1 Pedru 1 - Uhokri Gahegbetawni Nukune akak Sawmus

Nah Pedru awahkis kabayka yimin

¹ Nah Pedru, ku pariye giwatni Jesus Cristo, nah awahkis kabayka yimin yis Uhokri gikanyanvu ku pariye ivukavepka avititak yiwaxig. Yis kuri ibekhewbet muwapuw Pontomnaw akak Galasiyamnaw, Kapadósiyamnaw, Asiyamnaw, Bitiniyamnaw.

Wixwiy Uhokri gikanyanvu

² Kibeyne, wixwiy Wigwiy Uhokri gikanyanvu. Ig kaniywiy adahan wixwiy kannuh iha Jesus Cristo giwn kabayntiwa. Ig kaniywiy adahan uhiyekemniwiy barewbethaka ariw uvathawniwiy ke wotbe akak gimigbe ku pariye ig sukase udahanwiy. Minikwak ig ayipa hiyakni ku wixwiy humawnek gihiyegavu. Ig keh wixwiy humaw gihiyegavu akak ini ku samah ig kawihkise Gitip uvititwiy. Nukebyuvwi, nah awahkis ka aynsima kabayka yimin. Kiyavwiye Uhokri gabay yikaknek. Ig kariswehse yiyakninek avanenekwa.

Ka aynsima kabayka kuwis ahegbet udahanwiy

³ Kibeyne gidahan Kiyavwiye Uhokri ku pariye Ukivarawiy Jesus Cristo gig. Ig ka gamnihrasima ukakwiy. Ig keh uhiyekemniwiy wayvuka nukunewa akiw givitimpi Jesus Cristo ku samah ig kannikasevgi ariw gimiremni. Inneki keh wixwiy iveg givitit adahan ig utipkis wotwiy ini kabayka dehetniki

⁴ ku pariye kane hiyap mpiyaki, ku pariye kane hiyap patahwaki, ku pariye kane hiyap huruhruki, ku pariye ig Kiyavwiye Uhokri darihe udahanwiy aynte inurik.

⁵ Ku samah wixwiy kamaxwene givitit Kiyavwiye Uhokri, ig avuriwiy akak gannu he ku aysaw wixwiy darih ini kabayka. Kibeyne, ig kuwis ahegbet adahan areketni wotwiy amaksemni hawkri.

Uhokri batek hiya ukamaxwanwiy akak mbeyne

⁶ Uyay batek akak ini nikwe. Hiyawa wixwiy kadni ku samah wixwiy hiyepne ka aynsima mbeyne ay amadga inin, heneme ka sam. Ini adahan aynesawa hawkri.

⁷ Ini mbeyne adahan hikekne yikamaxwan. Hiyeg hikek karukri wahano akak tiket adahan areketni ku egyewa. Hawata ig Kiyavwiye Uhokri isaksa mbeyne adahan in danuh wotwiy adahan areketni ku wixwiy inyewa kamaxwa givitit. In ukamaxwanwiy ka aynsima awaygte guw karukri wahano ku pariye kane dahwa. Ku aysaw ig Kiyavwiye Uhokri hiyap wixwiy kamaxwenene givitit abetnewa mbeyne, avim ini ig batek ginaktinek. Aysawnemenek ig kabayhawiynek adahan ini ukamaxwanwiy, ig iki ukiytaniwiynek avim ini hawkri ku aysaw Jesus Cristo danuh.

Hiyawa wixwiy batek abet mbeyne

⁸ Wixwiy kote hiyavgite heneme ka sam. Wixwiynewa batek gikak. Hiyawa wixwiy ka hiyavgi kuri heneme kawnata sam. Wixwiynewa kamaxwa givitit. Inneki keh wixwiy batek ka aynsima, yuma batekka hene akiw. Ka ik adahan wis kinetihwa nimin.

⁹ Kis adahan wixwiy batek mmanawa wixwiy isahptawnek ariw uvathawniwiy adahan wixwiy aymuhwa gimun Kiyavwiye Uhokri adahan avanenekwa. Adahanikwa ini wixwiy kamaxwene givitit Kiyavwiye Uhokri.

Uhokri gawnevevu pitatyevwi ka pukuha ini kabayka

¹⁰ Uhokri gawnevevu pitatyevwi ka pukuha ku samah wixwiy isahptaw hene. Hiyawa igkis kinetihwenes amin ini kabayka ku pariye Kiyavwiye Uhokri ikevye wotwiy heneme igkis ka pukuha ini ku kamin igkis kinetihwa. Igkis ivegminenes gihiyekemnikis nimin, igkis mpiksaw niharit. Heneme igkis ka pukuhin.

¹¹ Igkis ivegminenes gihiyekemnikis adahan ku aysawneki ini hawkri danuh, hawata adahan ku samahpaki nidawnhan. Mmanawa avit in danuh, kuwis Cristo Gitip akkin gitkis huwewe. Ig awnene ay givitkis amin ku samah Cristo hiyap mbeynenek ayteke ig ikaka gikiytaninek.

¹² Heneme ig Kiyavwiye Uhokri akki gitkis ku inakni ginetnikis ka gidahankisma hiyeg avimnevwi ini, heneme in gidahankis neras ku pariye amedgenevwi inin aysawnemenek. Nikwe ig kinetihwene udahanwiy wixwiy kuriwkewne akak inin. Inakni ginetnikis inwata inetit ku pariye Uhokri giwatnivwi ekkene wotwiy ku avim inin. Igkis giwatnivwi hawata kinetihwa akak Kiyavwiye Uhokri Gitip gannu inuriktekne. Inakni inetit kibeyne inetit. He ahj wakaymnibdi igkis muwaka hiyak ku pariyeki ini.

Ikawnabay barewvityekuye mmanawa ig Uhokri barewvitye

¹³ Nikwe nukebyuvwi, wewnabay ahegbetnenekwa adahan Kiyavwiye Uhokri kawihyi. Avuriwnabay yihiyekemni kabayntiwa. Ivegnabay givitit Kiyavwiye Uhokri adahan ig utipkis yit ka aynsima kabayka aysawnemenek avim ini ku aysaw Jesus Cristo danuh.

¹⁴ Ikawnabay ke bakimnayhbe ihpatrunevwibe. Ka yi muwaka diyuhkiswa butte adahan yis wewnema akak yihiyekemni minikweknene ku samah yis kote hiyakte hawkri.

¹⁵ Ner ku pariye humekwewiy gimkanit ig barewvitye. Uyay ikaw barewvityekuye hawata ke igbe abet madikte uhiyekemniwiy.

¹⁶ Mmanawa in Uhokri gannasan awna: “Numawkan yis wew barewvityekuye mmanawa nah barewvitye.”

¹⁷ Aysawnemenek ig hiyavwiynek baki wixwiy barewvityewatma. Avim ini ig iki utiwniwiynek pakekunawa akak ku samah ukehniwiy ay amadga inin. Ig ka mpiyasa pahavwinema gikehni henenwatma. Ku samah wixwiy kanumgi “Niguh”, amawka nikwe ku wixwiy kiyatig abet madikte uwewniwiy ay amadga inin.

Uhokri katiwnih udahanwiy akak Jesus gimig

¹⁸ Mmanawa yis hiyak ku kakak ig katiwnihe adahan uwiwhpitniwiy ariw uhawkanwiy minikweknene ku pariye he waditnevyenen ku pariye amekenegben wew nikak. Ig ka katiwnih akakma arikna ku pariye yumanene awaygi adahan avanenekwatma. Ig ka katiwnih akakma karukri wahano, kawnata akakma karukri wahano seyno. Kawa.

¹⁹ Ig katiwnih akak migat, kibeyne migat, Cristo gimig. Ig Cristo kewa pahavwi muwtohyanbe ku pariye umehpika udukwenavrikwiy. Ku samah amekenegben iwe pahavwi muwtohyan ku pariye yumanene gibuskana yumanene givathawni, adahan igkis umahgi gidukwenavrikkis hiyeg, ig Cristo ig hawata barewvitye avigkutavrik ku samah Kiyavwiye Uhokri gimawkan.

²⁰ Avit hawkri humaw ayipa ig Kiyavwiye Uhokri kaniyvig adahanikwa ini. Kurime avim inin amaksemni hawkri ig akkig wotwiy adahan igme wamnihtenwiy.

²¹ Givitimpi Cristo wixwiy kamaxwene givitit Kiyavwiye Uhokri ku pariye kannikasevgi ariw gimiremni ku pariye kiyathasig. Ayge nikwe wixwiy kamaxwa givitit Kiyavwiye Uhokrinen wixwiy iveg givititnen.

Uhokri giwn barewbetha uhiyekemniwiy

²² Yihiyekemni barewbet kuri awaku ku samah yis ihpene Kiyavwiye Uhokri giwn ku pariye inyewatnene. Kuri nikwe yis ik adahan yis batekak pawtak inyewa ke wotbe yisweke pakebyeknebe guwntak pahavuwa inagti. Uyay batekak pawtak nikwe akak madikte ubetkiwiy avititakwa uyakniwiy.

²³ Mmanawa uhiyekemniwiy ke wotbe kuwis wayvuka akiwbe. In ka wayvuka he guwntakisnenwatma tinogben amadgayavu inin ku pariye kane dahwa. Heneme uhiyekemniwiy nukune in ke wotbe in wayvukabe ariwntak Kiyavwiye Uhokri giwn dehetniki ku pariye dahwa adahan avanenekwa.

²⁴ Henewa in ku samah Uhokri gannasan awna. In awna: “Hiyeg amedgenevwi inin igkis kewa pamatkabe. Gikiytanikis kewa ivuritibe akiytanibe. Pamatka kibehtenwa in huruhrup. Ivuriti kibehtenwa in kigise.

²⁵ Inme Kiyavwiye Uhokri giwn in dahwa adahan avanenekwa.” Inakni inetit ku pariye kuwis ekkepka yit inakninewa Kiyavwiye Uhokri giwn.