1 Koríntyus 11 - Uhokri Gahegbetawni Nukune akak Sawmus

¹ Heneki ig Cristo keh. Nah keh hawata ke igbe. Uyay ahehpan ku samah nah ahehpene Cristo.

Amawka ku tino kiyatha gugihgi

² Nah kabayhay nukebyuvwi, mmanawa yis yidukwenewa kiye nuwnuh. Nah kuwis ekke yit Kiyavwiye Jesus giwatnivwi giwnkis. Yis kuri ihpene madikte.

³ Kuri nah muwaka iki yit pahat hiyakemniki akiw gudahankis tinogben. Tino kumadukaka gavit gugihgi. Igme gutew tino. Heneme ig awayg kumadukaka gavit Cristo. Igme gitew awayg. Hawata akiw ig Cristo kumadukaka gavit Uhokri. Igme gitew Cristo.

⁴ Ku wis awasta utew ay gibetkis hiyeg, wis ekkene ku wis kumadukaka gavit hiyeg ayge. Hene uhiyekemniwiy. Nikwe ku aysaw wixwiy pahadguvu lammesya, ku pahavwi awayg ekkene iwit ku pariye pes giwntak Uhokri, amun ini ig ka awasta gitew. Ig kawnata awasta gitew ku aysaw ig piriyepkewne ayge. Ku ka henema in ke wotbe ig kumadukaka gavitkis neras hiyeg ayge. Bawa ig kumadukaka gavitnen Cristo. Mmanawa ku ig awaste gitew ayge nikwe ig miyathene gitew Cristo.

⁵ Egme pahavu tino ku aysaw eg akkano iwit ku pariye pes giwntak Uhokri eg awasta gutew. Hawata eg awasta gutew amun ini ku aysaw eg piriyepkawno ay gibetkis hiyeg. Eg awasta gutew awaku ku samah eg kumadukaka gavit gugihgi. Wake eg ka awasvitnema gutewbe, amun ini eg miyathakam gugihgi ku pariye gutew. In keh hiyeg ikigu ku eg ka ihpanoma giwn. In maraki gidahan ke wotbe eg yumahbe gusemnibe.

⁶ Ku tinogben ka awastekere gutewkis, nikwe kabayte adahan egnes tigehe gusemnikis madikte. Heneme ku pahavu tino tigehe gusemni madikte, in maraki gidahan gugihgi. Ku eg yumahwa gusemni, in marakiwata gudahan. Nikwe in areketni wotwiy ku amawka eg awasta gutew.

⁷ Awaykemni ka muwaka awasta gitewkis, mmanawa ignes Uhokri gahehpak ay amadga inin. Igkis ay adahan kahayaksenes Uhokri gikiytani ku samah ignewa gikivarakis. Egnesme tinogben egkis ay adahan kahayaksanos gugihgikis gikiytanikis ku samah igkis gukivarakis.

Tino guhawkan nawenyewa giw gugihgi gihawkan

⁸ Mmanawa minikwak akavuska hawkri ner pitatye awayg ka humaw guwntaknema gihayo. Heneme eg gihayo humaw giwntak gugihgi.

⁹ Kawnata ig gugihgi humaw gudahan gihayo. Heneme eg gihayo humaw gidahanikwa gugihgi.

¹⁰ Nikwe amawka ku tinogben awasta gutewkis adahan akkanos ku samah egkis ihpanos giwnkis gugihgikis. Mmanawa ka aynsima ahj ay ubetwiy. Wixwiy ka muwaka kanaktinsigkis.

Tino ka warikapnoma giw gugihgi

¹¹ Heneme tino ka warikapnoma giw gugihgi. Egkis piyamate kamawkanak pawtak. Ig Uhokri keh awayg gimawkanitnene gut gihayo. Ig keh tino gumawkanitnano git gugihgi.

¹² Nor pitatye tino humaw giwntak pahavwi awayg, heneme hawata akiw awaykemni wayvuka guwntakkis tinogben. Egkis madikte giwntak Uhokri.

Amawka tino keh ku pariye wadit gitkis hiyeg

¹³ Mmahpa yivewkan? Ba in wadit yit ku aysaw pahavu tino piriyepkaw ay gibetkis hiyeg gutew ka awaspitnema?

¹⁴ Mmanawa in huwewe wot ku in maraki ku aysaw pahavwi awayg kasemni kiyabwad.

¹⁵ Heneme ku tino kasemni kiyabwad in wadit. Mmanawa gusemni ikaka gut adahanikwa areketni ku in wadit adahan eg awasta gutew.

Amawka tino keh ku pariye wadit gitkis Uhokri gihiyegavu

¹⁶ Nawenetke yaytak ayge ka ihpekere inakni nuwnuh. Nikwe nah awna yit pahatwowa iwit akiw. In Uhokri giwatnivwi gihumpawnikis adahan tinogben awasta gutewkis. In hawata madikte Uhokri gihiyegavu gihumpawnikis.

Yis ax adahan kiyene Jesus akak yiyakni ka maguyema

¹⁷ Nukebyuvwi, nah ka hiya nahma kabayhay adahan ku samah yis pahadguvunenekwa lammesya. Mmanawa yis pahadguhwa yivewkan adahan yis kehne kabayka bawa ka kabaykama yis keh. Bawa he mbaykanen humaw.

¹⁸ Nah muwakate adahan nah iki yihiyekemni adahan ini. Nah time yak ku yis ka tuguhkiskere yihiyekemni hehpekuyema ku aysaw yis pahadguvu lammesya. Nah kabahte ka ihpin.

¹⁹ Heneme nah hiyakni ku amawka ku in humaw kahadbe wis hiyak ku pariye hiyeg igyewa tiviknene gikak Uhokri.

²⁰ Wixwiy Jesus gihiyegavu ubetkiwiy pahadguhwa adahan axne payegbitak, adahan amnihekne pawtak hawata adahan kiyene Kiyavwiye Jesus. Yisme ku aysaw yis pahadguhwa yis ka kiyenema Kiyavwiye Jesus.

²¹ Yis he kiyene yivitnenwa. Pahavwi ewk axka atere, heneme ig ka waha adahan pasuhpak amin gimana. Ig kayhsaw amin gimana madikte igwo. Ig ax kabiha. Ig higap kabiha he ig uwkayeh. Igme pahavwi ka ax kabayntiwatma ig misekwe mativwe gimin.

²² Mmahkay yis kehni hene? Ku yis pahadguhwa he adahanen axne, mmahki yis ka ax aynte yivinwa pisenwate? Ba kawa, ba yis ayta adahanikwa miyaresene Uhokri gihiyegavu madiptavye ku pariye pahadguvu ayge? Batke yis ayta adahanikwa marekwene neras ku pariye yumanene gidahankis? Mmah yivewkan nah kabayhay adahan ini yihiyekemni, nukebyuvwi? Kawk. Nah ka hiya nahma kabayhay adahan akebi ini hiyakemniki. Wixwiy ka hiya wixwiyma ax adahan kiyene Kiyavwiye Jesus akakma uyakniwiy ka maguyema.

Wixwiy kiye ku samah Jesus umahkiswe udahanwiy

²³ Ig Kiyavwiye Jesus kuwis ekke nutuh adahan ku samah wixwiy kiyegi ku samah ig umahkiswe udahanwiy. Nahme kuwis ekkepni yit. Nah ekke yit ku pariye igwa Kiyavwiye Jesus ekke gitkis giwatnivwi. Avim ini tiyegemka avit ig kamaykiswika, ayge ig iwe pahak bugut.

²⁴ Ig kabayha Uhokri. Ayteke ig sigkebdihe ini bugut. Ig awna gitkis giwatnivwi: — Amavanay inin bugut. Axnay niwntak. Inin bugut in nihuh ku pariye nah sigkebdihkis yidahanek. Han pitatit axnay bugut ke ininbe kiberevut adahan yis nukiyetninek.

²⁵ Hawata akiw ariwnteke ini, pisenwa gaxnikis madikte gimanakis, ig iwe pohow higeptet. Ig awna gitkis: — Nor higeptet egbaki kuri Uhokri gahegbetawni nukunewa yidahan. Mmanawa ig Uhokri ahegbete ginetni nukunewa akiw gikakkis hiyeg adahan ku samah ignes humaw gihiyegavu. Nahme sukase numighunek yidahan kahadbe ini gahegbetawni in humaw. Han pitatit higapnay win ke ininbe kiberevut adahan yis nukiyetninek. Henewatbaki ig Kiyavwiye Jesus awna.

²⁶ Nikwe ku aysaw wixwiy axnenek bugut ke inibe, ku aysaw wixwiy higepnenek win arikutak nor higeptet hene, amun ini wixwiy ekkene ku samah Kiyavwiye Jesus umahkiswe udahanwiy, he ku aysaw ig aytanek akiw.

Uyay ivegvitewnekuye avit wixwiy ax

²⁷ Nikwe ku pahavwi ax ini bugut adahan gikiyetni Kiyavwiye Jesus, ku ig axni akak giyakni ka maguyema, amun ini nikwe in ke wotbe ig kuwis patehene Kiyavwiye Jesus gih. Hawata akiw ku ig higap arikutak nor higeptet akak giyakni ka maguyema, amun ini nikwe in ke wotbe ig kuwis patehene Kiyavwiye Jesus gimig.

²⁸ Nikwe avit wixwiy ax ini bugut, avit wixwiy higap arikutak nor higeptet, amawka ku wixwiy ivegvitewnekuye ba uyakniwiy barewvityekuyema.

²⁹ Mmanawa ku wixwiy axni wixwiy higapni, ku uyakniwiy ka maguyema, nikwe ig Uhokri hiyapkisnek wotwiy avatra ku samah wixwiy ka kiyathenema Kiyavwiye Jesus givit.

³⁰ Avatra inere, kibite hiyeg ayge yibet igkis kakahribdip. Hawata kibite hiyeg ayge igkis kuwis miyarap avatra inere.

³¹ Heneme wake wixwiy ivegvitewnekuyebe avim ini avit wixwiy ax atere, nikwekam ig Uhokri ka muwakakam hiyapkis wotwiy hene.

³² Ig Uhokri hiyapkis wotwiy hene adahan bukihne utaraksanwiy wowiy kahadbe wixwiy ka biyukwima payak gikakkis neras ku pariye kane ikaw git Uhokri.

Uyay ax akak uyakni barewvitye

³³ Nikwe nukebyuvwi, ku aysaw yis pahadguvu adahan yis axne hene, uyay wahap madikte hiyeg giteke igkis danuhte adahan yis madikte axnekuye payak.

³⁴ Ku pahavwi mativwe gimin, amawka ku avit ig danuh atere, ig kamaxnete ganaktin ay givinwa. Ayge nikwe ku aysaw ig ayta lammesya, ig kiye ignenwa Kiyavwiye Jesus. Nikwe ig Uhokri ka muwaka hiyapkis git. Kuwewanek ku aysaw nah danuh aterenek, nah iki yit yihiyekemni akiw adahan ini.