1 Pedru 2 - Uhokri Gahegbetawni Nukune akak Sawmus

Mpiksawnabay aharit Uhokrinen gihiyekemni

¹ Nikwe uyay wiwhminaw ariw madikte hiyakemniki ku pariye mbeyevyenen. Uyay wiwhminaw ariw madikte kinisaka ariw madikte wasaymaka. Uyay wiwhminaw ariw madikte atihpaka ariw madikte awnaki paminak.

² Mpiksawnabay aharit Uhokri gihiyekemni ku pariye barewbetye. Ivegbohanabay Uhokri gannasan. Mpiksawnay niharit akak madikte yibetki hawata ke bakimnayh nukuvesniyebe ku samah igkis mpiksaw aharit ihintakut. Yisme mpiksawnay aharit ini gihiyekemni adahan yis aymuhwene abet yihiyekemni nikak, adahan yis iwene yawaygi niwntak.

³ Mmanawa yis kuwis hiyak aketri Kiyavwiye Uhokri gabay.

Jesus ke pohow tipbe wixwiy hawata ke tipbe

⁴ Nukebyuvwi, uyay danukwa digiw gihumwat Kiyavwiye Jesus. Minikwak hiyeg tukuhpig heneme Kiyavwiye Uhokri kavigsig ig ka aynsima batek gikak. Ig Kiyavwiye Jesus ig kewa pohow tipbe. Ig tip dehetniku.

⁵ Mpuse wixwiy hawata kewa pohow tipbe dehetnikube. Kiyavwiye Uhokri pahadguhwiy pawtak kabayntiwa adahan wixwiy humaw pahatte givin kewa paha payt tiptiyebe. Hawata akiw wixwiy humaw kewa gimuwvegavube arikuya givin adahan wixwiy kehne kibeyne kakanhawka git Kiyavwiye Uhokri abet uhiyekemniwiy. Igme Kiyavwiye Uhokri amava ini ukanwiy git mmanawa wixwiy kakanhaw git givitimpi Jesus Cristo.

⁶ In Uhokri gannasan akki wotwiy ku samah Kiyavwiye Jesus kewa pohow tipbe. In awna: “Aysawnemenek nah ke wotbe nah ikis pohow tipbe ay gibetkis hiyeg siyawhyenevwi. Egu tip adahan payt akoksa. Nahnewa kaniygu. Nor kabayno tip nutuh. Ku pariye hiyeg kamaxwa guvitit ignes ka marakwa givitkis nutivutnek.” Henewatbaki in ku samah ig Kiyavwiye Uhokri awna.

⁷ Wixwiy ku pariye kamaxwenevwi givitit Kiyavwiye Jesus, wixwiy kiyatig. Nerasme ku pariye kane kamaxwenevwima givitit Kiyavwiye Jesus igkis ka kiyatig. Igkis humaw ke neras hiyegbe ku kamin Uhokri gannasan kinetihwa. In awna: “Hiyeg kehnes paha payt tiptiye, igkis tukuhe pohow tip. Givewkankiskamku egu tip ka kawihkam. Bawa egu tip eg awaygtenano ariw madikte. Eg humaw adahan payt akoksa.”

⁸ Inwata gannasan awna hawata akiw: “Egu tip keh igkis tuguhe dunibdiwarumpikisnek. Ku samah pahavwi kiyimwihwa akak tip ku kavit ig tes gikugku, igkis hawata kiyimwihwanek gikak ner ku pariye nah ikis ayge gibetkis.” Henewatbaki in ku samah ig Kiyavwiye Uhokri awna. Igkis ke wotbe igkis tuguhe dunibdiwarumpikis awaku ku samah igkis ka iha Kiyavwiye Uhokri giwn. Hiyeg kane ihpenevwima giwn henewa igkis ikaksaka adahanikwa ini.

Wixwiy Uhokri gikanyanvu gimuwvegavu

⁹ Wixwiyme ka henema, nukebyuvwi. Wixwiynewa Uhokri gikanyanvu. Wixwiynewa Kiyavwiye Uhokri gimuwvegavu adahan wixwiy danukwa git Kiyavwiye Uhokri takunipti adahan kehne gibetki. Wixwiynewa gihiyegavu barewvityevwi, gihiyegavu gidahannen Kiyavwiye Uhokri. Wixwiy kaniyka adahanikwa hiyapkisne gabay ner ku pariye humekwewiy abetitak amisnavye tahan abetit gibutni kane abewisima.

¹⁰ Minikwak wixwiy ka Kiyavwiye Uhokrima gihiyegavuma. Heneme kibeyne, ku avim inin wixwiy kuwis Kiyavwiye Uhokri gihiyegavu. Minikwak wixwiy ka hiyak ku pariye gamnihra. Heneme ku avim inin wixwiy kuwis hiyak ku pariye gamnihra.

Kehnabay kabaykanen

¹¹ Nukebyuvwi kibeynevwi, wixwiy he danuhpasakinen atan amadgat inin. Inin hawkri ka udahanwiyma akiw. Ku pariye udahanwiywa in aynte inurik. Nikwe uyay ka iki utewiy arit uhiyekemniwiy minikweknene akiw mmanawa in suguh uhiyekemniwiy nukune.

¹² Wewnabay wadit ay gibetkis hiyeg kane Uhokriyanvuma adahan yis kiyathasene Kiyavwiye Uhokri gitkis. Nawenetke igkis awna yimin ku yis ka kibeynevwima. Ka sam. Ku aysaw igkis hiyavyi ku yis kehne he kabaykanen, ayge nikwe igkis kiyatha Kiyavwiye Uhokrinek avim ini ku aysaw ig dax avit giyaknikis.

Ihpanabay giwn ikivarat

¹³ Ihpanabay giwnkis madikte ukivarawiy amadgayavu inin, gidahan Kiyavwiye Uhokri. Ihpanabay giwn ikivarat ku pariye ka aynsima kiyatenene ayge.

¹⁴ Hawata akiw ihpanabay giwnkis neras hiyaptigivyene ku pariye ikivarat gawahkisni yimin. Igkis awahkiska adahanikwa kehne hiyeg mbayavye katiwnivwe avatra gitaraksankis. Igkis awahkiska hawata adahan igkis kibeyhene neras ku pariye wewnevwi wadit.

¹⁵ Henewatbaki Kiyavwiye Uhokri gimawkan. Hiyeg ku pariye kane hiyak hawkri igkis awna arakembet iwit uminwiy, wixwiy Jesus gihiyegavu. Igme Kiyavwiye Uhokri muwaka wixwiy keh kabaykanenwa kahadbe igkis hiyapni hene, igkis ka ik adahan awna mbeyevye iwit uminwiy akiw.

¹⁶ Yuma hiyeg amadgaya inin kumaduka uhiyekemniwiy. Heneme ka yi muwaka iki nikwe ku mbayka ka sam wixwiy keh. Kumadukasanabay yihiyekemni git Kiyavwiye Uhokri.

¹⁷ Kiyathanabay madikte hiyeg. Bateknabay gikakkis madikte ukebyuvwiy kamaxwenevwi givitit Kiyavwiye Jesus. Kiyathanay Kiyavwiye Uhokri akak madikte yavisni. Kiyathanay hawata ukivarawiy amadgayavu inin.

Kiyaknihwanabay abet mbeyne

¹⁸ Ku aysaw yis kannivwiye gidahan pahavwi, ihpanabay giwn akak madikte kiyathaki. Kawki igwonema yikivara ku pariye kibeyne huwipegevye yis kiyathig. Heneme hawata kiyathanay ner ku pariye kane gimabyanisima.

¹⁹ Mmanawa ku wis kiyaknihwa abet mbeyne ku pariye hiyapkiska wot yumanene kavatrenesima gidahan Kiyavwiye Uhokri, in keh ig Kiyavwiye Uhokri batek ginaktin.

²⁰ Henewatbaki in. Ku wis kiyaknihwa abet mbeyne ku pariye hiyapkiska wot avatra utaraksan inyewatnene, ini yuma pahatnema kibeyne giwtrik Kiyavwiye Uhokri. Heneme ku wis keh wadit wisnewa hiyapkiska mbeyne wot nivatra, ka sam. Ku wis kiyaknihwa abet ini mbeyne, in kehig Kiyavwiye Uhokri batek ginaktin.

²¹ Ku kavim ig Kiyavwiye Uhokri humekwewiy gimkat, ig kuwis hiyakni ku ini mbeyne danuh wotwiy hawata ku samah in danuh git Cristo. Igme Cristo hiyap mbeyne udahanwiy. Ig humaw ukannuhtenwiy adahan wixwiy ikaw hawata ke igbe.

²² Ig ka keh aynesnima patahwaki. Ig ka kinis aynesnima akak gibiy. Heneme ignewa hiyapkiska mbeyne git.

²³ Ka sam. Ku aysaw hiyeg mahivwihpig, igme ka diyuhkis. Ku aysaw igkis hiyapkise mbeyne git, igme ka puwimahgikis. Ig ivegnenekwa givitit Kiyavwiye Uhokri ku pariye ka gihiyekemnisima adahan ig hiyak gikakkis mpuse hiyeg pakekunawa akak ku samah gikehnikis.

Ku samah ig huwivwihpika, wixwiyme piyihpika

²⁴ Giwnteknewa ig umahkiswe udukwenavrikwiy. In ke wotbe uhiyekemniwiy mbeyevyein ay givitbe amun ini ku aysaw givit deddehpika aminat giyakni. Ig umahkiswe hene adahanikwa wixwiy ka wew akiw akak uhiyekemniwiy minikweknene ku pariye taraksevye, heneme adahan wixwiy wewne gikak Kiyavwiye Uhokri ku pariye waditye. Mmanawa ay amun ini ku samah ig huwivwihpika, ayge nikwe wixwiyme piyihpika avim ini.

²⁵ Minikwak wixwiy kewa muwtohbe biyukavyebe. Kurime wixwiy kuwis diyuhe git ner ku pariye Ukivarawiy ku pariye uhiyekemniwiy akavriwten.