1 Pedru 5 - Uhokri Gahegbetawni Nukune akak Sawmus

Avuriwnabay Jesus gihiyegavu kabayntiwa

¹ Kuri nah kadahan pahat hiyakemniki yidahan yis ku pariye giwewkistenkis Jesus gihiyeravu. Nah igwata giwewkistenkis Jesus gihiyegavu ke yisbe. Nah hiyap Cristo gimiremni akakwa nuwtyak. Aysawnemenek nah hiyap gikiytani hawata payak gikak.

² Nukebyuvwi, nah aya yit, avuriwnabay kabayntiwa Kiyavwiye Uhokri gihiyegavu ku pariye ayge yimun. Avuriwnigkis kewa pahavwi muwtohvutnebe ku samah ig avuriw givigvu kabayntiwa. Avuriwnigkis akak madikte yabivwi gidahan Kiyavwiye Uhokri. Ka ba yi avuriwgikis akakma mabivwiki. Kawnata yi muwaka avuriwgikis adahan yis aharitnema karukrima. Heneme yis avuriwgikis adahanikwa kehne kabayka gidahankis.

³ Ka ba yi kabukhaw gitkis neras ku pariye ayge yiwaku. Heneme mpiksawnay wew akak kibeyne hiyakemniki giwtrikkis adahan yis humaw gikannuhtenkis kahadbe igkisme ikaw hawata ke yisbe.

⁴ Ayge nikwe ku aysaw ig Ukivarawiy danuh, ig iki yit yitiwni ku pariye dahwa adahan avanenekwa. Ini yitiwni kewa paha iyuwtibe ku pariye kis adahan kibeyne ibukti kawihni. In kane amuwyisima ku pariye gamuwyi kane hiyak tigahkati.

Tuwatasawnabay pawtak

⁵ Hawata nah aya yit takwavyegben adahan yis iha giwnkis yiwewkisten. Nah aya yit madikte yis Kiyavwiye Uhokri gihiyegavu adahan yis tuwatasaw pawtak. Mmanawa Uhokri gannasan awna: “Kiyavwiye Uhokri suguh neras ku pariye kane kumadukasewkere git. Heneme ig iki gawaygikis neras ku pariye tuwatasewviye gitivut.”

⁶ Nikwe tuwatasawnabay gitivut Kiyavwiye Uhokri ku pariye kane gidatnisima. Ayge nikwe ku aysaw ahawkanavrik danuh, ig iki yikiytani yivititnek.

Uhokri hiyak ukakwiy

⁷ Akkanabay madikte yikiyimwihwan giwakuwit Kiyavwiye Uhokri mmanawa ig amnihwiy ig hiyak ukakwiy.

Satanas amewvari uhavu ke kawokwinebe

⁸ Avuriwnabay yihiyekemni kabayntiwa. Wewnabay pukuhpaw gavit uvetunyawiy wavityempu gikivarakis. Mmanawa ig amewvari ke pahavwi kawokwinebe mativwevyebe ku pariye ivegvene pahavwi hiyeg adahan gaxni. Igme amewvari adahan ukawihpitniwiy.

⁹ Ka ba yi iki iwetrit git aynesnima. Suguhnigbay akak madikte yikamaxwan givitit Kiyavwiye Uhokri. Kiyeminanabay ku muwapuw amadga hawkri ukebyuvwiy Jesus gihiyegavu igkis hiyepnes mbeyne hawata ke yisbe.

Yihiyvan mbeyne ka adahan ayivwadima

¹⁰ Ka sam. Kiyavwiye Uhokri ka gamnihrasima ukakwiy. Ig humekwewiy gimkat adahan wixwiy hiyap gikiytani adahan avanenekwa givitimpi Cristo. Henewa yis hiyepne mbeyne heneme ka adahan ayivwadima. Aysawnemenek igwa Kiyavwiye Uhokri wadithebdih madiktenek. Ignewa iki yawaygi yit. Ignewa yiyawka. Ig keh yis kamaxwa givitit kabayntiwa adahan yis ka isahkis yihiyekemni aynesnima.

¹¹ Kibeyne gidahan Kiyavwiye Uhokri. Ig ka gidatnisima adahan avanenekwa akiwka akiwkanek. Ameh.

Ka ba yi isahkiswa ariw Uhokri gamnihra

¹² Nukebyuvwi, inakni aynesa nnetni yit nah annasin git ukebyi kibeyne Sílas. Nah nuvewkan ikene yawaygi. Nuvewkan nah ekkene yit ku Kiyavwiye Uhokri inyewa amnihwiy. Ka yi muwaka isahkiswa ariw ini gamnihra.

¹³ Madikte yiyakivwi Uhokri gikanyanvu ku pariye ay Babiloniya, igkis awahkis kabayka yimin. Nukamkayh Markus hawata.

¹⁴ Aytnihaknabay pawtak nudahan akak batekka. Kiyavwiye Uhokri kariswehse yiyakninek yis madikte ku pariye pahavwiwa gikak Cristo.