1 Koríntyus 4 - Uhokri Gahegbetawni Nukune akak Sawmus

Ignewa Uhokri hiyak baki usuh kibeynewatma gibukvig

¹ Usuh ka ariknawnema adahan yis kumadukasa yihiyekemni wotuh. Amawka ku yis iki usuh he Cristo gibukvignenwa. Wannivwi adahan ekkene yit Uhokri gihiyekemni ku pariye hiyeg amadgayavu inin kane hiyak.

² Amawka ku pahavwi ibukti amawka ku ig ihpatrune gikivara giwn avananekwa.

³ Nawenetke yis hiyavun ku nah ka kibeynema Cristo gibuk. In ka sam nutuh. In ka sam nutuh ku hiyeg amadgayavu inin hiyavun ku nah ka kibeynema gibuk. Nahwa ka hiyak ba nah kibeynewatma.

⁴ Nutuh nah kibeyne, heneme ini ka ik adahan wis ihpin ku nah kibeyne. Ignewa Ukivarawiy inurikyene kis adahan hiyavun ba nah kibeynewatma gibuk.

⁵ Nikwe amawka ku wixwiy ka ivegkak pawtak baki wixwiy kibeynewatma Uhokri gibukvig. Amawka ku wixwiy wahap Ukivarawiy inurikyene gidawnhan. Ku aysaw ig danuhnek igwa akkanek madikte ukehnitnene ku pariye ayamawnene abet amisnavye. Igwa kahayaksanek madikte uhiyekemniwiy ku pariye aynene avit uyakniwiy. Avim ini ig kabayhanek gibukvig ku pariye kisnene adahan amava gabay.

⁶ Nukebyuvwi, nah awna inakni hene numinuh hawata gimin kiyavwiye Apolu adahan areketni yit kahadbe yis ka manuk ku samah Uhokri gannasan awna. Amawka ku yis ka iki pahavwi Uhokri gibuk kabayte giw pahavwi hene adahan yis mpihpak giminkis.

Ka kabay yis mpihpekbet

⁷ Mmahki yis mpihpekbet hene? Mmanawa ka hiya pahavwinema hiyeg ikawvari kabaytema giw pahavwi. Madikte wannu ka ukehbetanma wownteknewatma. In ikaka uvitit. Ku samah in madikte ikaka uvitit, mmah nikwe yis kehne yiwanti ke wotbe in yikehbetan yiwnteknewatbe?

Yis ikaw ke wotbe yis hiyak Jesus gihiyekemni kabayntiwa

⁸ Yis ikewne ke wotbe yihiyekemni kuwis kivun akak Uhokri gihiyekemnibe. Yis ikewne ke wotbe yis igisavyebe akak madikte gannu ay yivit. Yis ikewne ke wotbe yis kuwis kumadukene abetnewa Uhokri gikumadukan. Bawa kawa. Usuhwa giwatnivwi kote danuhte atere. Wake henewatbe yis kuwis kumadukene aygebe, nah ka aynsima batekkam. Mmanawa amun ini nikwe usuh hawatakam kuwis kumadukenene aygwata.

Gihiyekemni adahanikwa wixwiy miye uvitwiy

⁹ Heneme ay amadga inin usuh giwatnivwi hiyepne mbeynenen. Usuh ka ik adahan mpihpak kema yisma. Ig Uhokri ike usuh aynte warikap ke hiyegbe ku pariye ikaksaka adahanikwa miyaka. Ku kitwiye usuh wew, madikte hiyeg wakaymnibdi udahan ku samah usuh hiyepne mbeyne ka aynsima avatra ku samah usuh Jesus gihiyegavu. He ahj hawata wakaymni udahan.

¹⁰ Kiskama yis mara. Yis ikawnamah ke wotbe yis hiyakemniyevwibe adahan yis kinetihwa gimin Cristo. Usuhme, hiyeg iki usuh yuma uhiyekemni ku samah usuh kinetihwene gitkis gimin Cristo. Yisme ikawnamah ke wotbe yis detyevwibe. Usuhme, hiyeg iki usuh yuma udatni. Yisme ikawnamah ke wotbe yis kiyatyevwibe. Usuhme, hiyeg iki usuh yuma ukiytani.

¹¹ Kuviknene usuh hiyepnene mbeyne. Usuh yuma umana. Usuh yuma uhigvan. Usuh yuma ukawihni. Usuh biwhka. Usuh wewnamah yuma uvinuh.

¹² Usuh kannivwinene adahan uvituh. Ku aysaw hiyeg mahivwih usuh, usuhme diyuhkis akak kabayka. Ku aysaw hiyeg hiyapkis mbeyne wotuh, usuhme kiyaknihwa gikakkis.

¹³ Ku aysaw hiyeg awna mbayka uminuh, usuhme kaytwin akak kabayka. Usuh ka ariknawnema gitkis hiyeg. Gitkis usuh ke gikugkukis avathawnibe.

Nah Pol ke yigbe ikene yihiyekemni

¹⁴ Nah ka awahkis inin kagta yimin adahanma yimerekwitnima. Nah ke yigbe ikene yihiyekemni. Yisme ke nukamkayuvwibe nubetkivube.

¹⁵ Hiyawa yis kadahan ka aynsima yikannuhtenvu akiw, yigme pahavwiwa. Nahnewa ke yigbe awaku ku samah nahkite ekke Uhokri ginetni yit nah keh yis humaw ke wotbe yis pahavwiwatbe gikak Cristo Jesus. Inneki keh yis humaw ke nukamkayuvwibe.

¹⁶ Awaku inin nah aya yit ikawnay tuwatavye ke nahbe.

Nah awahkiste Timotyu yimin

¹⁷ Adahanikwa ini nah gawahkisten kiyavwiye Timotyu atere yimin. Ig kewa nukamkayhbe nubetkibe nutuh. Ig kabivwiye kannivwi gidahan Ukivarawiy. Ku aysaw ig danuh atere yitnek ig kiyekisnek yit inakni nuhiyekemni giwntak Cristo ku samah nah ekkene muwapuw givuwiwkis Jesus gihiyegavu.

Nah hiyak gikakkisnek neras ku pariye ikawnamahkis yavitnen

¹⁸ Yaytak ayge ikawnamahkis ke wotbe igkis yavitminbe. Igkis ikawnamahkis kiyatte yiw, mmanawa givewkankis ku nah ka kiboka atak atere akiw adahan nah awnene yikak.

¹⁹ Heneme gikak Uhokrinek nah danuhnek atere yit kibehtenwa. Ayge nikwe nah hiyak gikakkisnek neras ku pariye ikawnamahkis yavitmin. Ka samwa nutuh ku igkis kannuye kinetihwa. Nah hiyepkere ba igkis kadahanwatma Uhokri gidatni ay givitkis.

²⁰ Mmanawa hiyeg ku pariye kuwis kawih Uhokri gikumadukan igkis ka ininewatma kannuye kinetihwa gimin Uhokri, heneme igkis kadahanye Uhokri gannu ay givitkis hawata.

²¹ Aterenewa nah. Ba yis muwaka nah danuh atere akak himahwaki ba kawk? Ku yis ka muwaka, amawka ku yis miyehe ini mpihpaki. Ayge nikwe nah danuhnek atere yit akak madikte nubetki akak madikte huwivgaki.