1 Koríntyus 8 - Uhokri Gahegbetawni Nukune akak Sawmus

Hiyakemniki kabay inme amnihka kabayte

¹ Kuri nah awnene amin im kakanhawka arit ahehpakti batakka. Ka aynsima hiyeg kakanhaw im arit ahehpakti batakka ayteke ignes ax abusku. Hene igkis kiyatha ini ahehpakti batakka. Yisme ayavun ba kabay adahan wixwiy Jesus gihiyegavu ax akebi ini im. Yit in ka sam. Mmanawa yis hiyakni ku ahehpakti batakka in ka ariknawnema. Henewa wixwiy kadahan madikte ini hiyakemniki, heneme amawka hawata ku wixwiy kadahan Uhokri gamnihra ay uvitwiy. Ku wixwiy aharit humaw ka uhiyekemniwiysima, ayge nikwe in keh wixwiy mavihpak pawtak. Heneme ku wixwiy aharit humaw ka wamnihrawiysima, ayge nikwe wixwiy wagahkisak pawtak.

² Ku pahavwi awna: “Nah hiyakemniye hiyeg. Nah hiyak hawkri.” Amun ini nikwe ig ka hiyak hawkri.

³ Heneme ku pahavwi batekye gikak Uhokri, hiyawa ig ka hiyak ariknawnema, heneme ka sam ig Uhokri hiyakgi kabayntiwa ig kavigsig. Inineki ka aynsima muwakte.

Ahehpakti batakka ka Uhokrima

⁴ Nikwe amin ku pariye yis ayap nutuh ba kabay adahan wixwiy ax im ku pariye kakanhawka arit ahehpakti batakka. Wixwiy hiyakni ku Uhokri pahavwiwa. Yuma nawenyewatma Uhokri akiw. Nikwe ahehpakti batakka amadgaya inin in ka ariknawnema.

⁵ Ay ka aynsima arikna amedgene inin ku pariye hiyeg kanum uhokrivyene. Hawata akiw ay ka aynsima arikna aynte inut ku pariye hiyeg kanum uhokrivyene. Ignes kadahan ka aynsima giwohkigavukis ka aynsima gikivaravukis.

⁶ Heneme wixwiy hiyak ku kadahan pahavwiwa Uhokri. Ig Wigwiy. Ig atiwkekne madikte arikna. Wixwiy humaw gidahanikwa Uhokri. Hawata akiw wixwiy pahavwiwa Ukivarawiy. Ignewa Jesus Cristo. Ig ahumten madikte arikna. Wixwiy humaw givitimpi Jesus Cristo.

Ka ba taraksasa pikebyi akak im

⁷ Heneme ka madiktema Jesus gihiyegavu hiyak ku ahehpakti batakka ku in ka ariknawnema. Adukwenewa gitkis ahehpakti batakka kewa pahavwi Uhokribe, mmanawa igkis ihuhpew nikak kuwis. Nikwe ku aysaw igkis axni, givewkankis ku igkis axnes ahehpakti batakka amana, gitkis igkis kiyathene ini ahehpakti batakka ayge. Igkis kote hiyakte hiyakemniki kabayntiwatma. Gitkis ku igkis axni, amun ini igkis patehwene.

⁸ Ka axkama keh wis kibeyne giwtrik Uhokri. Yuma axka keh wis danuh git Uhokri. Yumahwata axka mpithaw adahan wis danuh git Uhokri.

⁹ Henewa ka sam wis ax im ku pariye kakanhawka arit ahehpakti batakka. Ku wis ka taraksasa pahavwi nikak, in ka sam. Heneme battukawnay adahan yivit adahan yis ka ax ariknawnema ku pariye ik adahan taraksase pahavwi ku pariye kotene hiyakte hiyakemniki kabayntiwatma.

¹⁰ Ku ig pahavwi hiyavyi, yis ku pariye hiyeknevwi hiyakemniki, yis axne im ayge ariku payt ku kiney hiyeg kiyathenevwi ahehpakti batakka, nawenetke ig hiyapni hene, ig awna: “Ner im ka kabay adahan wis ax. Ka sam. Ku igkis axni, nah hawata nah axte.” Nikwe hiyawa ig axnene ayge, heneme ik adahan hawata ig kayehnene ayge ku in ku pariye gikehni in ka huwit.

¹¹ Amun ini nikwe yis ku pariye hiyeknevwi hiyakemniki yis taraksasene ner ku pariye kotene hiyakte hiyakemniki. Ig yikebyi Jesus gihiyega. Igwa Cristo umahkiswe kahadbe ig danuh git Uhokri. Yisme he kehnen ig biyuk giw Uhokri awaku ini yihiyekemni.

¹² Nikwe ku yis keh yikebyi keh ku pariye ig ka hiyak ba inyewatma kabay adahan ig keh, yis tarakse. Ka ininewatma yis tarakse gikak ner yikebyi, heneme yis hawata tarakse gikak Cristo.

¹³ Inneki keh nah awna: “Ku numana taraksasa nukebyi, nikwe awetuvye nah axni. Mmanawa nah ka taraksasekere nukebyi.”