1 Koríntyus 2 - Uhokri Gahegbetawni Nukune akak Sawmus

Nah kinetihwa giminenwa Jesus

¹ Nukebyvwi, ku samah pitatye nah danuh atere yit adahan nah ekkene Uhokri ginetni yit, nah ka awna iwit ku pariye hiyeg amadgayavu inin iki kibeyne ku pariye ignes iki ku in he hiyakemnikinen.

² Mmanawa nah ayipa ahegbete nuhiyekemni adahan nah kinetihwene giminenwa Jesus Cristo, nah kinetihwene aminenwa ku samah ig umahkiswe amin ah.

Nah ka iveg avitit hiyakemniki amadgaya inin

³ Ku samah nah ayge yibet, nah ka iveg avitit nuhiyekemni amadgaya inin. Nah avisase hawata nah segke ka aynsima ku nawenetke nah awna iwit ka huwit avigkut Uhokri gihiyekemni.

⁴ Ku aysaw nah ekkene inakni Uhokri ginetni yit, nah ka kinistay akakma iwit ku pariye hiyeg amadgayavu inin iki kibeyne iwit. Heneme nah ekkene yit Uhokri Gitip gihiyekemni. Hawata akiw nah ekkene yit gannu.

⁵ Inneki keh numawkan yis ka iha Uhokri giwn awakuma ku samah yis pukuhpin akak yidahanwa yihiyekemni amadgaya inin. Heneme, numawkan yis iha giwn awaku igwa Uhokri akka yit akak gidatni ku in inyewa.

Kane Uhokriyanvuma ka hiyak Uhokri gihiyekemni

⁶ Heneme gitkis hiyeg ku pariye kuwisnene hiyeknevwi Uhokri gihiyekemni, nah awna kibeyne hiyakemniki gitkis. Nah awna hiyakemniki, heneme ka hiyegma gihiyekemnikis amadgayama inin. Ine kawnata giwewkistenkisma gihiyekemnikis. Mmanawa neras gihiyekemnikis mpiye madiktenek.

⁷ Nah awna Uhokriwa gihiyekemni. Inakni gihiyekemni ke wotbe in ayemewnenebe. Hiyeg kane Uhokriyanvuma ignes ka hiyakni. Heneme ig Uhokri kuwis ahegbetin adahan kabayka udahanwiy ku samah yumahte hawkri.

⁸ Hiyeg giwewkistenkis amadgayavu inin ignes ka hiyak ku samah Uhokri gihiyekemni. Wake igkis hiyaknibe, igkis ka daddahkiskama Ukivarawiy inurikyene ku pariye kane gikiytanisima.

⁹ Heneme igkis ka ik adahan pukuha Uhokri gihiyekemni. Mmanawa in Uhokri gannasan awna: — Wowtyak amadgaya inin in ka hiyapti ini kabayka ku pariye ig Uhokri darihkis gidahankis neras ku pariye batekyevwi gikak. Utaybi ka timapniti. Ka hiya wisma ivegminin abet uhiyekemni. Henewatbaki in Uhokri gannasan awna.

Uhokri Gitip akki wotwiy Uhokri gihiyekemni

¹⁰ Heneme kibeyne, ig Uhokri ekke wotwiy inin kabayka givitimpi Gitip. Ig Gitip hiyak madikte Uhokri gihiyekemni.

¹¹ Ku samah wis ka hiya wisma hiyak pahavwi gihiyekemni madiktema. Gitipnenwa hiya ahiyakka. Uhokri Gitip hawata ignewa hiyak Uhokri gihiyekemni madikte.

¹² Ig Uhokri ka iki uvititwiy hiyegnenwa gitip amadgaya inin. Heneme ig ike gidahanwa Gitip uvititwiy. Ig ikevgi uvititwiy adahan ekkene wotwiy madikte ini kabayka ku pariye ig ike wotwiy he gikanenwa.

¹³ Nikwe wixwiy ka kinetihwa akakma iwit ku pariye uhiyekemniwiy amadgaya inin akka wotwiy. Wixwiy kinetihwa akak iwit ku pariye Uhokri Gitip akka wotwiy. Wixwiy ekkene Uhokri Gitip gihiyekemni gitkis neras ku pariye gitiphewnevwi Uhokri.

Uhokri gihiyekemni nawenyewa ariw hiyakemniki amadgaya inin

¹⁴ Ku pahavwi yuma Uhokri Gitip ay givit, ig ka hiya igma amava Uhokri Gitip gihiyekemni. Ka hiya igma pukuhpin. Git in he mahayakemnikinen. Awaku Uhokri Gitip gihiyekemni wis pukuhpin akak Uhokri Gitip ay uvit.

¹⁵ Igme pahavwi ku pariye Uhokri Gitip ay givit igi pukuha madikte. Heneme pahavwi ku pariye gihiyekemni amadgaya inin ig ka hiya igma pukuha ner pahavwi gihiyekemni.

¹⁶ Yuma pahavwinema hiyeg hiya asamanak adahan pukuha Uhokri gihiyekemni. Yuma pahavwinema hiyeg kannuh iki hiyakemniki git Uhokri. Heneme kibeyne. Kuri wixwiy kadahan Cristo gihiyekemni ay uvitwiy.