1 Koríntyus 12 - Uhokri Gahegbetawni Nukune akak Sawmus

Ku pahavwi mbeyhebdi Jesus, ig ka awna akakma Uhokri Gitip

¹ Kuri nukebyuvwi, nah muwaka yis hiyak amin Uhokri Gitip gannu ku pariye ikaka uvitwiy. Nah muwaka yis pukuhpin kabayntiwa ku pariye in.

² Minikwak yis ka hiyak ku pariye ini Uhokri Gitip gannu, mmanawa yis kote hiyakte Uhokri. Avim ini yis kawohkigahewne arit ahehpaktinen batakka ku pariye kane awnparima, ku pariye wagesyi piyawakad giw Uhokri igyewatnene.

³ Kurime yis timap gakkis ka aynsima hiyeg ku pariye ikaw ku Uhokri Gitip awnene givititakkis. Nah akkite yit ku samah ahiyaka yit baki igyewatma Uhokri Gitip awnene givititakkis. Ku yis timap pahavwi mbeyhebdine Kiyavwiye Jesus giw, igi ka Uhokrima Gitip awnene givititak. Heneme ku yis timap pahavwi awna avititak giyakni, giwn: “Jesus ig nukivara”, nikwe inakni iwit inyewa giwntak Uhokri Gitip.

Ignewa Uhokri Gitip iki Uhokri gannu uvititwiy

⁴ Ka aynsima Uhokri gannu ay uvitwiy, heneme pahavwiwa Gitip iki madikte ini gannu uvititwiy.

⁵ Wixwiy ka aynsima wannivwiy, heneme pahavwiwa ukivarawiy.

⁶ Wixwiy keh arakembet annut, heneme pahavwiwa Uhokri iki wannuwiy adahan akehten.

⁷ Wixwiy mpuse ikaka Uhokri Gitip gannu uvititwiy adahan wixwiy kehne kabayka pawtak.

Wixwiy kadahan arakembet wannuwiy

⁸ Ig Uhokri Gitip iki gannu givitit pahavwi adahan ig hiyakemniye akak Uhokri gihiyekemni. Givititme pahavwi akiw igwata Uhokri Gitip iki gannu adahan ig hiyekne hiyakemniki ku pariye Uhokri akka git.

⁹ Givititme pahavwi igwata iki gannu adahan gikamaxwan ka aynsima. Givititme pahavwi igwata iki gannu adahan ig makniwene hiyeg.

¹⁰ Givititme pahavwi ig iki gannu adahan ig kehne annut ku pariye hiyeg amadgaya inin ka hiya nikehka. Givititme pahavwi ig iki gannu adahan ig awnene iwit ku pariye pes giwntak Uhokri. Givititme pahavwi ig iki gannu adahan ig hiyekne ba Uhokriwatma Gitip awnene givititak pahavwi. Givititme pahavwi ig iki gannu adahan ig awnene ariku nawenyewa iwit. Givititme pahavwi ig iki gannu adahan ig wagesne inakni iwit.

¹¹ Igwata pahavwiwa Uhokri Gitip ignewa iki uvititwiy madikte ini gannu. Ig ibakha gannu givuwiwkis mpuse hiyeg ku samah gimawkan.

Wixwiy Cristo givit

¹² Nah akkite yit abektey ku samah uvitwiy. Uvit pahavwiwa, heneme in kadahan ka aynsima akisutbek. In kataybi. In kawan. In kakugku. In kadahan ka aynsima akisutbek, heneme in pahavwiwa. Ig Cristo givit hawata in pahavwiwa. Wixwiy Cristo gihiyegavu wixwiy ka aynsima hiyeg, heneme wixwiy pahavwiwa pawtak ke wotbe wixwiy Cristo givitbe.

¹³ Wixwiy ayvekuye givit Cristo. Ku pariye judeyenevwi gikakkis ku pariye kane judeyenevwima, ku pariye ibukti gikakkis ku pariye kane ibuktima, wixwiy madikte kawihkiska givitit Cristo gavit pahavwiwa Gitip. Igme Gitip kawihkiska uvititwiy.

Wixwiy kadahanyekuye wannuwiy

¹⁴ Uvit kataybi, kawan, kakugku. In ka inyekatama. Hawata Cristo givit. Wixwiy mpuse kadahanyekuye wannuwiy adahan kannivwiye gidahan. Wannuwiy arakembet.

¹⁵ Wis ka hiya wisma ikaw warikapte giw pahavwi ku pariye kadahan nawenyewa gannu ay givit ariw udahan. Ukugku ka awna: “Nah ka iwaktima. Nikwe nah ka hiya nahma keh ariknawnema.” Ig ka hiya igma awna inakni hene, mmanawa ig kadahanwata gannivwi.

¹⁶ Ine utaybi ka awna: “Nah ka iwtyaktima. Nikwe nah ka hiya nahma keh ariknawnema.” Ig ka hiya igma awna inakni hene, mmanawa ig kadahanwata gannivwi.

¹⁷ Wake wowtyak inyekatabe, nikwekam wis ka hiya wisma timap. Wake utaybi inyekatabe, nikwekam wis ka hiya wisma ayh.

¹⁸ Heneme uvit ka inyekatama. In kadahan ka aynsima akisutbet ku pariye hamahkiska atere gavit Uhokri ku samah gimawkan.

¹⁹ Wake uvit in inyekatabe, amun ini wis yumakama uvitkam.

²⁰ Nikwe wis ka aynsima ukisutbet, heneme pahavwiwa uvit.

²¹ Wis kawnata hiya wisma ikaw kabaytema giw pahavwi ku pariye kadahan nawenyewa gannu ay givit ariw udahan. In ka hiya inma wowtyak awna arit uwak: “Nah ka muwakap.” In ka hiya inma utew awna arit ukugku: “Nah ka muwakay.”

²² Kawa. Ka ik adahan uvit misakwa yuma ukisutbet ku pariye uvewkan yuma arannu, ini uvit muwakapni. Wixwiy hawata kamawkanak pawtak.

Amawka ku wixwiy kiyathak pawtak

²³ Amawka ku wixwiy kiyatha pahavwi ku pariye wixwiy iki yumanene gannu ay givit hawata ku samah wixwiy kiyatha pahavwi ku pariye wixwiy iki ka gannusima. Wixwiy kuwis keh hene akak uvitwiy. Ini ukisutbet ay uvit ku pariye wis iki yumanene nikiytani, ini wis kawihkis kamis nivitit. Amun ini wis keh in humaw ka aynsima kiyatte, ka aynsima barewte

²⁴ ariw ini ku pariye kane muwaka kamis. Hene ig Uhokri keh Cristo givit humaw. Ig muwaka wixwiy kavigsate neras gihiyegavu ku pariye yumanene gannukis.

²⁵ Ig ka muwaka wixwiy mavihpak. Ig muwaka wixwiy kavigsak pawtak.

²⁶ Ku paha akisut uvit kayah, amun ini nikwe uvit kayah pahavwite. Ku paha akisut uvit uti kabayka, amun ini nikwe uvit batek pahavwite. Hawata wixwiy Cristo gihiyegavu.

Wixwiy kadahanyekuye wannivwiy gidahan Cristo

²⁷ Wixwiy madikte ay kewa Cristo givitbe. Wixwiy mpuse kewa givit akisutbetbe. Ku samah utaybi, uwan, ukugku kadahanyekuye arannivwi wixwiy hawata kadahanyekuye wannivwiy gidahan Cristo.

²⁸ Nah akkite yit gaytakkis hiyeg ku pariye ke Uhokri giwanbetbe ay ubetwiy wixwiy gihiyegavu. Pitatye ig iki giwatnivwi. Ayteke ig iki gawnevevu ku pariye awna iwit ku pariye pes giwntak Uhokri. Ayteke ig iki kannuhekevutnevwi. Ayteke ig iki hiyeg ku pariye keh annut. Ayteke ig iki hiyeg ku pariye kadahanye Uhokri gannu ay givitkis adahan makniwene hiyeg. Hawata ig iki hiyeg ku pariye ayavekne. Hawata ig iki hiyeg ku pariye giwewkistenkis hiyeg. Hawata ig iki hiyeg ku pariye awna ariku nawenyewa iwit ku pariye ignes kane pukuhpa.

²⁹ Cristo givit ka inyekatama. Wixwiy ka madiktema giwatnivwima. Wixwiy kawnata madiktema gawnevevuma. Ine wixwiy kawnata madiktema kannuhekevutnevwima. Ine wixwiy kawnata madiktema kehnevwima annut.

³⁰ Wixwiy ka madiktema kadahanye Uhokri gannu ay uvitwiy adahan makniwene hiyeg. Wixwiy kawnata madiktema awna ariku nawenyewa iwit ku pariye wixwiy kane pukuhpa. Ine wixwiy kawnata madiktema wages inakni iwit.

³¹ Nikwe uyay kannibeta abet ku pariye Uhokri gannu kabaytenene. Mpiksawnay aharit ini ku pariye kabaytenene adahan in misakwa ay yivit. Heneme nuvewkan nah akkite yit kuri pahat hiyakemniki ku pariye kabayte ariw madikte Uhokri gannu adahan in misakwa ay uvitwiy.