1 Koríntyus 6 - Uhokri Gahegbetawni Nukune akak Sawmus

Ka ba yi kamiyavak git pahavwi kane Uhokriyanma

¹ Nah hawata kuwis time yak ku yis ku aysaw yis tarakse pawtak, yis tahan kamiyavak git hiyaptigi. Mmahki yis keh hene? Ig hiyaptigi ig ka Uhokriyanma. Mmahki yis ka wadithebdih yihawkan yisweknema ayge?

² Wixwiy Jesus gihiyegavu aysawnemenek wixwiynewa hiyekne akak inin hawkri madikte. Mmah nikwe yis ka ik adahan wadithebdih ini arikna nopsesnene?

³ Aysawnemenek wixwiynewa hawata hiyekne gikakkis ahj inurikyene. Nikwe ku avim inin kiskama yis wadithebdihnene yikehni ay amadga inin.

⁴ Yisme ku aysaw yis muwaka wadithebdih yitaraksan nopsesnene, yis atak kamiyavak tahan git pahavwi ku pariye kane Uhokriyanma. Mmahki yis atak gimkanit?

⁵ Kiskama yis mara akak yikehni. Mmah yuma pahavwinema yaytak ayge hiyakemniye adahan wadithebdihne yitaraksan?

⁶ Yisme kawa ivegvawa yaytak. Yis isaksa pahavwi Jesus gihiyega kamiye giyaki Jesus gihiyega ta git pahavwi ku pariye kane Jesus gihiyegama.

⁷ Yis kamiyavak kahadbe pahavwi mataka pahavwi. Heneme ku yis kamiyavak hene, nutuh amun ini yis madikte kuwis biyuk. Wake yis amavinbe ku samah pahavwi tarakse yikak, in kabaytekama ariw ku yis kamiyavak git pahavwi ku pariye kane Jesus gihiyegama. Henewatbaki, wake yis amavinbe ku samah pahavwi arewha yit, in kabaytekama.

⁸ Heneme yis ka amava. Yisweke taraksak pawtak. Yis arewhak pawtak yisweke Jesus gihiyegavu.

Hiyeg patahwavye ka kawih Uhokri gikumadukan

⁹ Ka ba yis hiyapknima ku hiyeg kane kibeynevwima ku ignes ka kawih Uhokri gikumadukan? Ka yi kinikiswa gitkis. Henewatbaki igkis ka kawihti. Ine hiyeg mahayakamnavye. Ine hiyeg ku pariye kiyathenevwi ahehpakti batakkarad. Ine hiyeg ku pariye powkemnavye. Ine hiyeg ku pariye amin giyak awayg.

¹⁰ Ine hiyeg amevwavye. Ine hiyeg kowtyakuvye. Ine hiyeg ba gibetkikis uwkihwa. Ine hiyeg ku pariye gibetkikis pataha hiyeg giwkis. Ine hiyeg arewhavye. Akebi neras hiyeg ka kawihti Uhokri gikumadukan.

¹¹ Minikwak wixwiy akebite neras hiyeg. Heneme kibeyne, kuri wixwiy kuwis sagahptew ariw uvathawniwiy. Kuri wixwiy barewvityevwi gidahan Uhokri. Wixwiy kibeynevwi giwtrik. Mmanawa wixwiy kuwis pahavwihwe gikak Ukivarawiy Jesus Cristo, igme Uhokri Gitip kawihpewiy.

Ka yi muwaka powkemnihwa

¹² Nawenetke pahavwi yaytak ayge, ig awna: “Ik adahan nah keh madikte ku pariye nuhiyekemni aya.” Nahme awna pit, henewa, ik adahan wis keh madikte. Heneme ka madiktema kabay udahan. Ik adahan nahwa awna: “Ik adahan nah keh madikte ku pariye nuhiyekemni tuguh.” Heneme nah ka kehkere ariknawnema mbayka ku pariye ik adahan kumaduka nuvituh.

¹³ Nawenetke pahavwi awna: “Utun humaw adahanikwa axka. Ka sam wis ax. Inme uvit humaw nidahanikwa. Nikwe kawnata sam wis keh ubetki nikak.” Nahme awna pit, henewa utun humaw adahanikwa im. Inme im humaw adahanikwa utun. Heneme aysawnemenek ig Uhokri pisenwanek akak utun payak akak im madikte. Inme uvit ka humaw adahan mahayakemnihwenema. In humaw gidahanikwa Kiyavwiye Jesus. Ignewa kawihni.

¹⁴ Ku samah ig Uhokri kuwis kannikase Kiyavwiye Jesus givit, nikwe aysawnemenek ig kannikasa udahanwiy uvitwiy hawata akak inwata gidatni.

¹⁵ Ka ba yis hiyapknima ku uvitwiy pahavwiwa gikak Cristo? Uvitwiy ke wotbe in givitwatbe. Nikwe ka hiya wisma daykis Cristo givit gukak pahavu tino powkemnivyo. Ka hiya wisma keh hene.

¹⁶ Ka ba yis hiyapknima ku pahavwi ku ig hamah gukak pahavu tino powkemnivyo, nikwe ayge amun inere ig pahavwihwe gukak? Mmanawa Uhokri gannasan awna: — Ku piyana hiyeg hamah pawtak, amun ini nikwe egkis piyamate humaw ke wotbe egkis pahavwiwatbe guvitkis.

¹⁷ Heneme ku pahavwi pahavwihwe gikak Kiyavwiye Jesus amun ini nikwe igkis pahavwiwa pawtak. Ka ininewatma givitkis, heneme hawata gihiyekemnikis.

¹⁸ Nikwe ka yi muwaka powkemnihwa. Tukuhwepnabay niw. Madikte utaraksan nawenyewa in ka mahivwih uvit. Heneme ku wis powkemnihwa, amun ini wis mahivwihne uvit.

¹⁹ Amawka wixwiy ka kehni hene, mmanawa uvitwiy in Uhokri Gitip givin. Ig Uhokri kuwis kawihkise Gitip uvititwiy. Ig ay uvitwiy. Kuri nikwe uvitwiy ka udahanwiywatma akiw. Uvitwiy gidahanikwa Uhokri.

²⁰ Wixwiy katiwnihka gavit Uhokri akak kibeyne itiwnit adahan wixwiy humaw gidahanen. Nikwe uyay kawih uvitwiy adahanikwa kibeyhene Ukivarawiy Uhokri.