1 Koríntyus 3 - Uhokri Gahegbetawni Nukune akak Sawmus

Yis ke bakimnayhbe kote hiyakte hiyakemniki

¹ Nukebyuvwi, minikwak yis kote aymuhwate akak Cristo gihiyekemni. Avim ini yihiyekemni amedgene inin. Yis kewa bakimnayhbe. Yis kote hiyakte hawkri, Uhokri gihawkan. Yis ka gitiphawnema Uhokri. Avim ini nah ekke yit hiyakemniki ku pariye pakekunawa yikak.

² Nah ke wotbe yisukisten akak ihintakutnen. In ke wotbe nah ka yikeptenma akak kiyavwiyegben gimanakis. Mmanawa avim ini yis kote ikte adahan yis amavin. Kurime avim inin yis ayiparivye ariwntak ku samah yis wageswe Jesus gihiyegavu. Heneme kuviknene yis kote ikte adahan amavin.

³ Mmanawa yis yidukwenewa yihiyekemni amedgene inin. Yis atihpekne. Yis iniyekne. Amun ini nikwe yis wewnene akak hiyakemniki amadgaya inin. Yis ikewvi ke hiyegbe ku pariye kane hiyak Uhokri.

⁴ Ku aysaw pahavwi awna: “Nah gidahan Pol.” Pahavwime awna: “Nah kawa. Nah gidahan kiyavwiye Apolu.” Ku samah yis awna inakni hene, yis ikewne ke hiyegbe ku pariye kane hiyak Uhokri.

Yis ka uhiyegavuma; yis Uhokri gihiyegavu

⁵ Nah gikak kiyavwiye Apolu usuh ka yikivarama. Usuh he Uhokri gibukvignen. Ig kawihe usuh mpuse adahan kannivwiye yibet adahan wagahkisne yikamaxwan givitit Uhokri.

⁶ Yis kewa pahak wasbe. Nahme ke pahavwi amutrivutnebe, mmanawa nah mutuhe Uhokri giwn abetit yihiyekemni. Igme kiyavwiye Apolu ig ke pahavwi adahpusetnibe namutravu akak un. Heneme ignewa Uhokri ku pariye hiyankise giwn abet yihiyekemni.

⁷ Ku pariye mutuhne was ku pariye adahpusene was akak un ignes ka ariknawnema. Ignewa Uhokri madikte, mmanawa ignewa ku pariye keh inakni wamutra hiyan.

⁸ Pahavwi ku pariye mutuhne was ig ka kabaytema giw pahavwi ku pariye adahpusene was akak un. Igkis pahatwowa gannivwikis. Igkis mpuse uti gitiwnikisnek pakekunawa akak ku pariye gannivwikis.

⁹ Hawata usuh. Usuh kannivanene payak gikak Uhokri ayge yibet. Mmanawa yis ke Uhokri giwasrabe. Hawata akiw yis kewa paha paytbe gidahan Uhokri.

Yikannuhten ke wotbe wagahkisbetene paytbe gidahan Uhokri

¹⁰ Nahme kewa pahavwi paytevutnebe. Ig Uhokri akak gabay ig keh nah kabaytiwye paytevutne. Ku samah nah ekkene yit Uhokri gihiyekemni adahan yis kamaxwa givitit Kiyavwiye Jesus, nah ke wotbe tabirasenebe payt akamaxten. Kurime nawenyevwi hiyeg wagahkisbetene. Igkis hawata ekkene yit Uhokri gihiyekemni akiw. Heneme amawka ku igkis avuriw adahan igkis keh kabayntiwa annivwit.

¹¹ Ig Jesus Cristo ignewa akamaxten ku pariye kawih adahan ini payt gidahan Uhokri. Ka hiya wisma tabirasa nawenyewa akamaxten akiw.

¹² Neras nawenyevwi ku pariye ekkene Uhokri gihiyekemni yit ignes ke wagahkisbetenebe paha payt gidahan Uhokri. Igme Kiyavwiye Jesus Cristo ig ke ini payt akamaxtenbe. Igkisme ke wotbe wagahkisbetene paha payt givititbe. Gaytakkisme keh kibeyne annivwit gidahan Uhokri. Ignes ke wotbe wagahkisbeta paha payt, ke wotbe akak tipbe akak sivaribe akak karukribe wahano. Gaytakkisme ka keh kibeynewatma annivwit gidahan Uhokri. Igkis ke wotbe wagahkisbeta payt akak gimahnikis, ke wotbe akak ahnenbe akak iytebinenbe akak ahamnanenbe.

Wannivwiy gidahan Uhokri hikekkanek ba in kibeynewatma

¹³ Aysawnemenek madikte hiyeg gannivwikis hiyapka ba in kibeynewatma. Ig Uhokri akkanek huwewe ba in kibeynewatma. Ig hikeknek gannivwikis ke wotbe akak tiketbe ba in kibeynewatma.

¹⁴ Ku aysaw nor kene tiketbe mpiyanek, ig ku pariye gannivwi adukwenewa ka woh igi dax gitiwninek.

¹⁵ Igme ner ku pariye gannivwi wohe, ig biyuk akak gitiwninek. Heneme igwa ka biyuknek. Kaba ig hahwa, heneme ig gidukwenewa isahptawnek, ke pahavwibe he isahptewviyenen ariw tiket.

Amawka wixwiy ka mbayha Uhokri gihiyegavu

¹⁶ Ka ba yis hiyap ku wixwiy Uhokri givin? Mmanawa Uhokri Gitip misakwa ay uvitwiy.

¹⁷ Ku pahavwi mbayha Uhokri givin, nikwe ig Uhokri mbeyhevginek hawata. Mmanawa Uhokri givin in barewvitye. Wixwiynewa gidahan Uhokri. Wixwiynewa ku pariye givin.

Hiyeg kinikiswa arit gidahankiswa gihiyekemnikis

¹⁸ Ka ba yi kinis yivit. Ku pahavwi yaytak ikawvari hiyakemniye akak hiyakemniki amadgaya inin, amawka ku ig sarayhe ini gihiyekemni hanpa, ig ikaw ke pahavwi pupyebe, kahadbe ig humaw inyewa hiyakemniye.

¹⁹ Mmanawa hiyakemniki amadgaya inin in mahayakemniki git Uhokri. Henewa in ku samah Uhokri gannasan awna. In awna: — Ig Uhokri isaksa hiyeg hiyakemniyevwi akak hiyakemniki amadgaya inin adahan ignes kinikiswa arit gidahankiswa gihiyekemnikis.

²⁰ Hawata pahakwa Uhokri gannasan akiw awna: — Ig Uhokri hiyak ku samah gihiyekemnikis hiyeg ku pariye hiyakemniyevwi akak hiyakemniki amadgaya inin. Ig hiyakni ku in he waditnevyenen.

Ka ba yi kumadukasa yihiyekemni gitkis hiyeg amadgayavu inin

²¹ Nikwe ka hiya wisma awna: “Nah gidahan Pol.” Kawnata hiya wisma awna: “Nah gidahan kiyavwiye Apolu.” Wis ka muwaka kumadukasa uhiyekemni gitkis hiyeg amadgayavu inin.

²² Nah Pol, gikak kiyavwiye Apolu, gikak kiyavwiye Pedru usuh ka kumaduka yihiyekemni. Ay amadga inin yuma hiyeg kumaduka uhiyekemniwiy. Ine wowskawniwiy ine umiremniwiy ine ku pariye ay amadga inin kuri ine ku pariye nehmnikuhpiye. Yuma ariknawnema, yuma pahavwinema amadgaya inin kumaduka uhiyekemniwiy.

²³ Ignewa Cristo kumaduka uhiyekemniwiy. Igme Uhokri ig kumaduka Cristo gihiyekemni.