1 Timótyu 1 - Uhokri Gahegbetawni Nukune akak Sawmus

Nah Pol awahkis kabayka pimin

¹ Nah Pol, ku pariye Jesus Cristo giwatni, nah awahkis kabayka pimin. Nah awahkiska gavit wamnihtenwiy Kiyavwiye Uhokri. Hawata nah awahkiska gavit Cristo Jesus ku pariye wixwiy iveg givititnen.

² Nah awahkis inin kagta pimin Timotyu. Pis kewa nukamkayhbe nutuh mmanawa inyewa pis kamaxwene givitit Kiyavwiye Jesus ku samah nah ekke pit. Wigwiy Kiyavwiye Uhokri gikak Ukivarawiy Cristo Jesus gabaykis akak gamnihrakis pikaknek. Igkis kariswehse piyakninek.

Amawka hiyeg ka kinetihwa amin hiyakemniki ku pariye waditnevyenen

³ Timotyu, nah muwaka pis misakwa ayge avit paytwempu Efesu ku samah nah kuwis awna pit amakohnokwa avit nutepkemni avitit Masedôniyamnaw. Numawkan pis misakwa ayge adahan pis gimaptentenkis neras hiyeg ku pariye kannuhekne amin hiyakemniki nawenyewa ariw udahanwiy. Awnanaba gitkis kihawnate adahan igkis ka keh hene akiw.

⁴ Igkis ikatuswa arit inetit ku pariye he inetitapnen. Igkis iki gitewkis arit amekenegben giwnkis ku pariye he waditnevyenen. Igkis kinetihwa nimin ka matiswati. Timotyu, ikinaba gihiyekemnikis adahan igkis miniw ariw inere. Akebi inere iwit ka wagahkis ukamaxwan givitit Kiyavwiye Uhokri. In he tuguhkisnen ukamaxwan givititak. In he kehnenen hiyeg iniyak pawtak.

⁵ Nah mpithesene neras hiyeg pit mmanawa numawkan madikte Kiyavwiye Uhokri gihiyegavu ayge batekak pawtak. Numawkan igkis batekak pawtak avititakwa giyaknikis. Numawkan gihiyekemnikis barewbet ariw taraksaki. Numawkan igkis inyewa kamaxwa givitit Kiyavwiye Uhokri kabayntiwa. Ayge nikwe igkis wew batekak pawtak.

⁶ Igkisme neras hiyeg kannuhekevutnevwi taraksavye igkis miyehe akebi inakni hiyakemniki. Igkis he awnbetevi amin hiyakemniki ku pariye waditnevyenen, ku pariye kane wagahkis hiyeg gihiyekemnikis.

⁷ Igkis muwaka giwkis ibakhaw ku igkis kibeyne kannuhekevutnevwi amin amekene Moís gikumadukan. Heneme igkis ka inyewatma pukuhpa inakni ku kamin igkis kinetihwa. Igkis awna: “Usuh hiyak madikte kabayntiwa.” Bawa igkis ka hiyak ariknawnema.

Moís gikumadukan kawih adahan hiyeg taraksavye

⁸ In huwewe wot ku amekene Moís gikumadukan kabay adahan ekkene wot utaraksan. Ku wis kawih gikumadukan hene ku samah Kiyavwiye Uhokri gimawkan, in kabay.

⁹ Heneme hiyeg wadityevwi igkis ka muwaka kumadukaki adahan gimaptentenkis adahan igkis ka keh mbayka. In he muwakapka gidahankisnen hiyeg taraksavye. In kawih gidahankisnen hiyeg karatonavye, meksatruvye ku pariye kane kiyatha Kiyavwiye Uhokri. In kawih gidahankisnen hiyeg ku pariye kane hiyak ba Kiyavwiye Uhokrima ay. In kawih gidahankis hiyeg ku pariye miyathenevwi Kiyavwiye Uhokri. In kawih gidahankis hiyeg ku pariye umah gigkis, hiyeg ku pariye umah ginagkis, hiyeg ku pariye umehekevutnevwi.

¹⁰ Inakni kumadukaki kawih adahan hiyeg mahayakemnavye, adahan tinogben egkisweke kamaxekbet, adahan awaykemni igkisweke kamaxekbet. In kawih adahan amevwavye ku pariye amevwi giyakikis hiyeg, adahan hiyeg wasaymavye, adahan hiyeg kiniseknevwi. In kawih adahan madikte hiyeg ku pariye taraksa ini Uhokri gihiyekemni ku pariye kibeynewatnene.

¹¹ Mmanawa ig Kiyavwiye Uhokri ka gabayisima. Gihiyekemni ka nikiytanisima. Kibeyne, ig iki nuwakuwit adahan nah ekkene inakni gihiyekemni gitkis hiyeg.

Nah taraksevye heneme kibeyne Uhokri kaniyven

¹² Kibeyne gidahan Ukivarawiy Cristo Jesus. Ignewa iki nawaygi adahan nah ekkene inakni gihiyekemni. Ig kaniyven adahan nah kannivwiye gidahan. Nah ka kiseweknema adahan ig kaniyun heneme ig kaniyven, ig iveg nuvitit adahan nah wewkisne gannivwi.

¹³ Nah ka kiseweknema adahan ig kaniyun mmanawa minikwak nah mbeyhene Kiyavwiye Jesus giw. Nah awna ku ig ka giwntakma Kiyavwiye Uhokri. Avim ini nah hiyapkisne mbeyne gitkis gihiyegavu ay. Nah arewhene gitkis. Nah taraksene gikak Kiyavwiye Uhokri ka aynsima, heneme ig amnihpen ig bayahminevun ariw nutaraksan mmanawa nah ka hiyak hawkri, mmanawa avim ini nah kote kamaxwate givitit.

¹⁴ Nutaraksan ka aynsima, heneme ig Ukivarawiy gabay nukakuh in pi kiyeste ariw ini nutaraksan. Inneki keh ig keh nah kamaxwa givitit, ig ike nuvitit ini gamnihra ku pariye udahanwiy ku samah wixwiy pahavwiwa gikak Cristo Jesus.

¹⁵ Timotyu, nah akkite pit pahat inetit ku pariye kane waditnevyenenma, ku pariye ik adahan madikte hiyeg kamaxwa nivitit. Inakni inetit gimin Cristo Jesus ku samah ig danuh atan amadgat inin adahan amnihpiye taraksavye kahadbe ignes isahptaw ariw gitaraksankis adahan igkis danuhnes git Kiyavwiye Uhokri. Nah pi taraksate giwkis madikte taraksavye.

¹⁶ Heneme inneki keh ig Jesus Cristo amnihpen. Ig amnihun adahanikwa nah humaw areketni adahan ku samah ig ka giyaknisima akak hiyeg ku pariye pi mbaytenene. Aysawnemenek hiyeg ku pariye butyevwi kamaxwevye givitit, igkis hiyapni hene ku samah ig kiyakniye nukakuh, igkis iwi gawaygikisnek ku ig kiyakniye gikakkis hawata.

Kibeyne gidahan Uhokri

¹⁷ Kibeyne gidahan Kiyavwiye Uhokri. Ig Ukivarawiy adahan avanenekwa. Ignewa dehetniye. Ig kane hiyapkarati akakma wowtyak amadgaya inin. Ignewa Kiyavwiye Uhokri. Yuma pahavwinema kema igma. Uyay kiyatig adahan avanenekwa. Uyay kabayhig takunipti adahan avanenekwa. Ameh.

Avuriw pihiyekemni akak kibeyne hiyakemniki

¹⁸ Timotyu, nah ikene pit hiyakemniki ke nukamkayhbe adahan pis kabivwiye huwitha Jesus gihiyegavu ayge. Nuwnuh huwit pakekunawa akak neras ukebyuvwiy giwnkis ta pit ku samah minikwak igkis kinetihwa pit akak iwit ku pariye pes giwntak Kiyavwiye Uhokri. Kiyeminihnaba inakni giwnkis. Inakni ikene pawaygi adahan pis mpiksaw keh kibeyne annivwit gidahan Kiyavwiye Uhokri.

¹⁹ Amawka pis kamaxwa kabayntiwa givitit Cristo. Amawka hawata pis avuriw pihiyekemni akak kibeyne hiyakemniki. Gaytakis hiyeg ka henema. Igkis hiyak ku pariye kane kabay adahan igkis keh, heneme igkisnewa mpiksaw kehni. Igkis awna: “Ka sam nah keh hene.” Ayge nikwe igkis miyehe gikamaxwankis. Igkis ikaw ke pahavwibe hiyeg ig awna: “Ka sam nah huwitha nuhmun abetiw tip.” Heneme ig sigihwenek. Ig biyuk akak gihmunek. Hennebaki igkis biyuk akak gikamaxwankis.

²⁰ Ig kiyavwiye Imenew gikak kiyavwiye Alexandre, igkis gaytakis neras hiyeg. Nah kuwis ekkevgikis giwakuwit Satanas adahan igme hiyapkisne mbeyne gitkis he igkis kannuh adahan igkis ka mbayhasa Kiyavwiye Uhokri giw hene akiw.