1 Koríntyus 7 - Uhokri Gahegbetawni Nukune akak Sawmus

Amawka awayg gukak gihayo egkis hiyakak pawtak

¹ Kuri nah muwaka awna yikak amin ku pariye yis ka aynsima ayap nutuh amin maripkawka amadga yikagtan. Nikwe nah akkite yit ku pariye nah kaytwa. Ke nutuhbe in kabayte adahan pahavwi awayg ka kahayo.

² Heneme in ka aynsima kabayte adahan ig kahayohwa mpinekata ig mahayakemnihwe. Pugamawka ig awayg kamax gidahanwa gihayo. Tino hawata pugamawka eg kamax gudahanwa gugihgi.

³ Amawka ku awayg hiyak gukak gihayo akak madikte ku pariye gumawkanitnene git. Tino hawata amawka ku eg hiyak gikak gugihgi akak madikte ku pariye gimawkanitnene gut.

⁴ Ka hiya egma awna: “Nah kumaduka nuvituh.” Guvit gidahanikwa gugihgi. Igme gugihgi givit kawnata gidahanma. Ku gihayo iveg givitit gugihgi, amawka ig keh gubetki. Hawata akiw ku awayg iveg guvitit gihayo, amawka eg keh gibetki.

⁵ Heneme ku egkis tuguhkis guhiyekemnikis hehpekuye, nikwe ik adahan egkis ka ivegkak pavititak pawtak adahan aynesa hawkri kahadbe egkis ikatuswanokis gitnen Uhokri. Heneme maviyenek guviryepkawnikis amawka ku egkis keh gubetkikis pawtak akiw. Ayge nikwe ka hiya igma Satanas kawihgukis awakuma ku samah egkis ka hiya akamaxka guhiyekemnikis.

Mahayonye, migihgunyo

⁶ Nah ka awnenema ku amawka yis maripkaw. Heneme nah awnekerevye han, ku yis maripkewkerevye, hiyawa yis maripkaw.

⁷ Wake madikte awaykemni misakwa mahayo ke nahbe, nah ka aynsima batektekam. Heneme ka madiktema awaykemni kabunuga akak ini Uhokri gannu adahan misakwa mahayo. Pahavwime kabunuga akak ini Uhokri gannu adahan misakwa mahayo. Pahavwime kabunuga akak nawenyewa Uhokri gannu akiw.

⁸ Inneki keh nah awna yit yis mahayonyevwi hawata yit yis migihgunyovwi, nutuh kabayte yis misekwenene pahapo ke nahbe.

⁹ Heneme, ku yis ka kamax abet yihiyekemni, nikwe hiyawa yis maripkew. In kabayte wis maripkaw mpinekata wis misakwa kiyimare.

Ka muwaka tivik giw pigihgi, guw pihayo

¹⁰ Kuri nah awnene gidahankis maripkewnevwi. Nah ka awna akak nuhiyekemnima nukehbetan. Heneme nah awna inyewa akak Kiyavwiye Jesus gihiyakmni. Ig Kiyavwiye Jesus awna: “Ku pariye tino maripkawno ka hiya egma tivik giw gugihgi.”

¹¹ Heneme ku pugamawka eg tivik giw gugihgi, nikwe amawka ku eg misakwa migihgu. Ku eg ka muwaka misakwa migihgu, amawka ku eg diyuhe gimkat gugihgi akiw. Hawata awayg ka hiya igma tivik guw gihayo.

¹² Hawata yis awahkise ayapka numinuh ku kamin ig Kiyavwiye Jesus kawki awna. Nahme awna yit. Yis ayavun amin ku pahavwi awayg ikewne git Uhokri egme gihayo ka ikawnoma git Uhokri. Nutuh ku eg gihayo misekwekerevyo gikak, nikwe ka hiya igma tivik guw.

¹³ Hawata akiw ku pahavu tino ikawno git Uhokri igme gugihgi ka ikewnema git Uhokri, heneme ig misekwekerevye gukak, nikwe kawnata hiya egma tivik giw.

¹⁴ Mmanawa ku eg misakwa gikak gugihgi ku pariye kane Uhokriyanma amun ini nikwe ik adahan aysawnemenek ig hawata ikawnek git Uhokri. Egme nor tino ku pariye ka ikawnoma git Uhokri, eg hawata ku gugihgi misakwa gukak, amun ini nikwe ik adahan aysawnemenek eg hawata ikawnek git Uhokri. Wake ka henema, nikwe gukamayhkis ka ikkam adahan hiyak Kiyavwiye Jesus. Heneme kibeyne, ku egkis misakwa payak, nikwe gukamayhkis hawata hiyaknek Uhokri.

¹⁵ Heneme ku pahavwi awayg kane Jesus gihiyegama ku ig tivikkerevye guw gihayo, hiyawa ig tivik. Amun ini nikwe gihayo ka ayma giwaku akiw. Hawata akiw ku pahavu tino kane Jesus gihiyegama ku eg tivikkerevyo giw gugihgi, hiyawa eg tivik. Amun ini nikwe gugihgi kawnata ayma guwaku akiw. Mmanawa ig Uhokri avanenekwa muwaka wixwiy misakwa ka kimarenema.

¹⁶ Awaku hawata akiw wis kawnata hiyak ba inyewatma kuwewanek ig gugihgi wages gihiyekemni git Uhokri ku eg tino, Jesus gihiyega, gudukwenewa misakwa gikak gugihgi. Hawata ig awayg, ku pariye Jesus gihiyega, ku ig gidukwenewa misakwa gukak gihayo, wis kawnata hiyak ba kuwewanek eg gihayo wages guhiyekemni git Uhokri.

Ku kakak wixwiy utepka akaknewa wixwiy misakwa

¹⁷ Nikwe amawka ku kakak wixwiy utepka akaknewa wixwiy misakwa. Amawka ku wixwiy misakwa udukweneywa akak ku pariye Uhokri kuwis ike wotwiy. Nah awna inakni hene gitkis madikte Jesus gihiyegavu.

¹⁸ Ku ig Uhokri ute pahavwi gihiyega ku pariye kuwis hiwhka givit, amawka ig pahavwi misakwa henewa. Heneme ku pahavwi utepka ig kane hiwhkama givit, amawka ig misakwa henewa.

¹⁹ Mmanawa ku wis hiwhka uvit, in ka ariknawnema. Ku wis ka hiwhkama uvit, in kawnata ariknawnema. Ininewa Uhokri gimawkan adahan wixwiy ihpa gikumadukan.

²⁰ Nikwe amawka ku kakak wixwiy utepka gavit Uhokri akaknewa wixwiy misakwa.

²¹ Ku pis utepka gavit Uhokri pis ibuktite gimun pahavwi, ka sam pis misakwa hene. Ig Uhokri ay pikak. Heneme ku pis isahkiswika, hiyawa pis tivik pis kannivwiye gidahan Uhokri.

²² Ka sam pis ayge pis ibukti gimun pahavwi ku samah pis utepka gavit Uhokri. Mmanawa pis ka patahwakima abuk akiw. Pis kuwis isahkiswika niw gavit Uhokri. Pisme kane ibuktima, ku samah pis utepka gavit Uhokri amun ini nikwe pis humaw Cristo gibuk.

²³ Wixwiy katiwnihka gavit Uhokri akak kibeyne itiwnit. Nikwe wixwiy gidahan gibukvig. Uyay ka muwaka kumadukasa uhiyekemniwiy git nawenyewa hiyeg akiw.

²⁴ Nukebyuvwi, amawka ku kakak wixwiy utepka akaknewa wixwiy misakwa. Heneme amawka ku wixwiy misakwa ayge gikak Uhokri.

In kabay adahan hiyeg ka maripkaw awaku wixwiy abetnewa inin kiyimwiki

²⁵ Kuri nah awnene gidahan awayg ku pariye mahayonye. Hawata nah awnene gudahan tino ku pariye migihgunyo. Ig Uhokri ka iki nutuh adahan nah akki nukumadukan yit. Heneme nah ikene yihiyekemni. Kibeyne, ig Uhokri akak gabay ig keh nah ik adahan nah iki yihiyekemni.

²⁶ Ku avim inin wixwiy abet ka aynsima kiyimwiki. Nikwe ke nutuhbe in kabay adahan wixwiy misakwa ku samah aytniyewa wotwiy.

²⁷ Ku pahavwi kuwisnene kahayo, ka hiya igma tivik guw gihayo. Heneme ku pahavwi yumanene gihayo, kabayte ig ka kahayohwa.

²⁸ Heneme ku ig kahayohwa, ka sam. Ig ka taraksa. Egme tino ku eg kigihguhwa eg kawnata taraksa. Heneme ku egkis maripkaw, egkis hiyap mbeynenek, mmanawa wixwiy ay abet inin kiyimwiki ku avim inin. Awaku ini nah awna inakni hene adahan egkis ka maripkaw.

Amawka wixwiy ka aritnema ariw arikna amadgaya inin

²⁹ Nukebyuvwi, ka kibitema hawkri misekwe adahan Kiyavwiye Jesus gidawnhan. Han pitatit amawka ku wixwiy ka aritnema ariw arikna amadgaya inin. Ku pahavwi kahayonene, amawka ku ig misakwa ke wotbe ig yumahbe gihayobe. Ig ka ikatuswa gut mpiynevevyema.

³⁰ Pahavwime ku pariye kadniye amawka ku ig ka ikatuswa arit gikadniyi mpiynevevyema. Pahavwime ku pariye batekye amawka ku ig ka ikatuswa arit batekka mpiynevevyema. Pahavwime ku pariye isimwiyi gewkanbet amawka ku ig ka ikatuswa arit gewkanbet mpiynevevyema.

³¹ Pahavwime ku pariye kannivwiye akak arikna amadgaya inin hawkri amawka ku ig ka ikatuswa arit ini arikna mpiynevevyema. Mmanawa inin hawkri in ka dehwevyema.

Migihgunyo, mahayonye ikatuswate git Uhokri

³² Numawkan yis misakwa ka matekbetnema yihawkan. Pahavwi ku pariye mahayonye igi ikatuswa gitnen Uhokri. Ig kehne Uhokri gibetkinen.

³³ Pahavwime ku pariye kahayonye ig ikatuswate arit arikna amadgaya inin. Awaku ig muwaka kehkere gihayo gubetki.

³⁴ Ayge nikwe ig misakwa matekbet gihiyekemni. Tino hawata. Eg ku pariye migihgunyo eg ikatuswa gitnen Uhokri. Eg ikaw git Uhokri pahavwite payak akak guhiyekemni. Pahavume ku pariye kigihgunyo eg ikatuswate arit arikna amadgaya inin. Awaku eg muwaka kehkere gugihgi gibetki.

³⁵ Nah ikene ini yihiyekemni adahan yayavetni. Nah ka mpithebdihkere yihawkan. Ininewa numawkan yis ikatuswa git Uhokri. Nah ka muwaka ariknawnema mpithay giw Uhokri. Ininewa numawkan yis keh wadit.

In kabay maripkaw, heneme in kabayte ka maripkaw

³⁶ Heneme ku ay pahavwi awayg ig givewkan ig ka keh wadit ku samah ig ka maripkaw gukak gibetki, ayteke ku gidukwenekwa ig maripkewkere, hiyawa egkis maripkew. Ku ig kanaktin gumkat, hiyawa me mpiyamet gukivayavrik, nikwe hiyawa egkis maripkew. Egkis ka taraksa.

³⁷ Igme pahavwi ku ig ka maripkewkere gukak gibetki, ig keh kabay. Ku ig kamax avit giyakni ig ahegbete gihiyekemni adahan ig ka kamaxgu, ku ig kumaduka gihiyekemni, amun ini ig keh kabayntiwa.

³⁸ Nikwe ku pahavwi kamax gihayo, ig keh kabay. Heneme ku ig ka kamax gihayo, ig keh ka aynsima kabayte.

³⁹ Tino ku pariye kigihgunyo, amawka ku eg misakwa ay gimun gugihgi ku samah gayivwi amadga inin. Ku gugihgi miyap ayteke, ku eg maripkewkere akiw, hiyawa eg maripkaw. Heneme amawka ku eg kamax pahavwi ku pariye Jesus gihiyega.

⁴⁰ Heneme ku eg misakwa migihgu, eg ka aynsima utipte kabayka hene. Nutuh inaknibaki Uhokri Gitip gihiyekemni ku aysaw nah awna inakni yit.