1 Koríntyus 5 - Uhokri Gahegbetawni Nukune akak Sawmus

Pekkiswinay ner ku pariye kataraksanye

¹ Nah time yak ku pahavwi yaytak ig mahayakemnihwe. Ig keh mbayte giwkis hiyeg ku pariye kane Uhokriyanvuma, mmanawa ig darihweke gukak ginagva. Mmahki inere?

² Pisenwa nikwe yis ikawnamah ke wotbe yis hiyakemniyevwibe akak Uhokri gihiyekemni. Kiskama yis kadni adahan ini. Kiskama yis pekkise ner taraksevye yibetitak.

³ Nah piyawakad yiw ku avim inin, heneme ke wotbe nah ayge yimunbe. Kuwis nah ahegbete nuhiyekemni adahan ku samah yis keh gikak ner taraksevye. Nah akkite yit.

⁴ Amawka ku yis pahadguhwa giwavrik Ukivarawiy Jesus adahan givekkiswitni. Avim ini ig Ukivarawiy Jesus ayge yimunek akak gidatni. Nah hawata ke wotbe nah ayge yimunbenek.

⁵ Ayge nikwe yis ekkevgi giwakurit Satanas adahan igme hiyapkisne mbeyne git he ku aysaw ig wagesnek gihiyekemni akiw. Kahadbe aysawnemenek ig isahptaw avim ini ku aysaw Ukivarawiy Jesus danuh atan akiw.

⁶ Ku yis ka pekkis ini mbayka ayteke yibetitak yis ka hiya yisma ikaw kibeynevwi. Hiyakemniki taraksevye in kewa bugut abusanbe. Ku wis wagesbeta aynesa bugut abusan abetit ka aynsima fahhin, ayge nikwe madikte in tukugwe. Hawata akiw ku pahavwi hiyeg taraksevye ay ubet, ku wis ka pekkisgi, nikwe aysawnemenek ig wageswewiy madikte.

⁷ Inneki keh nah aya yit pekkiswinay ner awayg yibetitak kahadbe yis misakwa yidukenewa kibeynevwi. Kuwis Jesus Cristo umahkiswe kahadbe wixwiy humaw kibeynevwi.

⁸ Nikwe uyay tiviknene akak gihiyekemni kibeyne. Uyay miniw ariw hiyakemniki mbeyevye patehwevye. Uyay tiviknene akak hiyakemniki barewbetnene inyewatnene.

Ka ba yi darihwak gikakkis Jesus gihiyegavu ku pariye taraksavye

⁹ Amadga pahakwa nukagtan ku pariye nah kuwis awahkise yimin. Ayge nah ikiswanew yidahan adahan yis ka darihwak gikakkis hiyeg mahayakamnavye.

¹⁰ Ku aysaw nah awna inakni hene nah ka awna giminkisma neras ku pariye kane Jesus gihiyegavuma adahan yis ka darihwak gikakkis. Nah awna giminkisnenwa Jesus gihiyegavu adahan yis ka darihwak gikakkis neras ku pariye taraksavye. Nah ka awna giminkisma neras kane Jesus gihiyegavuma ku pariye mahayakamnavye, nah ka awna giminkisma neras ku pariye kowtyakuvye, ku pariye arewhavye, ku pariye kiyathenevwi ahehpakti batakka. Mmanawa ka hiya wisma higihwa giwkis neras kane Jesus gihiyegavuma. Igkis muwapuw amadga hawkri.

¹¹ Nikwe nah ka awna adahan yis ka darihwak gikakkis kane Jesus gihiyegavuma. Heneme nah awna adahan yis ka darihwak gikakkis neras ku pariye ikewnenevwi ke wotbe igkis Jesus gihiyegavube kibeynewatnen, heneme igkis gibetkikis taraksa. Nah awna giminkis neras ku pariye ikewnenevwi ke wotbe igkis Jesus gihiyegavube kibeynewatnen, heneme igkis gibetkikis mahayakemnihwa, igkis gibetkikis kowtyakuhwa, igkis gibetkikis kiyatha ahehpakti batakka, igkis gibetkikis pataha hiyeg giwkis, igkis gibetkikis uwkihwa, igkis gibetkikis arewha gitkis hiyeg. Ka yi muwaka darihwak aynesnima gikakkis akebi neras. Axkawa yis ka ax gikakkis.

¹² Ka hiya wixwiyma hiyak gikakkis neras ku pariye kane Jesus gihiyegavuma.

¹³ Ignewa Uhokri hiyak gikakkisnek. Heneme amawka ku wixwiy hiyak gikakkis neras ku pariye ikewnenevwi Jesus gihiyegavu. Nikwe uyay pekkise yibetitak ner awayg ku pariye mbeyevye gihiyekemni.