1 Koríntyus 9 - Uhokri Gahegbetawni Nukune akak Sawmus

Numawkan nah ka keh ariknawnema ku pariye ik adahan taraksasa hiyeg

¹ Yuma hiyeg amadgaya inin kumaduka nuhiyekemni. Ik adahan nah keh ku pariye nuhiyekemni tuguh. Hawata akiw nah Uhokri giwatni. Akakwa nuwtyak nah hiyap Ukivarawiy Jesus, ig keh nah humaw giwatni. In huwewe yit, mmanawa yis wagese yihiyekemni ku samah yis timep nah ekkene Uhokri ginetni yit akak Uhokri gannu ay nuvituh.

² Hiyawa nawenyevwi hiyeg ikanhu ku nah ka Uhokri giwatnima, heneme in huwewe yit ku nah igyewa giwatni, mmanawa yis nukunehwe yihiyekemni ku samah nah ekke Uhokri ginetni yit.

³ Ku hiyeg hikekun ba nah igyewatma Uhokri giwatni nah awna gitkis inin iwit:

⁴ ku samah nah Uhokri giwatni, nikwe ik adahan nah keh ku samah madikte giwatnivwi keh. Ik adahan nah ax giduhyamadgakis Jesus gihiyegavu. Kameki nah kehme hene.

⁵ Hawata ik adahan nah kamax pahavu tino Jesus gihiyega. Ik adahan nah iwavgu nuhapti egme ax payak nukakuh giduhyamadgakis Jesus gihiyegavu. Hene nawenyevwi Uhokri giwatnivwi keh. Hene Kiyavwiye Jesus gisamwivwi keh. Hene kiyavwiye Pedru keh. Ik adahan nah keh hawata. Kameki nah kehme hene.

⁶ Nah gikak kiyavwiye Barnabe ik adahan usuh ka kannivwi adahan uvituh. Ik adahan usuh ax giduhyamadgakis Jesus gihiyegavu hawata ku samah nawenyevwi Uhokri giwatnivwi. Kameki usuh kehme hene.

Amawka Jesus gihiyegavu hiyak gikakkis giwewkistenkis

⁷ Ku yis mutuh yiwasra, kitak yis ax? Yis ax amadgateknewa yiwasra. Kuri yisme kewa nuwasrabe. Ik adahan nah ax yihamadga. Hawata akiw ku yis avuriwne kabrit, kariwntak yis higap dilet? Ariwnteknewa yivig kabrit. Kuri nahme yikavriwten. Ik adahan nah ax yiduhyamadga akiw. Hawata akiw ku yis suwtat, kavit yis katiwnihka? Yis katiwnihka gavit yikivara. Nah hawata nah kannivwiye yidahan. Yis humaw kewa nukivarabe. Kiskama adahan yis hiyak nukakuh.

⁸ Inakni hiyeg gihiyekemnikis amadgaya inin, heneme inwata Uhokri gihiyekemni. Ig Uhokri gikumadukan awna hene.

⁹ Mmanawa amekene Moís gikumadukan awna: — Ku aysaw yivig pak kannivwiye mutukene fahhin ayak, amawka yis ka wanak gibiy adahan mpitig adahan ig ka ax ariwntak ini fahhin ayak. Ig Uhokri ka awna inakni adahanma paknenwatma.

¹⁰ Ig awna inakni udahanwiy wixwiy hiyeg. Henewa. Ig annase inakni kahadbe pahavwi ku pariye kewne was ig hiyakni ku ik adahan ig ax aytekenewa amadgatak ini giwasra, pahavwime ku pariye mutukene amutri ayak ig hiyakni ku ik adahan ig ax aytekenewa.

¹¹ Yis kewa nuwasrabe. Nah ke wotbe nah mutuhne Uhokri gihiyekemni ayge yibet. Nikwe ik adahan nah darih arikna yihamadgatak adahan nukamaxten.

¹² Ku yis hiyap nawenyevwi Uhokri giwatnivwi ax yiduhyamadga nahkata akiw? Kameki nah kehme hene. Nah ka keh madiktema ku pariye ik adahan nah keh, mmanawa nah ka muwaka hiyeg pukuhpawnema nubohri. Nah ka muwaka mpithebdihgikis adahan ignes ka iha nunetni gidahan Cristo.

¹³ Neras muwveg ku pariye kannivwiye ariku Uhokri Givin ignes ax ariwnteknewa. Neras ku pariye umehnevwi puwikne givetunat Uhokri gidukwenavrikkis gihiyegavukis ignes ax ariwnteknewa puwikne kakanhawka. Henewa judeyenevwi gikumadukankis awna.

¹⁴ Inakni hawata Kiyavwiye Jesus gikumadukan gidahankis madikte hiyeg ku pariye kannivwiyevwi gidahan. Ig awna ku neras ku pariye ekkenevwi Uhokri ginetni hiyawa ignes ax giduhyamadgakis neras ku pariye timepnevwi inakni ginetni.

Nah akki Uhokri ginetni yuma atiwni

¹⁵ Ik adahan nah ax yiduhyamadga, heneme nah kote kehte hene. Nah ka awna inakni hene adahan kuri nah kavusa ax yiduhyamadga. Nutuh kabayte nah miyap mpinekata nah kehni hene. Wake nah ax yiduhyamadgabe, nikwekam ka hiya nahma awna gitkis hiyeg ku nah ekkene Uhokri ginetni yuma atiwni. Ayge nikwe gitkiskam nah ekkene Uhokri ginetni awaku nah aharitne karukri.

¹⁶ Ini ku samah nah ekkene Uhokri ginetni gitkis hiyeg, ka ik adahan nah ikaw kibeyne hiyeg awaku ini. Mmanawa pugamawka nah akki inakni ginetni. Nah kawatnihka adahanikwa ini. Wake nah ka akkibe inakni kibeyne inetit, nikwekam aysawnemenek nah kayah ka aynsima nivatra.

¹⁷ Hiyawa nah ka muwaka akki ginetni, heneme pugamawka nah akkin. Mmanawa henewa gikehkisni nutuh. Heneme ku nah akki giwn akak madikte nubetki, ku nah ka aya nutiwni gitkis hiyeg, amun ini nikwe nah kehne mpiy ku samah gikehkisni nutuh. Adahan ini ig Uhokri katiwnihun.

¹⁸ Nah akkite yit ku pariye nutiwni, ku pariye kiskam adahan nah aya adahan inin nannivwi. Innebaki nubetki adahan ku samah nah ik adahan akki Uhokri giwn gitkis hiyeg nah ka aya nutiwni gitkis, hawata ku samah nah ka aya ku pariye kiskam adahan nah aya adahan inin nannivwi.

¹⁹ Mmanawa hiyawa yuma hiyeg amadgaya inin kumadukan, heneme nuwnteknewa nah wageswe ke wotbe nah madikte hiyeg gibukkisbe, nah ka aya nutiwni gitkis, kahadbe nah utipne kibite hiyeg ihpene nuwnuh gidahan Uhokri. Ininewa nutiwni.

Nah keh ku pariye kabay gitkis madikte hiyeg

²⁰ Inneki keh ku aysaw nah ay gibetkis hiyeg judeyenevwi nah ikaw kewa judeyenebe kahadbe igkis amava nuwnuh gidahan Kiyavwiye Jesus. Igkis ihpenes ariwn amekene Moís gikumadukan. Nikwe nah hawata nah ihpa ariwn gikumadukan kahadbe igkisme amava nuwnuh.

²¹ Heneme ku aysaw nah ay gibetkis hiyeg kane judeyenevwima ku pariye kane ihpenevwima amekene Moís gikumadukan, nikwe nah ikaw kewa igkisbe kahadbe igkis amava nuwnuh gidahan Kiyavwiye Jesus. Kameki nah wagesme nuhiyekemni kema gidahankisma adahan in taraksasan ariw Uhokri gikumadukan, mmanawa nah avanenekwa ihpa Cristo giwn.

²² Hawata akiw ku aysaw nah ay gibetkis Jesus gihiyegavu ku pariye kotene hiyakte hiyakemniki, nah ikaw kewa igkisbe kahadbe igkis amava nuwnuh. Nah keh ku pariye kabay gitkis madikte hiyeg. Nah keh madikte kahadbe nah hiyap ba nah wages gaytakkis hiyeg gidahan Uhokri kahadbe ignes amnihka gavit.

Uyay ka keh ariknawnema ku pariye mpithawiy ariw utiwniwiy giwntak Uhokri

²³ Nah keh madikte hene kahadbe Uhokri ginetni hiyakan muwapuw. Mmanawa nah hawata mpiksewne aharit madikte ini kabayka ku kamin nah kinetihwene. Nah muwaka utipni payak gikakkis madikte Jesus gihiyegavu. Uyay mpiksaw niharit payak nukakuh.

²⁴ In huwewe yit ku samah hiyeg mpiksewne hikekne garaptikis. Igkis mpiksaw aharit ini yuwti ku pariye ikaka git pahavwi gaytakkis ku pariyekit danuh giwkis. Ka aynsima hiyeg bisimtekne, heneme pahavwiwa ku pariye mpiksawte igkit danuh giwkisnek, igi matekevye ini yuwti. Nukebyuvwi, uyay mpiksaw aharit ini kabayka ku pariye kuwis ahegbet udahanwiy hawata ku samah pahavwi mpiksaw adahan igkit danuh giwkis neras ku kakak ig bisimtekne.

²⁵ Ku pariye mpiksaw hene adahan igkit danuh giw pahavwi, ig miyeh givit ig maxhaw ig wiwhminaw ariw madikte ku pariye gimaptenten. Ig ka keh madiktema ku pariye ik adahan ig keh. Amawka wixwiy hawata. Igme mpiksaw aharit gitiwni amadgaya inin, aharit ini yuwti ku pariye kane dahwa. Wixwiyme mpiksaw aharit utiwniwiy ku pariye dahwa adahan avanenekwa.

²⁶ Inneki keh nah ka keh madiktema ku pariye ik adahan nah keh. Nah mpiksaw keh Uhokri gibetki ke pahavwibe ku pariye sigis wadit ku kit gikivara gimawkan. Kawki ig sigisbetema. Nah mpiksaw ke pahavwi suwtatbe ku pariye kerye gidahan gikivara akak madikte gidatni. Kawki ig biwhbetema.

²⁷ Nah ka isaksa nuvituh abetki kumadukan. Nahme kumadukin adahan in ka mpithan nah uti nutiwni giwntak nukivara. Mmanawa nah kuwis awnase nawenyevwi hiyeg adahan ignes uti kabayka gimun Uhokri. Nikwe nah ka muwaka nahme biyuk nikak.