.

¹³ Ku igkis hiyak gikakkis Jesus gihiyegavu kabayntiwa, ayge nikwe igkis humaw kiyatye giwtrikkis hiyeg. Ayge igkis ik adahan kinetihwa akak gibokakkis amin gikamaxwankis givitit Cristo Jesus.

Jesus gihiyegavu igkis Uhokri givin

¹⁴ Nah ikene pihiyekemni kuri amadgatak inin kagta, heneme nuvewkan nahwa danuh atere pitnek kuwewanek.

¹⁵ Ku nah ayivwihwe danuh atere pit, ka sam. Inin kagta kuwis ay piwaku adahan ekkene pit adahan ku samah pis huwitha Kiyavwiye Uhokri gihiyegavu ayge. Wixwiy gihiyegavu wixwiy ke givinbe Kiyavwiye Uhokri dehetniye. Wixwiy humaw ke paha paytbe adahan abeyheki ini Uhokri gihiyekemni inyewatnene ku pariye ay umunwiy.

Jesus igyewa Uhokri

¹⁶ Henewatbaki in. Ini Uhokri gihiyekemni in kabayntiwa in. Minikwak hiyeg ka hiya avuhpak. Kurinme wixwiy hiyak. Inneki keh wixwiy paksig han: “Ig Cristo wageswe igyewa hiyeg ihtikekne amadgaya inin. Hawata ig Uhokriwa ig. Ig gitiphewne Uhokri inurikyene. Ig ekkepka ta gitkis madikte ahj inurikyene. Hawata ig ekkepka ta gitkis madikte hiyegviyenevwi amedgene inin. Ig amavaka gavitkis hiyeg muwapuw amadga inin. Hawata ig amavaka inurikut akak madikte gikiytani.” Henewatbaki wixwiy kiyatig wavanwekwey.