1 Koríntyus 13 - Uhokri Gahegbetawni Nukune akak Sawmus

¹ Hiyawa nah kabunuga akak Uhokri gannu adahan nah awnene ariku nawenyewa iwit ku pariye nah kane pukuhpa. Hiyawa nah awna giwnavrikkis ahj. Heneme ku nah yuma Uhokri gamnihra ay nuvituh, amun ini inakni nuwnuh wageswa he amannenwa. Nah ayge ke biwhnebe sivaribe.

² Hiyawa nah kabunuga akak Uhokri gannu adahan nah awnene iwit ku pariye pes giwntakwa Uhokri. Hiyawa nah hiyak madikte ku pariye nehmnikuhpiye. Hiyawa nah hiyak madikte hiyakemniki. Hiyawa nah kabunuga akak nukamaxwan adahan nah higihkise waxri imuwadnene akak nubiyunenwa. Heneme ku nah yuma Uhokri gamnihra ay nuvituh, amun ini nah ka ariknawnema.

³ Hiyawa nah kakanhaw madikte newkanbet gitkis madiptavye. Hiyawa nah bukahkis nuvituh adahan nah ka wihwa giw Uhokri. Heneme ku nah yuma Uhokri gamnihra ay nuvituh, nikwe nah ka uti ariknawnema kabayka.

Ku aysaw Uhokri gamnihra ay uvit wis miyeh uvit

⁴ Ku aysaw Uhokri gamnihra ay uvit wis kiyaknihwa gikak pahavwi. Wis amnihgi. Wis ka atihpig. Ine wis kawnata keh uwanti ku wis kabayte giw.

⁵ Ku aysaw in Uhokri gamnihra ay uvit wis ka marakwa pahavwi. Ine wis kawnata mpukaw git. Ine wis kawnata ehwa gikak. Ku aysaw in Uhokri gamnihra ay uvit wis bayahminig ariw gitaraksan ukak.

⁶ Ku aysaw in Uhokri gamnihra ay uvit wis ka batek akak hiyakemniki ku pariye kane kabay. Heneme wis batek akak hiyakemniki ku pariye inyewatnene.

⁷ Ku aysaw in Uhokri gamnihra ay uvit wis kiyaknihwa gikak pahavwi akak madikte kavigsaki. Wis yuma uvukavawni givit. Wis iveg givitit. Wis avanenkwa ay gihumwa.

Aysawnemenek uhiyekemniwiy wagah nawenyewa akiw

⁸ Aysawnemenek madikte Uhokri gannu ku pariye ay uvitwiy kuri akak inin, in pisenwenek. Heneme Uhokri gamnihra ka pisenwa. Kuri akak inin wixwiy awna iwit ku pariye pes giwntak Uhokri. Heneme aysawnemenek aynte gimun Uhokri wixwiy ka muwaka awna hene akiw. Kuri akak inin wixwiy awna ariku nawenyewa iwit ku pariye wixwiy kane pukuhpa. Heneme aysawnemenek aynte gimun Uhokri wixwiy ka awna hene akiw. Kuri akak inin wixwiy awna hiyakemniki ku pariye ig Uhokri akka wotwiy. Heneme aysawnemenek aynte gimun Uhokri wixwiy ka awna akebi inakni iwit akiw.

⁹ Mmanawa kuri akak inin wixwiy hiyak he aynesanen hiyakemniki. Kuri akak inin wixwiy awnene aynesawa iwit ku pariye pes giwntak Uhokri.

¹⁰ Heneme aysawnemenek ku aysaw wixwiy kuwis hiyak madikte hiyakemniki, amun ini nikwe ini uhiyekemniwiy aynesnene, in kuwis ka henema akiw, mmanawa in kuwis kiyesihwe.

¹¹ In henewa ku samah bakimni aymuhwa. Minikwak nah bakimnite nah awna bakimni giwnavrik, nah batek akak bakimni gibetkiyavrik. Nuhiyekemni bakimni gihiyekemni. Kurime nah kiyavwip, nah ka henema akiw. Nuhiyekemni kuwis aymuhwe.

¹² Ku akak inin wixwiy hiyap Uhokri aynesa wenpunesa ke hiyegbe waruwahwenebe amadga waruw tigahbovye. Wixwiy hiyap henenwa. Heneme aysawnemenek wixwiy hiyavak gikak Uhokri pahepkataknek. Kuri nah hiyakgi aynesawa. Heneme aysawnemenek nah hiyakgi kabayntiwanek hawata ku samah ig hiyakun.

Uhokri gamnihra kabayte ariw madikte

¹³ Ay mpana arikna ku pariye misakwa adahan avanenekwa: ukamaxwanwiy givitit Uhokri, uvegiwiy givitit Uhokri ku ig kehnek wixwiy hiyap kabayka, hawata akak gamnihra ku pariy ikepka uvititwiy. Heneme inin Uhokri gamnihra in ka aynsima kabayte ariw madikte.