1 Koríntyus 10 - Uhokri Gahegbetawni Nukune akak Sawmus

Amekenegben biyuk awaku igkis isaksa givitkis abetki kumadukigkis

¹ Nukebyuvwi, kiyeminahnabay ku samah uhawkrivwiy isakse givitkis abetki kumadukevgikis. Minikwak igkis madikte wiwhavepka giwakutakkis hiyeg ejituyenevwi gavit amekene Moís. Ayteke igkis madikte wewkiska gavitimpi paha ukuhne. Igkis madikte manuknekuye parahwokwa. Igkis mpiyenekuye ayegbiw un.

² Ini ku samah igkis anaviw ukuhne hawata ku samah igkis manuke ayegbiw un in ke wotbe igkis kewviyebe aygebe. In ke wotbe igkis kewviyebe ahakwat un giwavrik amekene Moís adahan igkis wageswevye gihiyegavu.

³ Avim ini igkis madikte axnekuye gimanakis awahkiska giminkis gavit Uhokri.

⁴ Igkis higepnekuye un awahkiska giminkis gavit Uhokri. Igwa Cristo ayge gikakkis. Ku aysaw igkis higap un guwntak nor tip in ke wotbe igkis higevyebe un dehetniki giwntak Cristobe.

⁵ Heneme kaba madikte gaytakkis ka keh Uhokri gibetki. Inneki keh Uhokri makisrihpigkis aynte amadga amatap.

Uyay ka taraksa kema amekenegbenma

⁶ Madikte ini mbayka ku pariye danuhe gitkis in humaw arakak udahanwiy adahan ku pariye danuh wotwiynek. In ikene uhiyekemniwiy kahadbe wixwiy ka miyarhaw aharit ariknawnema kane kabay kema igkisma.

⁷ Kahadbe wixwiy ka kiyatha ahehpakti batakka kema gaytakkisma. Mmanawa in Uhokri gannasan awna: — Neras hiyeg batebdi, igkis axnekuye, igkis higepnekuye higapka. Pisenwa igkis kannikaw igkis kaynes ayge. Henebaki igkis kiyathe ahehpakti batakkarad. Amawka ku wixwiy ka kehni hene ku samah igkis kehe.

⁸ Hawata akiw amawka ku wixwiy ka powkemnihwa kema gaytakkisma. Ku aysaw igkis powkemnihwene, ayge pahaye adahan igkis makisrip. Ka aynsima hiyeg miyarap aviminekuye ini pahaywowa hawkri, piyana madikwa mil gikebikis gikakkis mpana mil gawnakis (23.000).

⁹ Hawata akiw amawka ku wixwiy ka hikek Uhokri giyakni ukakwiy, ku samah gaytakkis amekenegben kehe, awaku ini igkis kagahptavepka gavitkis kaybune igkis makisrip ayge.

¹⁰ Hawata akiw amawka ku wixwiy ka hayrukaw gitivut Uhokri kema gaytakkisma. Ku aysaw igkis amekenegben kehe hene, pahavwi ahj umehekevutne danuhe atere gitkis ig umahampevgikis.

¹¹ Madikte ini danuhe gitkis hene adahan areketni wotwiy. Ini gitaraksankis, ini ku samah ig Uhokri hiyeke gikakkis, inakni annasaki adahanikwa ukannuhtenwiy ku avim inin amaksemni hawkri.

Uhokri iki wawaygi adahan wis ka isaksaw arit mbayka

¹² Avuriwnabay yihiyekemni ba in kibeynewatma nikwe. Pis ku pariye ikawvari kibeyne hiyeg pis ka hiyak ku aysaw pis dagehe hawata.

¹³ Ku wis dagehe, uhawkanavrik. Mmanawa ik adahan wis ka isaksaw arit mbayka. Wavitye gihikektenkis madikte hiyeg, heneme ig Uhokri kavigsanawiy avanenekwa. Ig ka isaksati mbayka danuh wotwiy mpiynema udatniwiy. Ku aysaw wavitye ayta uhikektenwiy, amun ini ig Uhokri woka ahin adahan wixwiy higihwa giw ner wavitye kahadbe wixwiy ka isaksaw arit mbayka, kahadbe wixwiy tiviknene gikak Uhokri.

Ku wis kakanhaw im arit ahehpakti amun ini wis kakanhaw arit wavitye

¹⁴ Nikwe nukebyuvwi, higihwanay ariw ahehpakti batakka.

¹⁵ Nah awna inakni yit yis ku pariye hiyeknevwi hiyakemniki. Asa iwasanay yiswa ba nuwnuh waditnewatma.

¹⁶ Nah kehte abektey yidahan. Wixwiy ubetkiwiy pahadguhwa adahan kiyene ku samah Cristo umahkiswe udahanwiy. Wixwiy pahadguvu, ayge wixwiy iwi win wixwiy kabayhin. Ayteke wixwiy higapni. Amun ini wixwiy kiyene ku samah wixwiy pahavwiwa gikak Cristo ku samah ig sukase gimig. Ayteke wixwiy sigkebdih bugut wixwiy axni. Amun ini wixwiy kiyene ku samah wixwiy pahavwiwa gikak Cristo ku samah gih sigkaka.

¹⁷ Hiyawa wixwiy ka aynsima, madikte wixwiye axnekuye ariwntakwata bugut, ku pariye pahawowatnene. In ke wotbe wixwiy pahavwiwatbe uvitwiy pawtak. Hiyawa wixwiy ka aynsima hiyeg, heneme wixwiy pahavwiwa pawtak.

¹⁸ Ivegnay ku samah hiyeg izhaewyenevwi amadgaya inin gikehnikis. Igkis akka im givetunat Uhokri adahan gikiytenitni. Ayteke nikwe madikte hiyeg ku pariye ax ariwntak ini im in ke wotbe igkis aygwata kiyathenes Uhokri.

¹⁹ Nukebyuvwi, in huwewe nutuh ku ahehpakti batakka in ka ariknawnema. Im kakanhawka arit ahehpakti batakka in kawnata ariknawnema.

²⁰ Heneme ku pariye hiyeg ekkenevwi im avetunat ahehpakti batakka, amun ini igkis nekkepten ka givetunatma Uhokri. Igkis nekkepten givetunatkis wavityempu. Nukebyuvwi, nah ka muwaka adahan yis idiswa abet wavityempu gannivwikis aynesnima.

²¹ Ku wixwiy kuwis higap win adahan kiyene Uhokri, ka kis adahan wixwiy hawata higap win gidahankis wavityempu. Ku wixwiy kuwis ax adahan kiyene Uhokri, ka kis adahan wixwiy hawata ax wavityempu gimanakis.

²² Mmah yis kehkere Uhokri atihpak yivatra ku samah yis darihwak akiw akak yimaytwa wavitye? Avuriwnabay. Yis yuma yawaygi gitivut Uhokri adahan yis kiyimwihgi hene.

Amawka ku wis keh ku pariye kabay gidahankis madikte hiyeg

²³ Nukebyuvwi, ik adahan wixwiy keh madikte ku pariye uhiyekemniwiy tuguh. Heneme ka madiktema kabay udahanwiy. Ik adahan wixwiy keh madikte. Heneme ka madiktema wagahkis wawaygiwiy.

²⁴ Hawata akiw, amawka ku wixwiy ka keh kabayka udahanwiynenwatma. Amawka ku wixwiy keh ku pariye kabay gidahankis madikte hiyeg ku pariye wagahkisne gawaygikis.

Ku umana ka sam git pahavwi nikwe ka sam wis axni

²⁵ Abusku im kakanhawka arit ahehpakti batakka in piyukka ariku piyuket payegbitak akak im kane kakanhawkama. Ka sam. Ik adahan wixwiy ax madikte im ku pariye piyukka ayge. Wixwiy ka muwaka ivegmina uhiyekemniwiy amin ini im baki in kabaywatma adahan wixwiy axni.

²⁶ Madikte kabay, mmanawa Uhokri gannasan awna: — Inin hawkri in Uhokri gidahan. Madikte amedgene hawkri in hawata gidahanwata.

²⁷ Ku pahavwi kane Uhokriyanma awnasap adahan pis ax git, ku pis atekere hiyawa pis atak. Ka sam pis ax ku pariye im ig ahegbeta pidahan. Pis ka muwaka ivegmina pihiyekemni amin baki in kabaywatma adahan pis axni.

Ku umanawiy ka kabay git pahavwi, ka ik adahan wixwiy axni

²⁸ Heneme ku pahavwi ayge awna pit: “Inin im in kuwis kakanhewpka arit ahehpakti batakka” nikwe pis ka muwaka axni. Mmanawa pis ka muwaka taraksasig. Hawata akiw pis ka muwaka ax ku pariye ka kabay git adahan wis ax.

²⁹ Pit in ka sam pis ax, heneme git ner pahavwi in ka kabay git. Nikwe ka muwaka ax. Nawenetke pis ka pukuha inakni nuwnuh. Pis awna: “Mmahki nah ka hiya nahma ax ku pariye ka sam nutuh awaku in ka kabay git pahavwi?

³⁰ Nah kabayha Uhokri adahan ini numana. Nikwe in ka sam nah axni. Mmahki ig ner awna numinuh nikwe avatra numana? Mmahki nah ka hiya nahma axni?”

³¹ Nah akkite pit ku samah. Amawka ku pariye wixwiy keh amawka ku wixwiy keh madikte adahan gikebeyhetni Uhokri. Ku wixwiy ax, ku wixwiy higap, ku pariye wixwiy keh, amawka wixwiy keh madikte adahan gikebeyhetni Uhokri.

³² Amawka ku wixwiy ka taraksa gikak pahavwinema hiyeg, ine hiyeg judeyene, ine hiyeg kane judeyenema, ine Jesus gihiyega.

³³ Uyay keh hawata ku samah nah keh. Avanenekwa nah keh ku pariye kabay gitkis madikte hiyeg. Mmanawa nah ka aharitnema kabayka nudahanenwatma. Nah aharitne kabayka gidahankis madikte hiyeg. Nikwe nah ka keh ariknawnema ku pariye gimaptenkis giw Uhokri. Numawkan igkis amnihka gavit Uhokri adahan igkis danuh git.