1 Koríntyus 16 - Uhokri Gahegbetawni Nukune akak Sawmus

Ahiwnay karukri gidahankis madiptavye

¹ Nukebyuvwi, kuri nah akkamnihte yit adahan ku samah yis ahiw karukri gidahankis Jesus gihiyegavu madiptavye. Kuwis nah ekke gitkis Jesus gihiyegavu aynte Galasiyamnaw adahan ku samah igkis ahiw nor karukri. Amawka ku yis ahiw hawata ku samah igkis ahiwnes gidahankis. Kuri nah akkite yit ku samah.

² Mpuse paka abet in kabay adahan yis wiwhnekuye araytak yikakura adahan yikan gitkis madiptavye. Yis bayahgu avawyewa. Ikinay ku samah yis uti ayge. Nikwe ku aysaw nah danuhnek atere yit, yikan kuwis ahegbet.

³ Ayteke nikwe hiyawa yiswa kaniy ku pariye hiyeg yimawkan adahan ewkwiye egu yikan gitkis neras madiptavye aynte Jerusalém. Nahme ku aysaw nah danuhnek atere yit nah awahkisgikis atere Jerusalém payak akak pahak kagta nuwntak kahadbe hiyeg ka pukuhpaw gibohrikis.

⁴ Ku yis muwaka ik adahan nahwa ewk yikan atere, nikwe nah atak gikakkis neras yikanyanvu.

Nah atere misakwa yikak ayiptenek ayge

⁵ Kuwewanek ku aysaw pisenwa nuwewvan avitiw Masedôniyamnaw, nah danuhpanek atere yit.

⁶ Nutuhbe nah misakwanek ayipte ayge yikak. Nawenetke adahan paxnika kayg. Ayteke nikwe nah aharitkere yis mayunek nutuh adahan nah tivikwiye akak kabayka ku kitwiye nah.

⁷ Mmanawa nah ka muwaka nah he mpiyenen awvre yimuniw. Gikak Uhokrinek nah misakwanek ayipte ayge yikak.

⁸ Heneme kuri akak inin amawka nah misekwenete ay avit paytwempu Efesu he ahawkanavrik ini fet kewye Pentekostis danuh.

⁹ Mmanawa nuvewkan in kibeyne hawkri adahan nah kannivwiye ekkene Uhokri gihiyekemni ay avit inin paytwempu. Hiyawa ka aynsima hiyeg suguhnan, heneme hawata ka aynsima hiyeg timepkere Uhokri gihiyekemni.

Amavanay Timotyu kabayntiwa

¹⁰ Ku aysaw ig kiyavwiye Timotyu danuhnek atere yit, uyay amavanig kabayntiwa. Mmanawa ig kannivwiye gidahan Ukivarawiy Jesus hawata ke nahbe.

¹¹ Ka ba yi tukuhptig. Amawka yis kiyatig. Ayteke pisenwa gannivwi ayge yibetnek, uyay awahkiswig numinuh akak kabayka. Nah wahapnig ay ku aysaw ig danuh atan gikakkis ukebyuvwiy.

¹² Igme ukebyi kiyavwiye Apolu, nah kuwis awna git adahan ig atak atere danuhpa yit gihaptikis ukebyuvwiy. Heneme ig kote ikte adahan ig atak atere. Ka sam. Ku aysaw ig kahawkan ig atak aterenek.

Misakwanay akak yawaygi

¹³ Nukebyuvwi, misakwanay avuriwnenekwa yihiyekemni ba in kabayntiwatma. Ka ba yi isahkiswa ariw yikamaxwan givitit Cristo. Misakwanay akak madikte yawaygi hawata akak madikte yidatni.

¹⁴ Madikte ku pariye yis keh, kehnabay akak Uhokri gamnihra ay yivit.

Kiyathanay yiwewkisten

¹⁵ Nukebyuvwi, ivegnay givititkis kiyavwiye Estéfanas gikakkis gikebyuvwi ku pariye misekwenevwi ayge yibet. Igkis kitnene ku pariye kamaxwevye givitit Cristo ayge Gresiyamnaw. Kuri igkis ikatuswe adahanikwa giwewkistenkis Jesus gihiyegavu ayge.

¹⁶ Nah aya yit adahan yis iha giwnkis. Adahan yis iha giwnkis madikte neras ku pariye kannivwiyevwi wewkisnevwi Jesus gihiyegavu ke igkisbe.

¹⁷ Nah bateke numinuh ku samah nah hiyap ig kiyavwiye Estéfanas gikak kiyavwiye Fortunatu hawata ig kiyavwiye Akayku, igkis danuh atan nutuh ayteke yiwntak. Igkis keh nah bateke ke wotbe yis ayvekuyebe ay nukakuh.

¹⁸ Igkis keh nah bateke hawata ku samah nah hiyak ku igkis keh yis bateke hawata. Igkis kibeynevwi hiyeg. Igkis kis adahan yis kiyatigkis.

Usuh awahkis kabayka yimin

¹⁹ Jesus gihiyegavu ay Asiyamnaw igkis awahkis kabayka yimin. Ig kiyavwiye Akwila gukak kiyavuno Pirisila egkis hawata awahkis ka aynsima kabayka yimin payak gikakkis madikte ukebyuvwiy ku pariye lammesyavu ay guvinwakis.

²⁰ Madikte ukebyuvwiy ay awahkis kabayka yimin. Aytnihaknay pawtak nudahan akak inyewa batekka.

²¹ Kuri nahwa Pol tamak inin iwit butitnene akak nuwakuh, ka igma neneve tamak: Nah awahkis kabayka yimin madikte.

²² Ku pahavwi ka inyewatma batek gikak Ukivarawiy Jesus Cristo, ig Uhokri hiyapkis gitnek. “Maranatá”. Ba ayta kibehtenwa, Kiyavwiye.

²³ Ukivarawiy Jesus Cristo gabay yikaknek.

²⁴ Nah hawata nah batek yikak, nikwe misakwanay akak madikte batekka, mmanawa wixwiy pahavwiwa gikak Cristo Jesus. Kibeyne.