1 Timótyu 2 - Uhokri Gahegbetawni Nukune akak Sawmus

Piriyepkawnay gidahankis madikte hiyeg

¹ Pitatye nah aya pit adahan pis aya piriyepkawka gitkis Jesus gihiyegavu ayge. Numawkan yis piriyepkaw ka aynsima gidahankis madikte hiyeg, yis aya git Kiyavwiye Uhokri adahan ig amnihgikis, adahan ig avuriwgikis. Abet ini yiviryepkawni yis kabayha Kiyavwiye Uhokri gidahankis.

² Piriyepkawnay gidahankis ukivarawiy ku pariye kumadukenevwi uwaxigwiy. Piriyepkawnay gidahankis madikte ukivarawiy amadgayavu inin kahadbe wixwiy misakwa kabayntiwa akak pasamraki, kariswavu, kahadbe ik adahan wixwiy wewnene gikak Kiyavwiye Uhokri wixwiy ikatuswenene git.

³ Ini uviryepkawniwiy kabay giwtrik wamnihtenwiy Kiyavwiye Uhokri. In keh ig batek.

Uhokri muwaka madikte hiyeg isahptaw

⁴ Mmanawa ig muwaka madikte hiyeg isahptaw ariw givathawnikis adahan igkis danuhne git Kiyavwiye Uhokri. Ig muwaka madikte hiyeg pukuhpa gihiyekemni inyewatnene.

⁵ Mmanawa ignewa pahavwiwa Kiyavwiye Uhokri gidahankis madikte hiyeg. Hawata akiw ay pahavwiwa hiyeg ku pariye danuhkis madikte hiyeg git Kiyavwiye Uhokri. Igi Jesus Cristo ku pariye wageswevye awayg amadgaya inin.

⁶ Ig Jesus Cristo ikise giwetri aynte inurik kahadbe wixwiyme uti uwetriwiy ayge hawata. Ig ikewvi adahan ig umahkiswe gidukwenavrikis madikte hiyeg. Ini areketni huwewe ku ig muwaka madikte hiyeg isahptaw. Kibeyne, kuwis danuh ahawkanavrik adahan ini gikehni ekkepka gitkis madikte hiyeg.

⁷ Inneki keh ig Kiyavwiye Uhokri awahkisun giminkis hiyeg muwapuw. Ig keh nah humaw giwatni giminkis madikte hiyeg adahan nah ekkene giwn gitkis, adahan nah gikannuhtenkis amin ku samah igkis kamaxwa givitit Kiyavwiye Uhokri, hawata amin ku samah igkis wew akak gihiyekemni ku pariye inyewatnene. Gaytakis hiyeg ka iha ku nah Uhokri giwatni, heneme nah awna inakni iwit inyewa. Ka nuwasemnima.

⁸ Nikwe numawkan awaykemni piriyepkaw muwapuw. Heneme ku aysaw igkis tarak giwakkis gimkanit Kiyavwiye Uhokri, amawka ku igkis piriyepkaw barewok ariw patahwaki. Yuma gidagonikis avit giyaknikis, igkis ka kanaktinema.

Amawka tinogben wew tuwatavyo

⁹ Egnesme tinogben, nah muwaka egnes ikaw tuwatavyo akak barewye hiyakemniki. Numawkan egnes kawih gukawihnikis ku pariye ka adahanma gumerekwetnikisma. Numawkan egnes ka iveg avitit gubereswankis amedgene inin adahan ini kehne egnes barewyo. Ine gusimsakis barewye, ine gusemnukis barewye, ine gubereswankis karukri wahano, ine gukabdakis barewyo, ka innema keh egnes inyewatma barewyo.

¹⁰ Ku egnes wew akak kabayka in ka aynsima kabayte ariw inere madikte. Mmanawa tinogben ku pariye ikawnovwi Kiyavwiye Uhokri gihiyegavu amawka ku egnes wew kehnanokwa kabayka.

¹¹ Hawata akiw amawka ku egkis lammesya tinwovu, barukibet, adahan egkis kannuhwano kabayntiwa.

¹² Nah ka isaksa pahavu tino humaw gikannuhten gugihgi. Nah ka isaksa pahavu tino kumaduka gugihgi. Amawka ku eg misakwa tinwo ariku leglis.

¹³ Nah awna inakni mmanawa Kiyavwiye Uhokri kehe ig awayg Adão eggutye, egme gihayo Eva butyo.

¹⁴ Hawata akiw, ig Adão ka kinikiswa git ner wavitye gikivarakis, heneme eg Eva kinikiswe git, in keh eg tarakse Kiyavwiye Uhokri giwn.

¹⁵ Nikwe ig Kiyavwiye Uhokri isaksa madikte tinogben kayah gukamkayhkis. Ka sam. Egkis ka mpithaka adahan egkis danuh git Kiyavwiye Uhokri. Ku egkis tiviknano kamaxwenanos givitit Cristo, ku egkis tiviknano amnihaknos, ku guhiyekemnikis barewbetye, ku egkis tiviknano wewnanos akak tuwatka akak kibeyne hiyakemniki, ayge nikwe egkis danuh git Kiyavwiye Uhokrinek.