1 Pedru 3 - Uhokri Gahegbetawni Nukune akak Sawmus

Amawka tinogben tuwatavyo

¹ Yis hawata tinogben, ihpanabay yigihgi giwnkis. Ku gaytakis ka ihpekere Kiyavwiye Uhokri giwn. Ka sam. Ku igkis hiyavyi ku yis kehno he kabaykanenwa, ayge nikwe ik adahan igkis wages gihiyekemnikis. Igkis wages gihiyekemnikis yuma iwit adahan awnaka gitkis.

² Mmanawa igkis hiyap ku samah yis wew akak barewye hiyakemniki, igkis hiyap ku samah yis kiyatigkis.

³ Ka yi muwaka iveg avitit yibereswan amadgaya inin adahan ini keh yis barewyo. Ine yisemnu barewye, ine yibereswan karukri wahano, ine yisimsa barewye, ka innema keh yis inyewatma barewyo.

⁴ Heneme bereswanay ay abet yihiyekemni akak ini yibereswan ku pariye kane hiyap mpiyaki. Bareswanay akak tuwatka akak kiyaknihwaki. Innewa ku pariye kibeyne git Kiyavwiye Uhokri.

⁵ Mmanawa hene noras amakanogben bereswa minikwak, noras ku pariye wadityovwi kamaxwanovwi givitit Kiyavwiye Uhokri. Egkis ihpanos giwnkis gugihgikis.

⁶ Amakano Sara eg keh hene. Eg ihpano giwn gugihgi Abraawh. Eg kanumgi “Nukivara”. Ku yis kiboka ahehpig, yis humawnek kewa guhiwhivwibe.

Amnihnay yihayo

⁷ Yis hawata awaykemni, misakwanabay gukak yihayo akak hiyakemniki. Amnihnigkisbay mmanawa tinogben yuma gawaygikis kema yisma. Heneme kiyathanigkisbay mmanawa egkis darih inwata ku pariye Kiyavwiye Uhokri gikan dehetniki payak yikak. Ku yis kiyatigkis, nikwe yuma ariknawnema adahan matekbeta yiviryepkawni.

Mpiksawnabay keh kabaykanen

⁸ Amaksemni nukebyuvwi, tuguhkisnabay yihiyekemni hehpekuye. Kayahnabay inwata ku pariye yikebyi kayah. Batekaknabay pawtak ke wotbe yisweke pakebeyeknebe guwntak pahavuwa inagti. Amnihaknabay pawtak. Kannuhwanabay kiyathak pawtak.

⁹ Ku pahavwi hiyapkis mbeyne yit, ka yi muwaka diyuhkisgi akakwatama mbeyne. Ku pahavwi mahivwihpey, ka yi muwaka diyuhkisgi akakwatama mahivwihka. Kawa. Diyuhkisnabay akak kabaykanen. Innewa Kiyavwiye Uhokri gimawkan udahanwiy avim ini ku aysaw ig humekwewiy gimkat. Ku wixwiy keh hene nikwe wixwiy utinek ini kabayka ku pariye gikaksan wotwiy.

¹⁰ Mmanawa in Uhokri gannasan awna: “Ku pahavwi muwaka batek, ku ig muwaka uti kabayka, amawka ku ig avuriw giwn adahan ig ka awna mbayka. Amawka ku ig avuriw gibiy adahan kinisaka ka pes gibiyaptak.

¹¹ Amawka ku ig tukuhwevwa ariw mbayka adahan ig kehne kabaykanen. Amawka ku ig keh pasamraki. Amawka ku ig mpiksaw aharit pasamraki.

¹² Mmanawa Kiyavwiye Uhokri giwtyak avuriwvari gihiyegavu kibeynevwi. Gitaybi wok, timavari giviryepkawnikis. Heneme ig wages gihepka giwkis neras ku pariye kehnevwi mbayka.” Henewatbaki ig Kiyavwiye Uhokri awna.

Ka sam wixwiy hiyapkiska mbeyne wotwiy

¹³ Ku wixwiy mpiksaw keh kabaykanen, nikwe yuma pahavwinema hiyeg hiya usamanakwiy adahan ahegbeta mbayka udahanwiy.

¹⁴ Ku hiyeg hiyapkis mbayka wotwiy awaku ku samah ig ka batek akak ukehniwiy kabayka, ka sam. In wageswa ka aynsima kabayka udahanwiynek. Ka yi muwaka avis gibohrikis. Ine kawnata yi muwaka kiyimwihwa gikakkis.

¹⁵ Ivegnabay givitit Cristo avititakwa yiyakni. Kiyathanigbay ku samah ignewa Ukivarawiy. Ku hiyeg ayavyi amin ku samah yis iveg givitit Cristo, misakwanabay ahegbet avanenekwa adahan yis akkamnihni gitkis.

¹⁶ Kinetihwanabay gikakkis akak huwivgaki akak kiyathaki. Wewnabay avanenekwa akak yihiyekemni wadit. Ayge nikwe ku aysaw hiyeg mahivwihpey, ku aysaw igkis awna mbeyevye iwit yimin awaku ku samah yis wewne akak Cristo gihiyekemni, ka sam. Ku yis wew wadit, igkis marekevwenek abohri inakni giwnkis ku pariye igkis awna yimin.

¹⁷ Mmanawa ku Kiyavwiye Uhokri muwaka wixwiy hiyap mbeyne, ka sam. Heneme ku wixwiy hiyapkiska mbeyne wotwiy avatra ku samah wixwiy kehne kabayka, ini ka aynsima kabayte ariw ku wixwiy hiyapkiska mbeyne wotwiy avatra ku samah wixwiy kehne mbayka.

Cristo umahkiswe kahadbe wixwiy danuh git Uhokri

¹⁸ Mmanawa ig Cristo hawata hiyap mbeyne. Ig umahkiswe pahayewvi adahan katiwnihpiye utaraksanwiy. Ig kibeyne hiyeg heneme ig umahkiswe udukwenavrikwiy wixwiy ku pariye kane kibeynevwima. Ig umahkiswe kahadbe wixwiy danuhne git Kiyavwiye Uhokri. Givit ute miyaka heneme ganmapme aymuhwa adahan avanenekwa.

¹⁹ Avim ini ganmap tivik gitkis giyakivwi anmaptiviyene ku pariye arikunene parakseket. Ayge ig akkamnih gitkis ku samah ig mateke wavitye, ig mateke miyaka.

²⁰ Neras anmaptiviyenevwi ayge igkis hiyeg ku pariye kane ihpenevwima Kiyavwiye Uhokri giwn minikwak. Avim ini hawkri ku samah amekene Noé kehnete ginawiya, ig Kiyavwiye Uhokri kiyaknihwe gikakkis ig wahevgikis adahan ig hiyap ba igkis wages gihiyekemnikis. Heneme ka kibitema hiyeg wageswiye gihiyekemnikis. Ininewa ntewnehker gikebikis gikak pahavwi gawnakis isahptewviye. Igkis isahptew abetimpi un awaku ku samah un umehe hiyeg patahwavye, igkiswonas misekwe adahan nukune hawkri akiw.

²¹ Ku samah igkis isahptew abetimpi un in humaw abektey udahanwiy adahan ku samah wixwiy isahptaw abetimpi un ku aysaw wixwiy kaywaka. Wixwiy ka isahptaw awakuma ku samah ini un sukuhptawiy ariw uvathawniwiy awkinenwa uvitiwiy heneme awaku ku samah wixwiy amevene ini ku ig Kiyavwiye Uhokri barewbetha uhiyekemniwiy ariw madikte uvathawniwiy. Uhiyakemniwiy humaw nukunewa akiw givitimpi Jesus Cristo. In ke wotbe in kannikawbe ariw miyaka hawata ku samah ig kannikew ariw gimiremni.

²² Ig Jesus Cristo kuwis tivik inurikut. Kuri ig aynte gihumwa Kiyavwiye Uhokri amun ini iwetrit ku pariye kane nikiytanisima kihehaptak. Ayge ig kumadukene madikte ahj, madikte ikivarat, madikte ku pariye detyevwi.