1 Koríntyus 14 - Uhokri Gahegbetawni Nukune akak Sawmus

Aharitnay Uhokri gannu ku pariye pi ayavate hiyeg

¹ Mpiksawnay aharit Uhokri gamnihra adahan in misakwa ay abet yihiyekemni. Mpiksawnay hawata aharit Uhokri Gitip gannu adahan in misakwa ay yivit. Kibeyne ig Uhokri kawihkis arakembet gannu uvititwiy. Ini gannu adahan wis awnene iwit ku pariye pes giwntak Uhokri, aharitnay ini. In ka aynsima kabayte ariw ini gannu adahan wis awnene ariku nawenyewa iwit ku pariye wis kane pukuhpa.

² Mmanawa ku pahavwi awna ariku nawenyewa iwit, amun ini ig ka awnenema gitkis hiyeg amedgenema inin. Gitnenwa Uhokri ig awnene. Yuma hiyeg pukuhpene giwn. Ig awna akak gitip iwit ku pariye kane pukuhpaka.

³ Igme pahavwi ku pariye kabunuga akak Uhokri Gitip gannu adahan ig awnene iwit ku pariye pes giwntak Uhokri, igi awna gitkis hiyeg amedgenevwi inin. Ayge ig wagahkisne gihiyekemnikis, ig ikene gawaygikis hawata ig gaydaptihtenkis.

⁴ Igme pahavwi ku pariye awnene ariku nawenyewa iwit, amun ini ig wagahkisne gawaygi igwo. Igme pahavwi ku pariye awnene iwit ku pariye pes giwntak Uhokri, amun ini ig wagahkisne gawaygikis Jesus gihiyegavu ku pariye pahadguvu lammesya ayge.

Amawka wixwiy awna gitkis hiyeg giwnavrikkis

⁵ Nah muwaka yis kadahanyekuye Uhokri gannu adahan yis awnene ariku nawenyewa iwit. Heneme nah ka aynsima muwakate yis kadahanyekuye ini gannu adahan yis ekkene iwit ku pariye pes giwntak Uhokri. Pahavwi ku pariye awna ariku nawenyewa iwit amawka ku ig wages giwn kahadbe ig wagahkisne gawaygikis madikte Jesus gihiyegavu ayge. Ku ig ka wages giwn, amun ini nikwe ig ku pariye ekkene iwit ku pariye pes giwntak Uhokri, igi ka aynsima kadahante gawaygi giw.

⁶ Nikwe, nukebyuvwi, ku nah danuh atere yit nah awna yikak ariku nawenyewa iwit, in ka ayavaynek ariknawnema, mmanawa yis ka pukuhpanek ku pariye nah awna. Heneme ku nah akki yitnek hiyakemniki ariku wownavrikwiy ku pariye Uhokri gakkan nutuh, ini ayavaytenek. Ku nah ekkene Uhokri gihiyekemni yit, ku nah awnene iwit ku pariye pes giwntak Uhokri, ku nah yikannuhten amin Uhokri giwn, innewa ku pariye ayavaytenek.

⁷ Heneme ku nah awna yit ariku iwit ku pariye yis kane pukuhpa, nah humaw ke agigtetbe ku pariye ka agigha kabayntiwatma. Ku arigtet ka agigha kabayntiwatma, ka hiya wisma hiyak avat ku pariye teska. Aramten, viyoloh, madikte henep.

⁸ Hawata ke suwtat garignibe, amawka ku in puhka kabayntiwa huwewehe, kahadbe in ahegbetasa gihiyegavu avit kerka.

⁹ Hene hawata amawka ku wis awna ariku iwit ku pariye wis pukuha adahan ahegbetesene Jesus gihiyegavu. Ku wis awna git pahavwi ariku iwit ku pariye ig kane pukuhpa, nikwe ig ka hiyak ku pariye unetni git. Wown mpiya ke maygbe he mpiyevyenen.

¹⁰ Ka aynsima hiyeg mpuse giwnkis ay amadga inin. In madikte kabayntiwa ta gitkis hiyeg ku pariye pukuhpin.

¹¹ Heneme ku wis ka pukuha pahavwi hiyeg giwn ku pariye ig awna wot, wis misekwe kewa nawotunyebe nit. Ig hawata misekwe kewa nawotunyebe ta wot.

Aharitnay Uhokri gannu ku pariye wagahkisne hiyeg gawaygikis

¹² Nikwe ku samah yis kuwis mpiksewne aharit Uhokri Gitip gannu adahan in misakwa ay yivit, uyay mpiksaw aharit ini gannu ku pariye kawih adahan wagahkisne gawaygikis Jesus gihiyegavu ku pariye pahadguvu ayge. Ini gannu ka aynsima kabayte.

¹³ Ku yis kabunuga akak ini gannu adahan awnene ariku nawenyewa iwit ku pariye yis kane pukuhpa, piriyepkawnay adahan yis kadahanwata ini gannu adahan wagesne inakni yiwn kahadbe madikte hiyeg pukuha inakni yiwn.

¹⁴ Ku aysaw wis piriyepkaw ariku iwit ku pariye wis kane pukuhpa amun ini wis piriyepkewne akak utip. Heneme wiswa ka pukuha wown akak uhiyekemni.

¹⁵ Nikwe kawki inwonema nah piriyepkaw akak nutivuh. Amawka nah piriyepkaw akak iwit ku pariye nah pukuha hawata. Kawki inwonema nah pak avat akak nutivuh. Amawka nah pak akak iwit ku pariye nah pukuha hawata.

¹⁶ Abetnewa ku aysaw yis pahadguvu lammesya ku pahavwi kabayha Uhokri akak gitipnenwa ariku nawenyewa iwit, nikwe neras hiyeg ayge ka pukuhpin. Nikwe ignes ka hiya igkisma tuguhkis gihiyekemnikis hehpekuyema gikak ner pahavwi, mmanawa igkis ka hiyak ku pariye inakni iwit ig awna.

¹⁷ Henewa, ig kibeyhene Uhokri kabayntiwa, heneme neras hiyeg ayge he misekwevi.

¹⁸ Kibeyne gidahan Uhokri, ku samah nah awnate ariku nawenyewa iwit mpiyay madikte.

¹⁹ Heneme ku aysaw nah lammesya nah ka aynsima muwakate awna pohowku akebi iwit ku pariye hiyeg ik adahan pukuhpa, mpinekata nah awna ka aynsima iwit ku pariye ignes kane pukuhpa. Nah muwaka awna iwit ku pariye kannuhne hiyeg.

Ku yis awna iwit giwntak Uhokri yiwnavrik, yis ayava madikte hiyeg

²⁰ Nukebyuvwi, ka yi muwaka ikaw kema bakimnima ku pariye kane hiyak hawkri. In kabay adahan yis ikaw ke bakimnibe ku pariye kane hiyak ba mbaykama amadga hawkri. Heneme pukuhpanay nuwnuh kewa hiyeg kiyavwiyegbenbe.

²¹ Yit in kabay yis awna ariku nawenyewa iwit adahan areketni gitkis Jesus gihiyegavu aygnenevwi abet lammes ku Uhokri Gitip ay yivit. Heneme ay amadga Uhokri gannasan ig Uhokri awna: — Neras hiyeg judeyenevwi ka ihpenema nuwnuh. Nah awahkiste hiyeg giminkis ku pariye awnanek ariku nawenyewa iwit. Ignes awna nawotunyevwi giwnavrikkis. In humaw areketninek gitkis adahan ku samah gihiyekemnikis piyawakad ariw nuhiyekemni. Ka sam. Hiyawa igkis timap inakninek hene, heneme igkis gidukwenewakis ka ihpekere nuwnuhnek. Henewatbaki ig Uhokri awna.

²² Nikwe ini Uhokri gannu adahan awnene ariku nawenyewa iwit, in ka areketnima gitkisma hiyeg ku pariye ihpenevwi Uhokri giwn. In areketni gitkis hiyeg ku pariye kane ihpenevwima Uhokri giwn. In arakak adahan ku samah gihiyekemnikis piyawakad giw Uhokri gihiyekemni. Inme Uhokri Gitip gannu adahan awnene iwit ku pariye pes giwntak Uhokri, in ka ikaka adahanma areketni gitkis hiyeg ku pariye kane ihpenevwima giwn. In ikaka gidahankis hiyeg ku pariye ihpenevwi giwn adahan wagahkisne gawaygikis.

²³ Heneme in hawata kabay gidahankis nawenyevwi hiyeg akiw. Ku aysaw wixwiy Jesus gihiyegavu pahadguvu lammesya nawenetke pahavwi danuh atere ku pariye kotenene pukuhpate ku samah Uhokri iki ini gannu uvititwiy. Nawenetke pahavwi danuh atere ku pariye kane ihpenema Uhokri giwn. Ku madikte hiyeg ayge awnenekuye ariku nawenyewa iwit, ayge igkis iki ku wixwiy puwvup.

²⁴ Heneme ku wixwiy madikte awnenekuye iwit ku pariye pes giwntak Uhokri in kabayte gidahankis. Nawenetke pahavwi danuh atere ku pariye kane ihpenema Uhokri giwn. Nawenetke pahavwi danuh atere ku pariye kotenene pukuhpate ku samah Uhokri iki ini gannu uvitwiy. Ku ig danuh atere, ku ig hiyap wixwiy awnenekuye iwit ku pariye pes giwntak Uhokri, ayge nikwe in daxnek avit giyakni, in akkinek git ku ig taraksevye.

²⁵ Avim ini wixwiy akkinek git ini gikehnitnene ay avit giyakni. Igme hiyapni hene, ig paberetusawnek ig kabayhanek Uhokri. Ig awnanek: “Inyewa ig Uhokri ay yibet.”

Amawka wixwiy lammesya han

²⁶ Kuri nukebyuvwi, ku aysaw wixwiy pahadguvu lammesya amawka ku wixwiy kehnekuye ku pariye kawih adahan wagahkisne gawaygikis Jesus gihiyegavu ayge. Pahavwi pakkis avat gitkis hiyeg. Pahavwime kannuhekne. Pahavwime ekkene ku pariye ig Uhokri gakkan git. Pahavwime awna ariku nawenyewa iwit. Pahavwime wagesne inakni giwn. Henewa wixwiy keh madikte adahan wagahkisne ukebyuvwiy gawaygikis.

²⁷ Ku yaytak ayge awnekere ariku nawenyewa iwit, ka ik adahan kibitema hiyeg awnenevwi hene. Ik adahan piyanmawa ba mpanmawa hiyeg awnenevwi. Amawka ku igkis awna pahavwimpi. Amawka ku pahavwi ayge ahegbet adahan wagesne inakni giwnkis kahadbe madikte hiyeg pukuha ku pariye igkis awna.

²⁸ Ku yuma hiyeg ayge ahegbetnema adahan wagesne pahavwi giwn, amawka ku ig ka timapkis giwn gitkis hiyeg ayge. Amawka ku ig awna kabayanesa, igwo awnene git Uhokri.

²⁹ Ku yaytak ayge awnekere iwit ku pariye pes giwntak Uhokri, kawnata ik adahan kibitema hiyeg awnenevwi hene. Ik adahan piyanmawa ba mpanmawa hiyeg awnenevwi. Amawka ku neras ku pariye ayge timepnevwi amawka ku ignes ikenekuye gitewkis atere adahan igkis hiyepne ba inyewatma giwntakwatma Uhokri.

³⁰ Ku samah pahavwi awnenete iwit ku pariye pes giwntak Uhokri amawka ku pahavwi ka idis ginetni atere. Ku ig Uhokri iki gihiyekemni git pahavwi akiw, amawka ku ig isaksenate ner pitatye pisenwa ginetni. Butte igme awna.

³¹ Mmanawa ik adahan wixwiy awnenekuye iwit ku pariye pes giwntak Uhokri pahavwimpi. Kahadbe madikte hiyeg kannuhwa. Kahadbe madikte hiyeg iwenekuye gawaygikis.

³² Neras ku pariye amava iwit ku pariye pes giwntak Uhokri amawka igkis ka biyuksa gihiyekemnikis. Igkis ik adahan waha pahavwi pisenwa ginetni avit igkis awna.

³³ Mmanawa ig Uhokri ka humakwiy adahan wixwiy dakuhwenema. Ig humakwiy adahan wixwiy kariswavu.

Amawka tinogben misakwa tinwovu

³⁴ Ku aysaw wixwiy pahadguvu lammesya amawka ku tinogben ayge egkis misakwa tinwovu. Henewa egkis misakwa muwapuw ku kiney hiyeg pahadguvu lammesya. Ka yi muwaka isaksa egkis idiswa abet inetit. Amawka ku egkis iha giwn guwewkistenkis. Henewatbaki Uhokri giwn awna.

³⁵ Ku aysaw egkis timepkere arakamnihka, kuwewanek egkis aynte guvinwakis, hiyawa egkis aya gugihgikis. Mmanawa ku tinogben idis gunetnikis abet lammes in maraki udahanwiy.

Ihpanabay nuwnuh

³⁶ Mmah yis korintyuyenevwi ka ihpekere inakni nuwnuh? Mmah yivewkan yis hiyakte Uhokri giwn mpiyan? Kiyeminahnabay. Uhokri giwn ka pes yiwntakma. Ine in ka danuh yitnenwatma.

³⁷ Ku pariye ayge igyewa Uhokri gawneve, ku pariye igyewa gitiphewne Uhokri, igi hiyakni ku inakni nuwnuh in Ukivarawiy Uhokri giwn ku pariye nah awahkis yimin ku avim inin.

³⁸ Ku pahavwi ayge ka ihpekere ku pariye iwit waditnene nikwe gihawkanavrik.

³⁹ Nukebyuvwi, ini Uhokri Gitip gannu adahan ekkene iwit ku pariye pes giwntak Uhokri, aharitnay ini adahan in misakwa ay yivit. Heneme ini gannu adahan awnene ariku nawenyewa iwit ka yi muwaka mpithin.

⁴⁰ Ku aysaw wixwiy pahadguvu lammesya amawka ku wixwiy keh madikte wadit akak madikte hiyakemniki, avigkutavriknawa.