1 Pedru 4 - Uhokri Gahegbetawni Nukune akak Sawmus

Miniwvinay ariw yihiyekemni minikweknene

¹ Ku aysaw ig Cristo aynete amadga inin ig umahkisne gihiyekemni amadgaya inin takunipti. Uyay wew ahegbet ke igbe adahan wixwiy umahkisne uhiyekemniwiy amadgaya inin. Mmanawa ku pariye miyavye igi ka patahwa akiw.

² Uyay ka keh uhiyekemniwiy minikweknene abetki akiw. Uyay kawih inin hawkri ku samah wixwiy aytente amadga inin adahan wixwiy kehne Kiyavwiye Uhokri gibetkinen.

³ Wixwiy kuwis kawih ka aynsima hawkri minikwak adahan wixwiy kehne ku pariye hiyeg kane Uhokriyanvuma gibetkikis. Avim ini wixwiy mahayakemnihwene, wixwiy miyarhewne, wixwiy uwkihwene, wixwiy fetya adahan puwvuhwaki, wixwiy wagesne umunwiy, wixwiy kiyathene ahehpakti batakkarad ku pariye Kiyavwiye Uhokri givetunya. Ikeyvi kuri wixwiy keh inere.

⁴ Kuri neras kane Uhokriyanvuma wakaymni udahanwiy awaku ku samah wixwiy ka wew akiw akak gihiyekemnikis ku pariye mbeyevyenen hawata inneki keh igkis mahivwihwiy.

⁵ Heneme aysawnemenek igkis akkamnihnek git Kiyavwiye Uhokri madikte ku pariye gikehnikis ay amadga inin. Ig kuwis ahegbet adahan ig hiyak gikakkis madikte hiyeg, neras ku pariye miyaravyempu gikakkis neras ku pariye kotenene miyate.

⁶ Awaku ini, inakni Cristo ginetni ekkepka gitkis neras ku pariye kuwisnene miyarap. Givitkis ute miyaka avatra gitaraksankis ke madikte hiyegbe. Heneme ka sam. Ku igkis iha inakni inetit, ganmapkisme aymuhwanek gimun Kiyavwiye Uhokri ku samah gimawkan.

Uyay kawih wannuwiy pawtak gidahan Uhokri

⁷ Nukebyuvwi, amaksemni hawkri kennesa kuwis. Nikwe avuriwnabay yihiyekemni kabayntiwa. Piriyepkawnabay takunipti.

⁸ Nah ka aynsima muwakate yis batekak pawtak avititakwa yiyakni. Mmanawa ku wixwiy batek gikakkis hiyeg, nikwe wixwiy ka aminama ariw gitaraksankis ukakwiy.

⁹ Amavanabay hiyeg yivinekut kabayntiwa akak yuma ariknawnema ehwaki avit yiyakni.

¹⁰ Wixwiy mpuse kadahanyekuye wannuwiy ku pariye Kiyavwiye Uhokri gikan uvititwiy adahan wixwiy kehne arakembet kabayka. Amawka ku wixwiy kabivwihwa kawih ini wannuwiy pawtak gidahan Kiyavwiye Uhokri.

¹¹ Ku ikaka pivitit adahan pis ekkene Kiyavwiye Uhokri giwn, amawka pis akkin ke wotbe igwa Kiyavwiye Uhokri awnene ay pivitbe. Ku ikaka pivitit adahan pis ayavekne, amawka ku pis ayavak akak madikte pawaygi giwntak Kiyavwiye Uhokri. Kehnabay madikte kahadbe Kiyavwiye Uhokri kiyathaka givitimpi Jesus Cristo. Kibeyne gidahan Kiyavwiye Jesus. Ig ka gikiytanisima ig ka gidatnisima adahan avanenekwa akiwka akiwkanek. Ameh.

Ka ba yi ikiy ku mbeyne ka danuhma yit

¹² Nukebyuvwi kibeynevwi, ka yi muwaka wakaymni adahan ini ku samah yis hiyepne mbeyne. Ka ba yi ikiy ku ini ka danuhma yit. Kawa. Henewa amawka ku in danuh wotwiy adahan hikekne ukamaxwanwiy.

¹³ Kiskama yis bateke yimin. Mmanawa yis hiyepne mbeyne hawata ku samah ig Cristo kuwis hiyap mbeyne. Innewa ku pariye keh yis hiyap ka aynsima batekka aysawnemenek ku aysaw Cristo gikiytani kahayaknek.

¹⁴ Ku yis mahivwihpika awaku ku samah yis Jesus gihiyegavu, ka sam. Amun ini yis uti ka aynsima kabaykanek. Ayge avim ini yis gitiphewne Kiyavwiye Uhokri yis kivun akak batekkanek.

¹⁵ Numawkan yuma pahavwinema yaytak hiyapkiska mbeyne git avatrama ku samah ig umehekevutne, ine avatrama ig amepye, ine avatrama ig kakehniye, ine avatrama ig matekbetene pahavwi gihawkan.

¹⁶ Heneme ku pahavwi hiyapkiska mbeyne git awaku ku samah ig Jesus gihiyega, ka sam. In ka marakima gidahan. Hiyawa ig kabayha Kiyavwiye Uhokri ku ig Jesus gihiyega.

¹⁷ Mmanawa kuwis danuh ahawkanavrik adahan hiyeg katiwnivwevye avatra gitaraksankis. Wixwiy Kiyavwiye Uhokri gihiyegavu wixwiykit katiwnivwenek. Ku pis hiyap wixwiywa hiyapkiska mbeyne wotwiy, igkiskata akiw neras ku pariye kane ihpekere Kiyavwiye Uhokri ginetni?

¹⁸ Henewa in ku samah Uhokri gannasan awna: “Ku yis hiyap hiyeg kibeynevwi mahiko adahan ignes isahptaw, igneskata patahwavye akiw ku pariye kane wewkere gikak Kiyavwiye Uhokri?”

¹⁹ Mmanawa ku igwa Kiyavwiye Uhokri muwaka wixwiy hiyap mbeyne, ka sam. Abetnewa ini mbeyne amawka ku wixwiy tiviknene kehnene kabayka adahan areketni ku wixwiy ivegnene givitit ig Uhumtenwiy. Mmanawa gikaksan wotwiy ka mpiya henentima.